1 AbanyaKorinto 15 - Nouveau Testament et Psaumes en Ndandi Version 1962

Erihola nerilubuka ryaKristo

¹ Nikwa abagala betu ngabibukaya, engulu yowene nabaka ngiriraya, eyo mwangirira, eyo muhangenemo,

² busana nayo mwalamibawa, mwamasika omo myatsi eyo nabakangiri raya mwamabya mutariikiriraya buyira.

³ Kusangwa nabaha omwatsi munene ogo nage nangirira, ko Kristo mwahola busana nebibi byetu ngoko amasako aka tulago,

⁴ ngoko atabawa, ngoko alubukibawa omo kiro kyebisatu ngoko amasako akatulago,

⁵ ngoko ahulukira Kefa, nenyuma kwaho okwikumi na babiri.

⁶ Enyuma kwaho mwa hulukira uku bagala betu kwilaba amagana atano haguma, ukwabo hakuhi nabosi bakineho na lino, nikwa abandi babiri gotsera.

⁷ Enyuma kwaho mwahulukira Yakobo, nakandi oko bakwenda bosi.

⁸ Enyuma wabosi, mwanyihulukira ngo mwana oyu riabutawa mo bulere.

⁹ Kusangwa indi mukemuke oko bandi bakwenda bosi, isinyitolere eriahulwa mo mukwenda, kusangwa monendererya ekanisa yoMungu.

¹⁰ Nikwa busana nolukogo loMungu nyiri ngoko nyiri, nolukogo luwe busana nage isilwabya buyira. Nibya, monakola ndeke kwilaba bosi, nikwa butsira ingye, lo lukogo loMungu lwabya haguma nage.

¹¹ Nomo ngabya ingye kutse ebo, ritya motwakangirirya nenyu momwikirirya.

Hate erilubuka erikirirya ryetu ini buyira

¹² Nikwa bamakangirirya bati Kristo abirilubukibwa omo baholi, abandi bakabuga bati sihari erilubuka omo baholi bati kwehi?

¹³ Nikwa hamabya hate erilubuka omo baholi, neryo Kristo isiaritalubukibwa;

¹⁴ nakandi Kristo amabya isiarita lubukibwa eritulago ryetu ni buyira nerikirirya ryenyu ini buyira.

¹⁵ Netu itwabiribanika nga babihi bomwatsi wo Mungu, kusangwa tukatulago busana noMungu tuti mwalu bukya Kristo, oyo atalubukaya ryamabya rine kwenene abaholi bamabya isibelubukibawa.

¹⁶ Kusangwa ryamabya abaholi batelubukibawa, Kristo naye isiaritalubukibwa.

¹⁷ Nikwa Kristo amabya ataritalubukibwa, erikirirya ryenyu ni busa imukine omo bibi byenyu.

¹⁸ Nibya na babirihola omwisi wa Kristo ibabirihera.

¹⁹ Kumbe turi namaha omwisi wa Kristo, omo ngebe yeno nyisa, nga turi bandu abangakubwa obulige kwilaba bosi.

Kristo mwalubuka kundu

²⁰ Nikwa kwenene Kristo abirilubukibwa omo baholi, iye ni biguma byerimbere oko babirigotsera.

²¹ Kusangwa ngoko oluholo lwasa busana nomundu, nerilubuka ryabaholi naryo ryabirihika busana nomundu.

²² Kusangwa ngoko omwisi wAdamu abosi bakahola, ritya omwisi wa Kristo abosi basya yirwa mo bariho.

²³ Nikwa oburi mundu omo mwanya wuwe: Kristo ni biguma byerimbere, nibya abari baKristo okwihika riwe.

²⁴ Neryo enduli iyahika, omugulu asyaha obwami oko Mungu ye Tata amabiherya eritabala ryosi nehamuli yosi nakagala kosi.

²⁵ Kusangwa atolere iniasinga erihika ahasya hirira esyonzigu siwe syosi omwisi webisandu biwe.

²⁶ Enzigu yenyuma eyasyaheribwa lo luholo.

²⁷ Kusangwa Iye abirihira emyatsi yosi erimowa omwisi webisandu biwe. Nikwa omugulu kikabuga kiti, Emyatsi yosi yabirihirwa erimowa omwisi wuwe, kiminyikere iye kwateswaganzirawa oko myatsi ikahirawa omwisi wuwe.

²⁸ Omugulu emyatsi yosi yamabihirwa eri mowa, nibya oMugala naye asyahirwa eriowa oyo wahira emyatsi yosi omwisi wuwe, neryo Mungu iniatoka eribya ebyosi oko buri mundu.

²⁹ Bitebya bitya abakabatisibawa busana nabaholi basyabya bati kwehi? Abaholi bamatindalubukibwa na hake busana naki abandu bakabatisibawa omo mwanya wabo kwehi?

³⁰ Busana naki nage indi omwekyo kyanganyita endambi yosi kwehi?

³¹ Abagala betu, ngagana neriyihalamba busana nenyu omwisi wa Kristo Yesu oMukama wetu, ngahola oburi kiro!

³² Mobalwa nesyonyama Efeso, namabuga ngabandu namabana endundi yahi kwehi? Abaholi bamabya batindasyalubukibwa, Turye tupulaye kusangwa omungyakya itwahola.

³³ Simute bibawe: Eritamba na bebibi omo kisendo rikaheraya emitse yowene.

³⁴ Mubuke omo buringikania buwene simuswekola ebibi. Kusangwa abandi sibari neriminya ryoMungu. Nga buga eki eribita esisoni.

Omubiri zoerilubuka

³⁵ Nikwa omundu asyabulya ati, Abaholi basyalubukibwa bati kwehi? Basyabya nomubiri ari ati kwehi?

³⁶ Uwemundu mukiru! Ekyo ukabiba sikyebana eribyaho kitariatsuka erihola.

³⁷ Ekyo ukabiba sigo mubiri owakandisyabyaho, nikwa ukabiba embuto yoyene, nge ngano kutse nge bindi byalya.

³⁸ Nikwa Mungu akahayo omubiri owakayisoga, noko buri musindo wembuto omubiri wayo.

³⁹ Kusangwa emibiri yosi si musindo muguma, owabandu ni musindo muguma, nowe syonyama ni gundi, nowesyonyonyu ni gundi, nowesiswi esiri omo ngetsi ni gundi.

⁴⁰ Hari mibiri yelubula nemibiri yeki hugo; nikwa olukengerwa lweyelubula ni luguma, nolukengerwa lweye kihugo ni lundi.

⁴¹ Hari erihenia riguma ryeryuba, nerindi ryomukera, nerindi ryesyongununu; kusangwa engu nunu nguma siringirirene neyindi ngununu omwihenia.

⁴² Ko riri ritya nerilubuka ryabaholi. Omubiri owakatabawa akahonda, nowakalubukibawa siarihonda.

⁴³ Akatabawa ini aponirwe, akalubukibawa nolukengerwa. Akatabawa mo molo molo, akalubukibawa omo maka.

⁴⁴ Akatabawa omubiri womundu, akalubukibawa omubiri wekirimu. Hamabya hari omubiri womundu ihari nowekirimu.

⁴⁵ Ngoko kisakire kiti, Omundu werimbere Adamu mwabya ekirimu ekyengebe; na Adamu werinyuma mwabya ekirimu kyeriha engebe.

⁴⁶ Nikwa ekyekirimu mokitabya kyerimbere nikwa ekyomubiri, nenyuma kwaho ekyekirimu.

⁴⁷ Omundu werimbere alwa oko kitaka, ni mundu wolututu; omundu wakabiri ni welubula.

⁴⁸ Ngoko omundu wolututu abya ko bari batya abolututu; nomundu welubula ngoko ari nabelubula ko bari batya.

⁴⁹ Ngoko twabiriheka ekisosekanio kyomundu wolututu, ko tukandisya heka tutya ekisosekanio kyomundu welubula.

⁵⁰ Abagala betu, ngababwira eki: omubiri nomusasi sibyetoka erihabwaomwandu wobwami bwoMungu, kutse ebikahonda sibyehabawa omwandu webitehonda.

Erikinda

⁵¹ Lebaya! Ngababwira ebibisamire. Itwe bosi sitwendi syagotsera, nikwa itwe twasyahindukibwa,

⁵² omo katambi kake, okwikohya ryeriso, oko ngubi yenyumanyuma. Ku sangwa engubi yasyabuga, nabaholi basyalubukibwa butsira erihonda netu twasyahindukibwa.

⁵³ Kusangwa omubiri oyu owakahonda atolere eriambala owatehonda, kandi owakahola atolere eriambala eritindahola.

⁵⁴ Omugulu owakahonda asyabya amabiambala owatehonda, nowakahola asyabya ama biambala eritindahola, oko mugulu oyo hasyabererera ekisakire kiti: Oluholo ilwamamerwa omwikinda.

⁵⁵ Uwe luholo, erikinda ryawe riri hayi kwehi? We luholo, eritsimita ryawe ririhi kwehi?

⁵⁶ Eritsimita ryoluholo bye bibi, na kagala kebibi bye bihano.

⁵⁷ Nikwa ewasingya oko Mungu, oyu katuha erikinda busana noMukama wetu Yesu Kristo.

⁵⁸ Neryo, abagala betu banze, musike, simusegasegane, ebiro byosi mulabe kwaho erikola omubiri woMukama, imunasi omubiri wenyu omwisi woMukama siwa buyira.