1 Yoane 3 - Nouveau Testament et Psaumes en Ndandi Version 1962

Abagala boMungu na bagala beSatani

¹ Mulebaya, nga ni musindo wahi wolwanzo olo Tata abirihira kwitwe olukaleka itwabirikirwa mo bana boMungu; kandi kotune tutya. Ekikaleka e kihugo ikitatuminya ni kusangwa sikyetamuminya.

² Abanze, lino turi abana boMungu; kandi sikyekyaminyikala ko tukandisyabya, nikwa tunasi omugulu asyabutuka twasyabya ngaye, kusangwa twasyamulolako kwari.

³ Noburi mundu oyu wite amaha aya omwisi wuwe akayeraya ngoko erire.

⁴ Oburi mundu ukakola ekibi ari kulubanza lwerilolo; ekibi ni lolo.

⁵ Munasi kwaminyikalibawa erilusya ebibi, nomwisi wuwe sihari ekibi.

⁶ Sihari omundu oyu wikere omwisi wuwe oyu kakola ebibi; sihari omundu oyu kakola ebibi oyu wabirimulolako kutse erimuminya.

⁷ Abana balere, simuleka mundu nomuguma eribateba. Oyu kakola ekitunga­nene atunganene, ngoko naye atunganene.

⁸ Oyu kakola ebibi ini weSatani; kusangwa Satani abirikola ebibi okwitsuka ryerimbere kyaleka oMugala woMungu iniaminyikala ni busana neriherya emibiri yaSatani.

⁹ Sihari omundu oyu wabutawa noMungu oyu kakola ebibi; kusangwa omusindo woMungu ikere omwisi wuwe, kandi siangatoka erikola ebibi kusangwa abutirwe noMungu.

¹⁰ Umweki abana boMungu baminyikere, nabana beSatani: omundundi oyu tekola ekitunganene siwo Mungu, kutse oyu tanzire mugala wabo.

¹¹ Kusangwa engulu yeyi eyo mowa okwitsuka ryerimbere, iti twanganzana:

¹² butsira eribya nga Kaina oyu wabya womubi oyu wita mulumuna wuwe. Naye mwamwitiraki kwehi? Kusangwa emibiri yiwe yabya mibi neyi kuwa mugala wabo yabya itunganene.

Erianzana

¹³ Abagala betu, simusweke, e kihugo kyamabakwa obusu.

¹⁴ Tunasi ko twabirilwa omo luholo erihika omo ngebe, kusangwa twanzire abagala betu. Oyu tanza ikere omo luholo.

¹⁵ Oyu kakwa mugala wabo ekiniga ini mwiti, nenyu munasi omwiti siawite engebe yerikota eriikala omwisi wuwe.

¹⁶ Bu sana neki twasi olwanzo, kusangwa mwaha engebe yiwe busana netu; netu ritolere eriha esyongebe syetu busana na bagala betu.

¹⁷ Nikwa omundu amabya awite ebindu bye kihugo kino, inialangira omugala wabo iniari nobwaga, nikwa iniamukakirya kweriganyira riwe, olwanzo lwoMungu lwikere omwisi wuwe luti kwehi?

¹⁸ Abana balere, sitwanze omo kinywa nomo lulimi; nikwa omo mubiri nomo kwenene.

¹⁹ Busana neki twasyaminya ko turi bekwenene, nerisikya emitima yetu embere siwe

²⁰ omugulu emitima yetu ikatutswera lubi; nikwa Mungu ni mukulu alengire mitima yetu, kandi asi emyatsi yosi.

²¹ Abanze, emitima yetu yamatindatutswera lubi, tuwite eritindiubaha embere syoMungu;

²² kandi tuka bana ebyosi tukamusaba, kusangwa tukategaya ebihano biwe kandi tukakola ebikamutsemesaya omo meso wuwe.

²³ Neki ni kihano kiwe, kiti twangikirirya erina ryoMugala wuwe Yesu Kristo nerianzana, ngoko atutegeka.

²⁴ Abosi abakategaya ebihano biwe bikere omwisi wuwe, naye omwisi wabo. Kandi busana neki tukaminya kwikere omwisi wetu, busana neKirimu ekyo atuha.