1 Yoane 5 - Nouveau Testament et Psaumes en Ndandi Version 1962

Erikirirya erikakinda e kihugo

¹ Oburi mundu oyu kikiriraya ko Yesu ni Kristo abutirwe noMungu, noburi mundu oyu kanza oyo wabuta akanza nomwana abuta.

² Busana neki tukaminya ko twanzire abana boMungu, omugulu tukanza oMungu nerikola ebihano biwe.

³ Kusangwa olu ni lwanzo lwoMungu, tutegaye ebihano biwe. Kandi ebihano biwe sibiritohire.

⁴ Kusangwa ebyosi ebibu tirwe noMungu bikakinda e kihugo; kandi eri ni kinda erika­kinda e kihugo, ryerikirirya ryetu.

⁵ Ni ndi oyu kakinda e kihugo kwehi? yonoyu kikiriraya ko Yesu ni Mugala wo Mungu.

⁶ Oyu ni Yesu Kristo oyo wasa namagetsi nomusasi, butsira na magetsi masa nikwa namagetsi nomusasi.

⁷ Ne Kirimu ni mutuli womwatsi, kusangwa eKirimu ni kwenene.

⁸ Abakatula omwatsi ni basatu, eKirimu, na magetsi, nomusasi; na basatu aba bakabuga kiguma.

⁹ Twamaliga eritulago rya bandu, eritulago ryoMungu rilengire; kusangwa eri ni tulago ryoMungu, kusangwa abiritula ebyaMugala wuwe.

¹⁰ Oyu kikiriraya oMugala woMungu ari neritulago omwisi wuwe. Oyu tikiriraya oMungu, abirimuyira mo mubihi kusangwa siaritikirirya eritulago eryo Mungu abiritula busana noMugala wuwe.

¹¹ Nobulangiri bobu, Mungu mwatuha engebe yerikota nengebe eyi iri omwisi woMugala wuwe.

¹² Oyu wite oMugala awite engebe; noyu tawite Mugala woMungu siawite engebe.

Eriminya

¹³ Ngabasakira ebi inywe mukikiriraya oko rina ryoMugala woMungu, imwatoka eriminya ko muwite engebe yerikota.

¹⁴ Neritindiubaha eryo turi naryo omwisi wuwe ryeri, twama bulya kindu kyahi ngerisonda riwe akatowa.

¹⁵ Neryo twama minya kwakatowa omo byosi tukasaba, tunasi tukabana ebyo twamamusaba.

¹⁶ Omundu amalangira mulikyabo akakola ekibi ekite kyoluholo, akandisaba, noMungu akandimuha engebe busana nabo bakola ebibi ebite byoluholo. Hari ekibi kyoluholo sindibuga nyiti ikyasabirwa.

¹⁷ Erikola nabi ryosi ni kibi, nikwa hari ekibi ekite kyoluholo.

¹⁸ Tunasi oyu kabutawa noMungu siarikola ekibi, nikwa Oyo abutawa noMungu akamutegaya, nomubi siarimutulako.

¹⁹ Tunasi ko turi boMungu, ne kihugo kyosi kiri omo maka womubi.

²⁰ Kandi tunasi ko Mugala woMungu abiriasa kandi abirituha amenge, eriminya oyuri wekwenene; netu turi omwisi wuwe oyuri wekwenene, omwisi woMugala wuwe Yesu Kristo. Oyu ni Mungu wekwenene nengebe yerikota.

²¹ Abana balere, muyitegaya oko sisumba.