1 Petero 3 - Nouveau Testament et Psaumes en Ndandi Version 1962

Erihana abakali

¹ Ritya inywe bakali, mowe abibanywe, neryo abandi, nomo batiowa eKinywa, babanike omwiliga, isihari kinywa, omo mibere yabakali babo,

² omugulu bakalebaya emitsye yenyu migenge mibuyabuya.

³ Eriyisuga ryenyu siribye ryeyihya eryerihunga esyonzwiri, neriyisuga omo zahabu, kutse eri ambala esyongimba,

⁴ nikwa ribye omundu oyu bisamire womutima, kyekirimu kitehonda kihehere kyobuholo, ni kyo buguri bunene embere syoMungu.

⁵ Kusangwa omo musindo oyu kera abakali babuyirire abahira amaha oko Mungu moba yisuga batya neriowa abibabo,

⁶ ngoko Sera owa Abrahamu, nerimwahula mo mukama. Nenyu lino muri bana buwe mwamakola ndeke kandi simuleke ekindu eribubahirirya.

Erihana abalume

⁷ Nenyu ritya abibabo, mwikale na bakali benyu erikangania amenge omobyo mukakolerabo, imukasikaya omukali ngoyu tenamaka manene, kusangwa muri abari bomwandu wolukogo lwengebe, erisaba ryenyu sirikakiribawe.

⁸ Eribuga, inywe bosi, mubye nekirimu kiguma, neriganyira, neribya nolwanzo lwabagala babo, nomutima ahehere, nobu ringikania bweriyikehya.

⁹ Simukisaye ebibi busana nebibi kutse eritsuma busana neritsuma; nikwa kumbe eritsumula, kusangwa mwabirikirawa busana nebi, imwatoka eribana omuyisa.

¹⁰ Kusangwa ati, Oyu wanzire engebe, Nerilola oko biro byowene, Akakiraye olulimi luwe oko bibi, Neminywa yiwe sibuge ebyeriteba;

¹¹ Ahutatire ebibi akole ebyowene, Asonde obuholo akwamebo ndeke.

¹² Kusangwa ameso woMukama ari oko batunganene, Namatwi wuwe ari oko byo bakasaba. Nikwa ekitsure kyoMukama kiri oko bakakola ebibi.

¹³ Nikwa ni ndi wasyabayira nabi mwamabya nomuhwa werikola ebibuya kwehi?

¹⁴ Nikwa mwamagalwa busana neritunganene, mwasyabya nomuyisa. Simubahebo, kandi simuhahukaye omutima,

¹⁵ nikwa omo mitima yenyu mukenge Kristo ngoMukama. Imunasikire endambi yosi erisubirya oburi mundu oyu kababulaya busana namaha awari omwisi wenyu, nikwa mukolekyo nobolo nerikenga;

¹⁶ mubye nomu lenge womutima owate nolubanza, neryo, omugulu bakabane gulira, abakatsuma emibere yenyu mibuya omwisi wa Kristo bitawe esisoni.

¹⁷ Kusangwa ryowene ndeke eriagalwa busana nerikola ebibuya, ryamabya ni sonda ryoMungu, kwilaba eriagalwa busana nerikola nabi.

¹⁸ Kusangwa Kristo mwahola busana nebibi engendo nguma busana nebyosi, oyu tunganene busana nabatatunganene, iniatoka erituleta oko Mungu, abiitwa omo mubiri nikwa mwayirwa mo oyuriho omo kirimu;

¹⁹ mukyo mwagenda eriyakangirirya ebirimu omo nyumba yomuliki,

²⁰ abatowa erimbere, omugulu erilinda ryoMungu ryalinda oko biro byaNoa, omugulu obwato bukabatswa, mubo mohalama bake, banabandu munani, abalamibawa omo magetsi.

²¹ Nago ni kisosekanio kyeribatisya, eribalamya lino, butsira erilusya eriku ryoko mubiri nikwa ni lagana busana nomulenge owene womutima, oko Mungu busana nerilubuka ryaYesu Kristo,

²² Oyuri oko byala byamali byoMungu iniabiriya elubula, nabalaika nabehamuli nabamaka ibakamowa.