1 Yoane 4 - Nouveau Testament et Psaumes en Ndandi Version 1962

Erilenga ebirimu

¹ Abanze, simwikiriraye oburi kirimu, nikwa mulenge ebi rimu erilebya nga ni byoMungu; kusangwa abaminyereri bangi bamabihi babirihulukira omo e kihugo.

² Busana neki twasi eKirimu kyoMungu: oburi kirimu ekikatulago ko Yesu abiriasa omo mubiri ni kyoMungu,

³ noburi kirimu ekiteka nganaya Yesu sikyoMungu. Eki ni kirimu kyenzigu yaKristo, eyo mowa kwekasa, kandi lino ine omo kihugo.

⁴ Abana balere, muri boMungu, kandi mwabirikindabo; kusangwa oyuri omwisi wenyu alengire oyuri omo kihugo.

⁵ Ebo ni be kihugo, kikaleka ibabuga ebye kihugo ne kihugo kikowabo.

⁶ Itwe turi boMungu. Noyu wasi Mungu akatowa, noyu te woMungu siaritowa. Busana neki tukaminya ekirimu kyekwenene nekirimu ekyeritalya.

Mungu ni Lwanzo

⁷ Abanze, twanzane, kusangwa olwanzo ni lwoMungu, noyu kanza iniabutirwe noMungu kandi asi Mungu.

⁸ Oyu tianza siariminya Mungu; kusangwa Mungu ni lwanzo.

⁹ Omweki olwanzo lwoMungu lwaminyikalibawa omukati-kati ketu, ko Mungu mwatuma Mugala wuwe mubutwa muguma omo kihugo, itwatoka eribyaho busana naye.

¹⁰ Omweki olwanzo luri, butsira ambu itwe twanza Mungu nikwa iye mwatwanza mwatuma Mugala wuwe eribya embanulo busana nebibi byetu.

¹¹ Abanze, oMungu amatwanza atya, netu tutolere itwanzana.

¹² Sihari mundu oyu wabirilola oko Mungu na kera; twamanza na, Mungu inikere omwisi wetu, nolwanzo luwe ilukahikana omwisi syetu.

¹³ Busana neki tukaminyako twikere omwisi siwe naye omwisi syetu, kusangwa abirituha oko Kirimu kiwe.

¹⁴ Netu twabirilangira tukatulago ko Tata abirituma Mugala wuwe eribya Mulamya we kihugo.

¹⁵ Oyu wasyatulago ko Yesu ni Mugala woMungu, Mungu ikere omwisi wuwe, naye omwisi woMungu.

¹⁶ Ritya tukaminya kandi tukikiriraya olwanzo lwoMungu busana netu. Mungu ni lwanzo, noyu wikere omo lwanzo inikere omwisi woMungu, noMungu inikere omwisi wuwe.

¹⁷ Omweki olwanzo lukabereribawa omwisi syetu, itwatoka erisika busana nekiro kyeritswera, kusangwa ngoko ari, netu turi tutya omo kihugo kino.

¹⁸ Sihari eriubaha omo lwanzo, nikwa olwanzo oluhikene lukagusa eriubaha ryeyihya. Kusangwa eriubaha riri nerisuyira, noyu kubaha isiaritahika nibwa omo lwanzo.

¹⁹ Tukanza, kusangwa iye mwatsuka eritwanza.

²⁰ Omundu amabuga ati, Nyanzire Mungu, akakwa mugala wabo obusu, ni mubihi; kusangwa oyu tanzire mugala wabo oyo alolireko, siangatoka erianza Mungu oyo atalolireko.

²¹ Kandi turi nekihano eki kyalwa kwiye, kiti, oyu kanza Mungu, anganza na mugala wabo nibya.