1 Timoteo 3 - Nouveau Testament et Psaumes en Ndandi Version 1962

Eriyisoga abalangiri na bawatikya

¹ eKinywa eki kisikire kiti: Omundu amabya akasonda omu biri gomulangiri, akayitsutsa omubiri owene.

² Nikwa omulangiri ritolere iniabya oyu tenekyangakungirwa, iba womu kali muguma, oyu tekunda, owamenge, oyu kayitondeka, omukokya wabageni, oyu wasi erikangirirya,

³ oyu tetamira, oyu telwa nikwa omolomolo, oyu tenegena, si mwanzi wesyo faranka.

⁴ Atolere eritegeka enyumba yiwe ndeke, neritegeka abana buwe eriowa nerikenga omo myatsi yosi;

⁵ kusangwa omundu atasi eritegeka enyumba yiwe, angateya ati ekanisa yoMungu kwehi?

⁶ Siabye oyu wikirirye muhyamuhya, akayihamya nerigwa omo lubanza lubi lweSatani;

⁷ kandi atolere iniasimwa ndeke nabeyihya, siatogere omwisoni nomo kitego kyaSatani.

⁸ Abawatikya nabo batolere ibabya aberiyitondeka, abate bo tulimi tubiri, sibabye bakundirya, sibayitsutse endundi nyibi;

⁹ ritolere ibahamba ekibisire kyerikirirya nomulenge mubuya womutima.

¹⁰ Batsuke erilengwako; neryo bamayikangania ko bate nekyo bangakungirwako bakole omubiri womuwatikya.

¹¹ Ritya abakali nabo babye bakayitondeka, isibabihira abandi, abatekunda, abatesiganiraya omo myatsi yosi,

¹² Abawatikya babye abiba womukali mugumamuguma, abakategeka ndeke abana babo, nabomo nyumba yabo;

¹³ kusangwa abakakola ndeke nga bawatikya bakayibanira erisimwa ndeke, nerisika rinene omwikirirya eriri omwisi wa Kristo Yesu.

¹⁴ Indi na maha werikuhikako luba, nikwa ngakusakira emyatsi eyi,

¹⁵ neryo hamabya ekikanyusaya, iwatoka eriminya ngoko mundu angalendera omo nyumba yoMungu ye kanisa yoMungu oyuriho, endui nekikasikaya omwatsi wekwenene.

¹⁶ Kandi butsira obuhaka ekibisire kyerikenga oMungu ni kinene: Oyo waminyikala omo mubiri, Aganzawa kwari mutunganene omo Kirimu, Mwalolwako na balaika, Mwakanibwa omo Bihanda, Mwikiriribwa omo kihugo, Mwabakulwa omo lukengerwa.