1 Timoteo 2 - Nouveau Testament et Psaumes en Ndandi Version 1962

Erisabira bandu bosi

¹ Neryo ekyembere webyosi, ngahatikana nyiti, erigonga gonga, nerisaba, nerisabira, neriha ewasingya biyirawe busana nabandu bosi,

² busana na bami nabakulu bosi, itwabyaho omo lyolo nobuholo, erikenga Mungu neriyitondeka omo myatsi yosi.

³ Eki ni kibuya nekyeriligwa embere syo Mungu oMulamya wetu;

⁴ oyu wanzire abandu bosi ibala mibwa nerihika okwiminya ekwenene.

⁵ Kusangwa hari Mungu muguma, kandi hari musangania muguma omukati kati koMungu na bandu, omundu oyo Kristo Yesu,

⁶ oyo wayiha mo ndongolya busana na bosi, eritulago oko omugulu atolere.

⁷ Busana neki nahirawa mo mutuli nomukwenda (Ngabuga kwenene, sindibiha), omukangirirya weBihanda omwikirirya nekwenene.

Emyatsi yabalume nabakali

⁸ Nyanzire abalume ehosi ibasaba, ibanemosumba ebyala bibuyirire isihari erihitana nerinegena.

⁹ Na ritya abakali bayisuge omo byambalo bitawite erikangabania, butsira esyo nzwiri esilukire kutse zahabu kutse esyolulu kutse ebyambalo byobuguri bunene

¹⁰ nikwa omo mibiri yowene, ngoko ritolere abakali abakakenga Mungu.

¹¹ Omukali ige iniane bukutu haguma nerikenga ryosi.

¹² Sindiliga omukali akakangirirya kutse neribya nehamuli oko balume; nikwa ayibombeke.

¹³ Kusangwa Adamu mwatsuka erihangikwa, nenyuma Eva;

¹⁴ kandi Adamu mwatatebibwa, nikwa omukali yo watebibawa yowahalaya.

¹⁵ Nikwa omukali asyalamibwa omwibuta abana, amakwamirira omwikirirya nolwanzo neribuyirire, haguma neritindayitendera.