1 AbanyaKorinto 5 - Nouveau Testament et Psaumes en Ndandi Version 1962

Erilusya omusingiri

¹ Ehosihosi kyabiriogubwa ko hari erisingira omukati-kati kenyu, eryomusindo owatebanika kutse omukati-kati ke Bihanda; omundu eribya nomukali wa tata wuwe.

² Nenyu mukayitendera! Kumbe simwangarira kwehi? Oyu wabirikola eki alusibawe omukati-kati kenyu.

³ Kusangwa nomo nangabya isinyiri eyo ewenyu omo mubiri nyineyo omo kirimu, neryo namabya nyineyo, nabiritswera

⁴ omundu oyo wakola ekingaha omo rina rya Mukama Yesu. Nenyu mwabere mwamabihindana, nekirimu kyage ikineyo, haguma namaka woMukama wetu Yesu,

⁵ muhe mundu oyu oko Satani busana neriherya omubiri, ekirimu kiwe kilamibawe oko kiro kyoMukama Yesu.

⁶ Eriyihalamba ryenyu siryowene. Simwasi ko ehamira enge ikahamaya obundu bosi kwehi?

⁷ Muyeraye erilusya ehamira ya kera imwatoka eribye obundu buhya, ngoko muri kwenene butsira kihamya. Kusangwa Kristo, ekyana kyembuli kyetu kya Pasaka, abiriherwa.

⁸ Neryo netu tuyire erirya eryo, butsira kihamya kya kera, ekihamya kyobuyigo nebibi, nikwa nobundu bubuya nobwekwenene obute mo kihamya.

⁹ Monabasakira omo barua yage nyiti simusibe haguma nabasingiri;

¹⁰ sindibuga nyiti simusibe nabasingiri be kihugo kino, kutse bahungi, kutse abanyeyi, kutse abasabi besisumba, bite bitya ritolere imwalwa omo kihugo.

¹¹ Nikwa nabasakira nyiti simusibe nemundu oyu kahulawa mo mulikyetu amabya ari musingiri kutse muhungi, kutse musabi wesisumba, kutse omutsumi, kutse omukundirya, kutse omunyeyi—simurire haguma nomundu ngoyo.

¹² Kusangwa ndi na mwatsi wahi eritswera abari eyihya kwehi? Nenyu simuritswera abari mwisi wekanisa kwehi?

¹³ Mungu akatswera abari eyihya. Muhige omundu mubi oyo mukatikati kenyu.