1 Timoteo 6 - Nouveau Testament et Psaumes en Ndandi Version 1962

Erihanwa ryabakwama Mungu

¹ Abosi abari oko ngomo yobukobe baganze abakama babo ko batolere erisikya ryosi, neryo erina ryoMungu nerikangi­rirya sibitsumawe.

² Abawite abakama abikirirye, sibaponebo kusangwa ni bagala babo; nikwa batolere erikolerabo kwilaba kusangwa abakabana endundi busana nomubiri wabo ni berikirirya na banze. Ukangiriraye uhane emyatsi eyi.

Eriyitsutsa bindu

³ Omundu amakangirirya ogundi musindo, isiariliga ebinywa bisikire byoMukama wetu Yesu Kristo, nerikangirirya erisangene nerikenga oMungu,

⁴ ayihamirye, neriteba isihari ekyo asi; awite engumbu nyibi busana nobuhaka nerinegena omo binywa, ebikaleta eritsura, nerigabana, nebitsumi, neriganirya ibi,

⁵ nerinegena omukati kati kabandu abatsandire omo buringikania kandi sibawite omwatsi wakwenene, bakaganiraya bati mbino erikenga Mungu ni nzira yeribana endundi.

⁶ Hari endundi nene erikenga Mungu haguma neriyinihira;

⁷ kusangwa motutaleta ekindu omo kihugo, kandi sitwetoka eritwala ekindu twalwamo;

⁸ nikwa twamabya tuwite akaryo nesyongimba, haguma nebyo tukandisyabya nomuyinihire.

⁹ Nikwa abakayitsutsa eribya nobusoki bakagwa omwilengwako, nomo kitego, nomo syo ngumbu nyingi syobukiru nesikagalaya, ebikasendaya bandu omwitsanda nerihera.

¹⁰ Kusangwa olwanzo lwesyofaranka ni murihi webibi byosi; busana nengumbu eyi abandi babiritala erilwa okwikirirya neritobongola emitima yabo namalige mangi.

¹¹ Nikwa uwe, mundu woMungu, usage ebi byosi; ukwame eritunganene, erikenga oMungu, erikirirya, olwanzo, erisika, obolo.

¹² Ulwe amalwa owene werikirirya; uhambe engebe yerikota eyo wabirikirirawa omugulu wakangaya emuliro waba langiri bangi.

¹³ Ngakutegeka embere syoMungu, oyu kaha engebe oko byosi, nemuliro wa Kristo Yesu oyo watula erikangya ryowene embere wa Pontio Pilato,

¹⁴ utegaye ekihano, butsira ekitingu, kutse ekyangakungwa, erihika okwi minyikala ryoMukama wetu Yesu Kristo;

¹⁵ neki kyasya minyikalibwa oko mugulu atolere noyuri Mukulu iyowene, nowomuyisa, oMwami wabami, noMukama wabakama;

¹⁶ iye iyowene awite eritindahola kandi ikere omo kyakakala ekitetoka erihikwamo, oyo sihari mundu oyu wabirimulolako na kera kutse oyo wangatoka erimulolako. Erisikya nobutoki byerikota bibye kwiye. Bibye bitya.

Abebindu bahitaye

¹⁷ Uhane abebindu omo kihugo kino uti, sibayihamaye, kutse sibahire amaha wabo oko busoki obutasikire, nikwa oko Mungu oyu katuha ebindu byosi ngobusoki bweritsemeramo.

¹⁸ Bakole ebibuya, babye bebindu byemibiri yowene, bahitaye, bahe abandi,

¹⁹ ibakayibikira ekibanza kyowene busana nomugulu owakandisyasa, ibatoka erihamba engebe iyo ni ngebe kwenene.

²⁰ Uwe Timoteo, utegaye ekyo wahabawa eribika. Usage ebinywa ebitekenga Mungu nobuhaka obukahulawa namabihi omo menge,

²¹ kusangwa abandi abakakwamabyo babiritala okwikirirya. Olukogo lubye haguma nenyu.