2 AbanyaKorinto 13 - Nouveau Testament et Psaumes en Ndandi Version 1962

Erihana

¹ Eyi ni ngendo yakasatu ngahika ukwinywe. Omo munowabalangiri babiri kutse basatu oburi mwatsi asimanibwa.

² Monubahisya abakolanabi erimbere nabandi bosi, na lino ngubahisayabo omugulu nyiteho, ngoko nakola oko lugendo lwage lwa kabiri, nyiti sindiendisyabalyabo,

³ kusangwa mukasonda ekikakangaya ko Kristo akabugira omwisi wage. Iye si molomolo busana nenyu, nikwa ni wamaka omwisi wenyu.

⁴ Kusangwa abambawa oko muti omo bolo, nikwa ariho omo maka woMungu. Kusangwa turi bolo omwisi wuwe, nikwa erikola nenyu twasyabaho haguma naye omo maka woMungu.

⁵ Muyilenge, erilebya nga munemuhatikana erikirirya ryenyu. Muyilenge. Simwasi Yesu Kristo ngane omwisi wenyu kwehi? —mutetataluka okwiyilengako eryo!

⁶ Nyiri na maha ko mukandisyaminya ko tutetataluka.

⁷ Nikwa tukasaba Mungu tuti simukole kibi; si bwambu tuminyikale nerisimwa, nikwa inywe imwakola ekibuya, nomo twangabya nga batesimawa.

⁸ Kundi sitwangatoka erikolaki erilwa nekwenene, nikwa busana nekwenene.

⁹ Kusangwa tukatsema, omugulu turi bolo, nenyu muri bamaka: neki kyo tukasabira nibya ryerihikana ryenyu,

¹⁰ Kikaleka inabasakira emyatsi eyi omugulu nyite haguma nenyu, neryo omugulu nasyabya nenyu isinangabya nobukali omo hamuli nahabawa noMukama busana nerihimba butsira erihimbula.

Erikerya

¹¹ Ebikisiya, bagala betu, obuholo. Muhikane, muhumule, mowe erihana ryage, mubye noburingikania buguma, mwikale nobuholo, noMungu wolwanzo nobuholo asyabya haguma nenyu.

¹² Mukeranaye neriryatsirirana eribuyirire.

¹³ Ababuyirire bosi bakabakeraya.

¹⁴ Olukogo lwoMukama Yesu Kristo nolwanzo lwoMungu nerisangira ryeKirimu Kibuyirire bibye haguma ninywe bosi.