2 AbanyaKorinto 4 - Nouveau Testament et Psaumes en Ndandi Version 1962

Omubiri wetu

¹ Kusangwa, tuwite omubiri oyu, ngoko twabiriangirira olukogo, sitweremerawa.

² Twabirigana emyatsi yesisoni yobubisobiso, neritindalendera omo menge weriteba; kutse erihegemya eKinywa kyoMungu, nikwa eriminyisya ekyekwe nene itwayiminyikalya oko maringikania wabandu bosi omo meso woMungu.

³ Nomo engulu yowene yetu iswikirwe, iswikirwe oko bakahera ibobene.

⁴ Kubo omungu we kihugo kino abirilibira amaringikania wabatikirirye erileka ibatalangira ekyakakala kyengulu yowene yolukengerwa lwaKristo, oyuri erisosa ryoMungu.

⁵ Kusangwa sitwekangirirya itwe bene, nikwa Yesu Kristo yoMukama, netu bagombe benyu busana na Yesu.

⁶ Kusangwa ni Mungu oyo wabuga ati, Ekyakakala kikoleraye omo mwirimya, oyu wabirikolerya omo mitima yetu eriha ekyakakala kyeriminya ryolukengerwa lwoMungu omo buso bwaKristo.

Amaka werikirirya oMungu

⁷ Nikwa tuwite ebindu ebi omo nyungu syeribumba, eri kangya akagala akalabire ni koMungu butsira ketu.

⁸ Tuka garibawa ehosi, nikwa sitwehumukala; tukagangagangabawa, nikwa sitwegangaganga;

⁹ tukendereribawa, nikwa sitwesi ganibawa itwe bene; tukaswiribawa ahisi, sitweheribawa;

¹⁰ ebiro byosi tukaheka omo mubiri eriitwa ryaYesu, neryo engebe yaYesu iyatoka eriminyikalibwa omo mibiri yetu.

¹¹ Kusangwa itwe abariho tukaletawa oko luholo ebiro byosi busana na Yesu, neryo engebe ya Yesu iyatoka eriminyikalibwa omo mibiri yetu yoluholo.

¹² Neryo oluholo lukakola mubiri omwisi wetu, nikwa engebe omwisi wenyu.

¹³ Kusangwa tuwite ekirimu ekyo kyerikirirya ngoko asaka ati, monikirirya, kikaleka inabuga, netu twikirirye, kikaleka itwabuga,

¹⁴ eriminya ngoko oyo walubukaya Mukama Yesu asyatulubukya haguma na Yesu nerituleta haguma nenyu omwibyaho riwe.

¹⁵ Kusangwa ebyosi biri busana nenyu, neryo ngoko olukogo lukakanya oko bandi na bandi ilwaleka eriha ewasingya, iryakania, oko lukengerwa lwoMungu.

¹⁶ Ritya sitweyitalukako. Nomo mibiri yetu yeyihya ikakula, omundu wetu womwisi akayirawa mo muhyamuhya ekiro nekiro.

¹⁷ Kusangwa obulige obu bwanguhire bwakatambi kake bukatukokoteraya olukengerwa lunene olwerikota olulabire olulengo,

¹⁸ kusangwa sitwesamarira emyatsi eyikalolawako nikwa emyatsi eyitalolilweko; kusangwa emyatsi eyikalolawako ni ya katambi kake, nikwa emyatsi eyitalolilweko ni ya kera nakera.