1 AbanyaKorinto 6 - Nouveau Testament et Psaumes en Ndandi Version 1962

Eritsongera mulikyetu

¹ Omugulu muguma kwinywe ari nomwatsi na mulikyabo akalenga erimutsongera embere wabatatunganene isiarimu tsongera embere wabatunganene kwehi?

² Simwasi kwa babuyirire basyatswera e kihugo kwehi? Mwamabya ininywe mukandisyatswera e kihugo, simuwite amenge weritswera esyo mbanza ngengenge kwehi?

³ Simwasi ko twasyatswera abalaika kwehi? Kwilaba aho eribya aberitwa esyombanza syengebe eyi!

⁴ Neryo mwamabya muri nesyombanza ngesi busana naki simwihirasyo embere wabakebake bekanisa kwehi?

⁵ Ngabuga eki eribita esisoni. Niki, sihari mundu wamenge omukati-kati kenyu oyo wangatswera bagala babo kwehi?

⁶ Nikwa mulikyabo akatsongera ogundi mulikyabo embere wabatikirirye kwehi?

⁷ Eribya nesyombanza omukati-kati kenyu ni kindwa. Busana naki simweyisoga eriagalibwa kwehi? Busana naki simweyisoga erihungwa kwehi?

⁸ Nikwa inywe mukayirana nabi nerisagulana, kandi abo mukayira mutya ibana bagala benyu.

⁹ Simwasi ko batatunganene sibendisyarya obwami bwo Mungu mo mwandu kwehi? Simutebibawe; abamaragane kutse nabasabi besisumba, kutse abasingiri, kutse abalume abakatetana,

¹⁰ kutse abibi, kutse nabahungi, kutse abaku ndirya, kutse abakatsuma, kutse abanyeyi sibendisyarya obwami bwoMungu mo mwandu.

¹¹ Abandi bakwinywe babya ngabo. Nikwa mwabirieribwa, mwabirihigulwa, mwayirawa mo batu nganene omo rina rioMukama wetu Yesu Kristo nomo Kirimu kyoMungu wetu.

Emibiri yetu ni bitsuko bya Kristo

¹² Indi na hamuli yerikola emyatsi yosi, nikwa emyatsi yosi siwite endundi. Indi na hamuli yerikola emyatsi yosi, nikwa sindisyayirwa mo mukobe wekindu nekiguma.

¹³ Ebyalya biri busana nenda, nenda busana nebyalya—oMungu asyaherya ebibiri byosi. Omubiri siahirawa busana namaragane, nikwa busana noMukama, noMukama busana nomubiri.

¹⁴ Kandi Mungu mwalubukya oMukama, netu asyatulubukya omo kagala kuwe.

¹⁵ Simwasi ko mibiri yenyu ni bitsuko bya Kristo kwehi? Nasyimya ebitsuko byaKristo neriyirabyo mo bitsuko byomusingiri wobukali kwehi? Eyihi, na Kera!

¹⁶ Simwasi koyu kayihira haguma nomukali wamaragane kwari mubiri muguma naye kwehi? Kusangwa kisakire kiti, Ababiri basyabya mubiri muguma.

¹⁷ Nikwa oyu kahirawa haguma noMukama akabya ekirimu kiguma naye.

¹⁸ Musage amaragane. Ebindi ebibi byosi mundu akakola biri oko mubiri kwendata; nikwa omundu wamaragane iniakakola ebibi ebikatsandaya mubiri wuwe.

¹⁹ Simwasi ko mibiri yenyu ni hekalu yeKirimu Kibuyirire ekire mwisi wenyu, ekyo muwite ekikalwa oko Mungu kwehi? Simuri benyu;

²⁰ mwagulawa nobuguri. Ritya mukenge Mungu omo mibiri yenyu.