1 Yoane 2 - Nouveau Testament et Psaumes en Ndandi Version 1962

Erilendera omo mwirimya

¹ Abana bage balere, ngabasakira eki isimwakola ekibi; nikwa omundu amakola ekibi, tuwite omwimiri oko Tata, Ye Yesu Kristo mutunganene;

² naye ni mbanulo yebibi byetu, kandi butsira byetu ibyobyene nikwa busana ne kihugo kyosi.

³ Busana neki tukaminya ndeke ko tumwasi, twamateya ebihano biwe.

⁴ Oyu kabuga ati, Nyimwasi, atebika ebihano biwe ni mubihi, nekwenene isiri omwisi wuwe;

⁵ nikwa oburi mundu oyu kabika eKinywa kiwe, olwanzo lwoMungu lukahikana omwisi wuwe kwenene. Busana neki tukaminya ndeke ko turi omwisi wuwe:

⁶ oyu kabuga ati ikere omwisi wuwe atolere erilendera omo nzira eyo alenderamo.

Erianza mulikyetu

⁷ Abanze, sindibasakira ekihano kihyakihya, nikwa ekihano kyakera ekyo mwabya nakyo okwitsuka: ekihano ekyo kyakera kyo kinywa mwabiriowa.

⁸ Nikwa ngabasakira ekihano kihya kihya, ekiri kwenene omwisi wuwe nomwisi wenyu, kusangwa omwirimya akahwa nekyakakala kyekwenene kyo kikakoleraya.

⁹ Oyu kabuga ati ari omo kyakakala akakwa omugala wabo yobusu akine omo mwirimya.

¹⁰ Oyu kanza mugala wabo ikere omo kyakakala, kandi sihari ekyeritwikalya omwisi wuwe.

¹¹ Nikwa oyu kakwa mugala wabo yobusu iniari omo mwirimya kandi akalendera omo mwirimya, isiasi eyo akaya, kusangwa omwirimya abirimuyira mo mbumi.

Siwanze e kihugo

¹² Ngabasakira, abana balere, kusangwa ebibi byenyu bya biribugirwa busana nerina riwe.

¹³ Ngabasakira, inywe abise, kusangwa munasi oyo wabyaho okwitsuka, ngabasakira, inywe abalwana, kusangwa mwabirikinda omubi. Ngabasakira bana, kusangwa mwabiriminya Tata.

¹⁴ Ngabasakira, abise, ku sangwa munasi oyu wabyaho okwitsuka. Ngabasakira, abalwana, kusangwa muri bamaka, nekinywa kyoMungu kikere omwisi wenyu, kandi mwabirikinda omubi.

¹⁵ Simwanze e kihugo kutse emyatsi eyiri omo kihugo. Omundu amanza e kihugo, olwanzo lwaTata isiluri omwisi wuwe.

¹⁶ Kusangwa ebyosi ebiri omo kihugo, engumbu yomubiri nengumbu yameso neriyitendera ryengebe, sibyaTata, nikwa ni bye kihugo.

¹⁷ Ne kihugo kikahwaho, nengumbu yakyo; nikwa oyu kakola erisonda ryoMungu asyabyaho kera na kera. Enzigu yaKristo

¹⁸ Abana, ni mugulu wenyuma; kandi ngoko mowa kwenzigu ya Kristo yasyasa, na lino esyonzigu syaKristo syabiriasa; neryo tunasi kwari mugulu wenyuma.

¹⁹ Mobalwa kwitwe, nikwa sibabya betu; kusangwa kumbe babya betu, nga babiri ikala netu; nikwa bagenda, ikyaminyikala ndeke ko bate bosi betu.

²⁰ Nikwa mwabirihakabibwa noyu Buyirire, kandi mwasi ebyosi.

²¹ Ngabasakira, butsira ngoko mutasi ekwenene, nikwa kusangwa munasikyo, kandi kwamabihi ate omo kwenene.

²² Omubihi ni ndi siyoyu kagana ko Yesu ari Kristo kwehi? Enzigu ya Kristo yeyi, yoyu kagana Ise noMugala.

²³ Oburi mundu oyu kagana Mugala isiawite nIse. Noyu kakanganaya oMugala awite nIse.

²⁴ Muleke ekyo mowa okwitsuka ryeri mbere kikale omwisi syenyu. Ekyo mowa erimbere kyamikala omwisi syenyu, nenyu mwasikala omwisi syoMugala nomwisi wIse.

²⁵ Eki kyabiritulaga, ye ngebe yerikota.

²⁶ Ngabasakira emyatsi eyo busana nabangabatalya;

²⁷ nikwa erihakabibwa eryo mwabiribana okwiye rikere omwisi syenyu, isimuri nobwaga omundu akabakangirirya; kandi erihakabibwa riwe rikabakangiriraya emyatsi yosi, ni ryakwenene, isi mabihi, ngoko ryabiribakangirirya, mwikale omwisi siwe.

²⁸ Na lino, bana, mwikale omwisi siwe, neryo omugulu asyaminyikala twasyabya neriyiketera, itutabya nesisoni emuliro wuwe okwi hika riwe.

²⁹ Mwamaminya kwari mutunganene, imwaminya ndeke koburi mundu oyu kakola ekitunganene abutirwe naye.