1 Timoteo 4 - Nouveau Testament et Psaumes en Ndandi Version 1962

Abalwa okwikirirya

¹ Nikwa eKirimu kikabuga ndeke kiti, oko migulu yenyuma abandi basyatswa okwikirirya erihulikirira ebirimu byeri tebya nerikangirirya ryesyombinga,

² busana neriteba ryaba behi emilenge yemitima yabo iyamabihisibwa,

³ abakaganaya eriherukania, abakaganisaya ebyalya ebyo Mungu ahangika, eriimibwa newasingya nabakikiriraya neriminya omwatsi we kwenene.

⁴ Kusangwa ebyosi Mungu ahangika byowene, sihari ekyangaguswa kyamimibwa newasingya;

⁵ kusangwa kyabiri higulwa nekinywa kyoMungu nerisaba.

Omukwenda gowene wa Kristo

⁶ Wamahira amategeko aya embere syabalikyetu, wasyabya omugombe gowene wa Kristo Yesu, eriugutibwa omo binywa byerikirirya nerikangirirya ryowene eryo ukwamire.

⁷ Nikwa ugane esyonganu nyityanyitya nesyabakekulu. Uyikangiriraye ebikakenga oMungu;

⁸ kusangwa eriyikangirirya ryomubiri riwite endundi nge, naho erikenga Mungu riwite endundi omo byosi, kusangwa riwite erilaga ryengebe yasesene nakandi ryengebe ikandisyasa.

⁹ eKinywa eki kisikire kitolere eriligwa ndeke.

¹⁰ Kusangwa busana nomwatsi oyu tukakola nerilwa, kusangwa twabirihira amaha wetu oko Mungu oyuriho, yo Mulamya wabandu bosi, nikwa okwilaba owabikirirye.

¹¹ Utegeke, ukangiriraye emyatsi eyi.

¹² Suleke mundu akapona obulwana bwawe, nikwa ubye olulengero busana nabikirirye omwibuga nerilendera, nomo lwanzo, nomwiki rirya, nomo bubuya.

¹³ Erihika aho nasyasira, ubye nomuhwa werisoma amasako embere syabandu, utulego, nerikangirirya.

¹⁴ Susiganiraye erihitya eriri omwisi wawe, eryo wahabawa neribuga ryabaminyereri omugulu abakula bakuhira kwebyala.

¹⁵ Ukole emibiri eyi, uyihire kuyo ndeke, abosi batoke erila ngira kukalola embere.

¹⁶ Uyitegaye nerikangirirya ryawe, usike aho, kusangwa nerikola ritya ukayilamaya haguma nabakakowa.