1 Timoteo 1 - Nouveau Testament et Psaumes en Ndandi Version 1962

¹ Paulo omukwenda wa Kristo Yesu busana neritegeka ryo Mungu Mulamya wetu neryaKristo Yesu amaha wetu,

² Oko Timoteo, mwana wage kwenene omwikirirya: Olukogo, eriganyira, nobuholo, erilwa oko Mungu Ise nokoKristo Yesu Omukama wetu.

Erihana ryaPaulo

³ Ngoko nakuhatikana omugulu nabya ngaya eMakedonia, nyiti, usigale Efeso utoke erihana abandi bandu sibakangiriraye ogundi musindo werikangirirya,

⁴ kutse esyonganu kutse esyondengo syakera esitehwa ebikaleta obuhaka sibyetondeka ebyoMungu ebyerikirirya;

⁵ nikwa enduli yerihana ryetu ni lwanzo olukalwa omo mutima mubuya nomulenge owene womutima nerikirirya ryekwenene.

⁶ Abandi batswa kubyo babiritala omo buhaka butyabutya,

⁷ ibakasonda eribya abakangirirya bebihano, isibasi ebyo bakabuga kutse emyatsi eyo bakahula.

⁸ Nikwa lino tunasi ebihano binowene, omundu amakola ngoko bitolere ebihano,

⁹ eriminya eki, ebihano mobitahabwa busana nabatunganene nikwa busana nabobwanise nabateowa, busana na batekenga oMungu nabakola nabi, busana na bata buyirire na batsumi, busana nabakita abise nabonyinya, nabiti,

¹⁰ abasingiri, na balume bakatetana, abakita bandu, ababehi, nabakalahiraya na mabehi, nebindi byosi ebitaringene neri kangirirya ryakwenene,

¹¹ ngerikwama ryengulu yowene yolukengerwa loMungu womuyisa ogo nahabawa.

¹² Ngamuha ewasingya oyu wabirimba akagala busana neki, ye Kristo Yesu oMukama wetu, kusangwa abirinyiganza ngoyu tesiganiraya erimbira oko mubiri wuwe,

¹³ nomo nanagenda ngatsuma nerimwendererya nerimutsuma; nikwa monabana olukogo kusangwa nakola isinyasi isindinikirirya,

¹⁴ nolukogo lwoMukama wetu molwanyikanyako haguma nerikirirya nolwa nzo ebiri omwisi wa Kristo Yesu.

¹⁵ Eribuga eri risikire ritolere eriligwa ndeke, ko Kristo Yesu mwasa omo kihugo erilamya abakolanabi. Kandi ingye ndi mukola nabi oyu labire;

¹⁶ nikwa monabana eriganyira busana nomwatsi oyu, neryo omwisi wage ngoyu werimbere, Yesu Kristo atoke eri kangya erilindirira riwe erihikene busana nolulengo kwabo abasyamwikirirya eribana engebe yerikota.

¹⁷ Nikwa oko Mwami wemigulu, oyu tehola, oyu telolawako, oMungu muguma iyowene, habye erisikya nolukengerwa busana na kera na kera. Bibye bitya.

¹⁸ Eritegeka eri ngakuha, uwe Timoteo, mugala wage, ngeribuga ryabaminyereri abakwahula, erihanwa nabo iwalwa amalwa mabuya,

¹⁹ iniuhambire erikirirya nomulenge owene womutima. Busana nerigana omulenge womutima, abandi babiriherya erikirirya ryabo ngobwato obusatikire,

²⁰ abakubo ni Himeneo na Alesanduro, abo naha eSatani bige nyiti baleka eritsuma Mungu.