1 AbanyaKorinto 9 - Nouveau Testament et Psaumes en Ndandi Version 1962

Erihembwa ryomutuli wengulu yowene

¹ Sindiyigenderaya kwehi? Sindi mukwenda kwehi? Sindi talola oko Yesu oMukama wetu kwehi? Nenyu simuri omubiri wage omwisi woMukama kwehi?

² Nde mukwenda oko bandi, nikwa kwinywe indi ye; kusangwa inywe muri kiminyikalo kyobukwenda bwage omwisi woMukama.

³ Eriyigana ryage oko bakanyibuririraya ryeri.

⁴ Situri nehamuli oko karyo ketu neripulya kwehi?

⁵ Situri nehamuli erigenda na mwali wetu ngabandi bakwenda nabagala babo Mukama na Kefa kwehi?

⁶ Kutse ingye na Barunaba itwe bene tute nehamuli yerileka eriyikumbirira kwehi?

⁷ Nindi akakola ngamusoda iniaswayirihira kwehi? Nindi akalima eririma ryebinyu iniatarya oko biguma byaryo kwehi? Nindi akarisaya ekihangulo iniatimya oko masabu wakyo kwehi?

⁸ Ngabuga eki oko hamuli yomundu kwehi? Nebihano sibyebuga bitya kwehi?

⁹ Kusangwa kisakire omo bihano byaMusa kiti, Subohe obuno bwende nume omugulu ikahumba engano. Ko ni mwatsi wesyonde Mungu akaganiraya kwehi?

¹⁰ Siaribuga busana nomwatsi wetu kundu kwehi? Kyasakawa busana netu, kusangwa omurimi atolere eririma omo maha nomugesi atolere erigesa omo maha werihabwa obugesi.

¹¹ Twamabiba ebyowene byekirimu omukati-kati kenyu, rikalire erigesa oko ndundi yebindu byenyu kwehi?

¹² Abandi bamagabirwa ehamuli yebindu byenyu, netu situlengirebo kwehi? Nikwa, sitwetatsomana ehamuli eyi, nikwa tukasika omo byosi busana neribuga tuti situlete ekyangakakirya engulu yowene ya Kristo.

¹³ Simwasi kwabo bakakola omubiri wehekalu bakarya okobyo mohekalu, nabakakola omubiri wehe rirerera bakagabirawa oko bindu ebiriaherawa kwehi?

¹⁴ Ko biri bitya, OMukama abiritegeka abakatula engulu yowene babane ebyangalemberabo.

¹⁵ Sinditatsomana esyohamuli esi, kandi sindisaka ebi busana neribuga nyiti banyikolere batya. Kusangwa kitsiga inahola kwilaba omundu erinyikaga eriyipipa eri.

¹⁶ Kusangwa nama tula engulu yowene, eryo siririmba omwatsi weriyipipa. Kusangwa ngwite ekinyihambire eritula engulu yowene. Obu lige kwingye namatindatula engulu yowene!

¹⁷ Kusangwa namakola eki omwisonda ryage, nasyahembwa; nikwa namakola ndanzire, nabirihabwa erikolesibwa omubiri.

¹⁸ Neryo olu hembo lwage niki kwehi? Lolu: namatula engulu yowene inayirayo butsira eririhwa, isinditsomana ehamuli yage omo ngulu yowene.

Omusindo werilaniya abandi

¹⁹ Kusangwa nomo nangabya iningayigenderaya oko bosi, nabiriyiyira mo mukobe wabosi, inatoka eribana bangi.

²⁰ Oko baYuda nabiribya ngomuYuda, busana neribuga nyiti nyibana abaYuda; oko bari oko bihano ngabya ngabari oko bihano— nikwa ingyowene sindi oko bihano—busana neribana abari oko bihano.

²¹ Oko bate oko bihano monabya ngo oyute oko bihano—nikwa oko Mungu sindi oyute oko bihano nikwa oko bihano byaKristo—inabana abate oko bihano.

²² Oko bolo bolo monabya ngabolobolo, inabana abolobolo. Nabiribya omo byosi oko bandu bosi, inatoka omo misindo yosi erilamya abandi.

²³ Ngakola ebi byosi busana nengulu yowene, inatoka eribana erigabo muyo.

Matangwa

²⁴ Simwasi ko bosi bakasiyirana okwitibita, nikwa omuguma musa akahembawa kwehi? Mutibite mutya muhembawe.

²⁵ Oburi mundu oyu kalenga abandi akayitegaya omo myatsi yosi. Ebo bakakola batya busana neribana embita eyikasambu kala, nikwa itwe eyitesambukala.

²⁶ Nikwa sinditibita buyira, sindiswiraya ngoyu kaswiraya erihunga;

²⁷ nikwa ngaswiraya omubiri wage inakindago, neryo namabikangirirya abandi sinyibye ngoyu kaganawa.