1 AbanyaKorinto 4 - Nouveau Testament et Psaumes en Ndandi Version 1962

Ababiki

¹ Ekyo bangatuminyirako kyeki, ko turi bagombe baKristo na babiki bebisire byoMungu.

² Kandi ekikabulibawa oko babiki ni banika ko batesiganiraya,

³ Nikwa kwingye ni mwatsi muke kutsibu eritswerwa nenyu kutse abo mwibugiro ryabandu. Ega nage sindiyitswera.

⁴ Sinyiyasi kolubanza, nikwa sindi singana busana nekyo. Ni Mukama yukanyitswera.

⁵ Simu tswere omwatsi embere yomugulu wago, embere yerihika ryoMukama, oyu wasyahulukya omo kyakakala emyatsi eyabi sawa omo mwirimya kandi asyakangania esyombita syomutima. Oko mugulu oyo oburi mundu asyangirira erisimwa riwe erikalwa oko Mungu.

Eriyikehya

⁶ Nabirihira ebyosi ebi kwingye na Apolo busana neribawa tikya, bagala betu, imwatoka eriiga okwitwe mulendere nga masako, sihabye muguma wukwinywe oyu kayipipa busana nerianza muguma nerisombola ogundi.

⁷ Kusangwa ni ndi ukakulolako nguri gundi musindo kwehi? Nawe uri na kyahi ekyo utangirira kwehi? Wamabya waryangirirakyo, busana naki ukayipipa ngasiwahabawakyo kwehi?

⁸ Mwabiriuguta! Mwabiribya abebindu! Tuteho mwabiri bya abami eritabala! Nakandi kumbe imwatabala, itwatoka eritabala haguma nenyu!

⁹ Kusangwa ngaganiraya ngo Mungu abirituhira itwe abakwenda nga benyuma ko bosi, nga bandu babiritswerwa okwihola; kusangwa twabiribya ekyerisamarirwa ne kihugo noko balaika noko bandu.

¹⁰ Turi bikiru busana na Kristo, nenyu muri bemenge omwisi wa Kristo. Itwe turi bolobolo, nikwa inywe muri bamaka. Inywe mukasikibawa, nikwa itwe itwaponwa.

¹¹ Nerihika noko ndambi ya sesene tukakwa enzala nenyota, tukambala nabi itukahunzawa isitu wite aheriikala;

¹² tukakola omubiri, itunemokola omubiri nebyala byetu: twamatsumwa, tukatsumula; omugulu tuke ndereribwa, tukasika;

¹³ omugulu bakatuhandikirira mabihi tukasonda erisangana nabo; twabiribya, na lino tune nga kyabu kye kihugo, ekyabu kyemyatsi yosi.

¹⁴ Sindisaka ebi eribita esisoni, nikwa eribahana nga bana bage banze.

¹⁵ Kusangwa nomo mwangabya nabasondoli abatebangatoka eriganzwa omwisi wa Kristo, simuwite abotata bangi. Kusangwa omwisi wa Kristo Yesu monabya tata wenyu busana nengulu yowene.

¹⁶ Ngabago, nyiti, mubye omo mibere yage.

¹⁷ Busana nekyo monabatumira Timoteo, omwana wage mwanze noyu tesiganaya omwisi woMukama, oyo wasyabibukya mibere yage omwisi wa Kristo, ngoko nga kangiriraya ehosihosi omo buri kanisa.

¹⁸ Abandi babiriyite ndera nga sindiendisyahika eyo muri.

¹⁹ Nikwa ngandisyahika eyo luba, OMukama amanza, nasyaminya butsira eribuga ryabandu abakayitendera nikwa akagala kabo.

²⁰ Kusangwa obwami bwoMungu siburibyaho omwibuga, nikwa omo kagala.

²¹ Mukasondaki kwehi? Nyibahikeko nomuti weriswirya, kutse nolwanzo omu kirimo kihehere kwehi?