1 AbanyaKorinto 7 - Nouveau Testament et Psaumes en Ndandi Version 1962

Omundu nomukaliwe

¹ Nikwa busana nemyatsi mwanyisakira. Ryowene kumbe omundu isyatula oko mukali.

² Nikwa busana nerilengwako ryamaragane, oburi mundu abye nomukali wuwe no buri mukali abye niba wuwe.

³ Niba ahe mukaliwe ebimutolere, nomukali naye iniakola atya iba wuwe.

⁴ Kusangwa omukali siawite ehamuli oko mubiri wuwe, nikwa nina iba wuwe; na ritya iba wuwe siawite ehamuli oko mubiri wuwe nina muka liwe.

⁵ Simwimane mutarialagana akatambi kake, imwatoka eriyihira okwisaba; nikwa imwaswahindana kandi, Satani siabalengeko busana neritindasika.

⁶ Ngabuga eki busana neribahana butsira eribategeka.

⁷ Ngasonda nyiti kumbe abosi babye ngangye. Nikwa oburi mundu awite erihitya riwe iyowenewene erilwa oko Mungu, muguma musindo wuwe nogundi, gundi musindo.

Erihikya neritindahikya

⁸ Ngabuga oko batahikenie na bakwakali nyiti babye ngangye butsira erihikania.

⁹ Nikwa bamataluka erisika ibahikania. Kusangwa ryowene erihikania kwilaba eriaka omo gumbu.

¹⁰ Ngategeka abahikenie, singye nikwa Mukama, omukali siangayilusya kwiba wuwe

¹¹ (nikwa amayilusya kwiye, siaswehikibawa kutse aswesangana niba wuwe) —nomulume siahige omukali wuwe.

¹² Nikwa abandi ingye ngabwirabo butsira Mukama, omu gala wetu amabya awite omukali oyu tikirirye, amaliga eriikala naye, siamuhige.

¹³ Omukali amabya awite omulume utikirirye, naye akaliga eriikala naye, siamugane.

¹⁴ Kusangwa omulume utikirirye akahigulawa nomukaliwe, nomukali utikirirye aka higulawa na iba wuwe. Bitebya bitya abana benyu isibowene, nikwa lino ni babuyirire.

¹⁵ Nikwa oyu tikirirye amasonda eriyilusya, iniabya atya; omo mwatsi ngoyo omugala wetu kutse omwali wetu siabohire. Kusangwa Mungu abiritubirikira mo buholo.

¹⁶ Omukali, wasi uti ngawasyalamya ibawe kwehi? Mulume, nawe wasi uti ngawasyalamya mukali wawe kwehi?

¹⁷ Tse, ngoko Mukama abirigabira oburi mundu alendere atya ngoko Mungu abirimubirikira. Ko ngategeka nyitya omo syokanisa syosi.

¹⁸ Habya omundu wabya iniabwene omugulu abirikirawa kwehi? Siasonda erilusya ebiminyikalo byeribana. Habya mundu isiabwene oko mugulu abirikirawa kwehi? Siasondaye eribana.

¹⁹ Kusangwa eribana si kindu neritinda bana si kindu rye neribika ebihano byoMungu.

²⁰ Oburi mundu abye mo musindo owabyamo omugulu abirikirawa.

²¹ Wabya omukobe omugulu wabirikirawa kwehi? Si mwatsi. Wamatoka eribana eriyigenderya, ukwamirire ekyo.

²² Ku sangwa oyo wabirikirawa omwisi woMukama inina mukobe, akayigenderaya iniamabitongolibwa noMukama. Ritya oyo wabya iniakayigenderaya omugulu abirikirawa ni mukobe wa Kristo.

²³ Mwagulawa nobuguri; simubye bakobe babandu.

²⁴ Ritya, bagala betu, oburi mundu ikale noMungu aho abya omugulu abirikirawa.

Abambesa

²⁵ Nikwa busana nabatahikibwe, singwite eritegeka ryo Mukama, nikwa ngabuga ngoyo atolere busana neriganyira ryoMukama.

²⁶ Ngaganiraya nyiti, busana nobulige obure hakuhi omundu ikale ngoko ane.

²⁷ Wabiriboherwa oko mukali kwehi? Susonde eriboholwa. Ukayigenderaya butsira mukali kwehi? Susondaye eriherukya.

²⁸ Nikwa wamaherukya isutakola kibi, nomumbesa amaheruka isiatakola kibi. Nikwa abakaherukanaya basyabana amalige we kihugo, ngasonda eri babalya ayo.

²⁹ Balikyetu ngabuga nyiti, omugulu ahirawa abiribya mukuhi; eritsuka lino, abawite abakali babye nga batawitebo,

³⁰ nabakalira babye ngabatelira, nabakatsema babye ngabatatsemire, nabakagula babye nga batawite ebindu,

³¹ nabakakola mubiri we kihugo babye ngasibekola. Kusangwa musindo we kihugo kino akalaba.

³² Nyanzire imwabya butsira amaganiryo. Omundu utahi kirye ari namaganiryo wemyatsi yoMukama, ngoko angatse mesya oMukama;

³³ nikwa omundu oyu hikirye akabya na maganiryo wemyatsi ye kihugo ngoko angatsemesya omukali wuwe,

³⁴ nerisonda riwe rigabene. Omukali utahikibwe nomumbesa utahikibwe bari namaganiryo busana nemyatsi yoMukama, ngoko bangabya babuyirire omo mubiri nomo kirimu; nikwa omukali uhikibwe ari namaganiryo busana nemyatsi ye kihugo ngoko angatsemesya iba wuwe.

³⁵ Ngabuga eki busana neribawatikya butsira eribakakirya, nikwa eriuwania omubiri wenyu gondekendeke nerisikya eriyitsinga ryenyu busana noMukama eritagabene.

³⁶ Omundu amaganirya nga siariikala ndeke busana noyo asimolaya, amabya ane kikumi, kyamabya kitolere akole ngoko anzire: si kibi baherukanaye.

³⁷ Nikwa amabya anasikire omo mutima, isyahatikanawa nikwa abirisika omwisonda riwe iniabiriminya omo mutima wuwe ko wakandibika oyo asimo laya butsira eriheruka, asyakola ndeke.

³⁸ Ritya oyo kaheru kaya oyo asimolaya naye akakola ndeke; noyu kayikakiraya okwiherukya iniakakola ndeke okwilaba.

³⁹ Omukali abohire ukwiba wuwe omugulu akiriho. Nikwa iba wuwe amahola, akayigenderaya neriswahikibwa noyo anzire, omwisi woMukama musa.

⁴⁰ Ngo kwitswera ryage ari nobu tseme okwilaba amikala ngoko ane. Nage ngaganiraya nyiti ngwite eKirimu kyoMungu.