1 AbanyaKorinto 14 - Nouveau Testament et Psaumes en Ndandi Version 1962

Emibuge neriminyerera

¹ Muyire olwanzo mo mwatsi ogo mukakwamirira, muso ndaye nomuhwa erihitya ryekirimu, kwilaba imwatoka eritulago ndeke.

² Kusangwa oyu kabuga omo gundi mubuge siaribuga na bandu nikwa noMungu; kusangwa sihari mundu oyu kamowa, nikwa akabuga ebibisire omo Kirimu.

³ Kandi, oyu katulago akabuga na bandu busana nerihimbabo nerisikyabo nerisibikya.

⁴ Oyu kabuga omo gundi mubuge akayihimba, nikwa oyu katulago akahimba ekanisa.

⁵ Nikwa nyanzire mwe bosi mubuge omo yindi mibuge, nikwa kwilaba aho nyanzire imwatulago. Oyu katulago ni mukulu kwilaba oyu kabuga omo yindi mibuge, omundu amatindaswabindulago busana neri himba ekanisa.

⁶ Nikwa, bagala betu, namabahikako ngabuga omo yindi mibuge, nasyabaha endundi yahi namatindabaletera eriminyi kalya kutse eriminya kutse eritulago kutse erikangirirya kwehi?

⁷ Ebitawite engebe nikwa biwite emirenge, nge nyamulera kutse enanga byamabya bite nomulenge aminyikere, basya minya bati ekikabuhawa kutse ekikawatawa kwehi?

⁸ Nengubi yamatindabuga nomulenge ndeke, nindi wasyasika busana namalwa kwehi?

⁹ Ritya busana nenyu; mwamabuga omo gundi mubuge owataminyikere, basyaminya bati ekiriabugawa kwehi? Kusangwa imukabuga omo kyanya buyira.

¹⁰ Kwe nene hari emibuge mingi muna kihugo isihari owatawite omusindo wago;

¹¹ nikwa namatindaminya omusindo wago nasyabya ngoyo walwe hali okoyu kabuga, noyu kabuga iniabya ngoyu walwe hali ukwingye.

¹² Nenyu ko muri mutya; kusangwa mwanzire eriminyikala ryeKirimu, musonda-sondaye okwilaba erihimba ekanisa.

¹³ Neryo oyu kabuga omo gundi mubuge angasaba busana namaka weribindulago.

¹⁴ Kusangwa namasaba omo gundi mubuge, ekirimu kyage kikasaba nikwa oburingikania bwage bukabya butsira eributa ebiguma.

¹⁵ Ngandikolaki kwehi? Ngandisaba omo kirimu kandi ngandisaba noburingikania nibya; ngandisimba omo kirimu kandi ngandisimba omo buringikania nibya.

¹⁶ Bitebitya, mwamasima nekirimu, omundu oyuri aho atasi asyasima ewasingya yawe yati, amabuga ati bibye bitya atasi ekyo ukabuga kwehi?

¹⁷ Kusangwa wanganaha ewasingya yo ndeke, nikwa ogundi mundu oyo isitamuwatikya.

¹⁸ Ngaha Mungu ewasingya kusangwa nyibalengeri mwe bosi eribuga omo yindi mibuge;

¹⁹ nikwa omo kanisa kumbe namabuga ebinywa bitano noburingikania bwage busana nerikangirirya abandi kwilaba eribuga ebinywa maelfu ikumi omo gundi mubuge.

²⁰ Abagala betu, simubye bana omo buringikania bwenyu; mubye bana oko kibi, nikwa omo buringikania mubye bakulu.

²¹ Kisakire omo bihano kiti, Nasyabuga na bandu aba omo mibuge yehali nomo minywa yabandu behandi, nibya nomo byangabya bitya omo ndambi eyo sibenaisyanyowa, OMukama akabuga.

²² Ritya eyindi mibuge ni kiminyikalo busana naba tikirirye butsira abikirirye, nikwa eriminyerera sikiminyikalo kyabatikirirye nikwa ni kyabikirirye.

²³ Neryo ekanisa yosi yamahindana haguma nabosi bamabuga omo yindi mibuge, na beyihya nabatikirirye bamingira, sibendibuga bati, muri basire kwehi?

²⁴ Nikwa abosi bamatulago, noyu tikirirye kutse oweyihya amingira, akasingawa nabosi, akatswerawa nabosi,

²⁵ ebibisire ebyomutima wuwe bikabisulawa; na ritya akagwa oko busu buwe, iniasaba Mungu nerikangania ko Mungu ari omukati-kati kenyu kwenene.

Eritondekania

²⁶ Nikwa niki, bagala betu kwehi? Omugulu mukahindana, oburi mundu awite olwimbo, kutse eKinywa kyerikangirirya, kutse eriminyikalya, kutse omubuge, kutse eribindulago. Emyatsi yosi ikolawe busana nerihimba.

²⁷ Omundu amabuga omu gundi mubuge, ibabya babiri basa kutse basatu, sibalabe kwaho, babuge erikwamirirana; omuguma abindulego.

²⁸ Nikwa omundu weribindulago amabula, oburi mundu wakubo abye bukutu omo kanisa ayibuyisisaye iyowene neri bwira oMungu.

²⁹ Abatuli bomwatsi babiri kutse basatu babuge, nabandi balenge ekikabugawa.

³⁰ Eribisulirwa rya mahika kwoyu wikere hakuhi, owerimbere iniabya bukutu.

³¹ Kusangwa mwe bosi mwangatoka eritulago muguma muguma, neryo abosi batoke eriiga nerihanwa;

³² nakandi abatuli bengulu yowene bakowa abandi batuli bayo.

³³ Ku sangwa Mungu si Mungu weritulungania nikwa ni wobuholo. Ngoko biri omo syokanisa syosi syababuyirire,

³⁴ abakali bikale bukutu omo syokanisa. Kusangwa sibari nahamuli yeribuga, nikwa bangowa ngoko ebihano bikabuga.

³⁵ Ha mabya omwatsi banzire eriminya, babulaye abibabo eka. Kusangwa ni soni omukali eribugira omo kanisa.

³⁶ Niki? eKinywa kyoMungu kyatsuka kwinywe, kutse kyabahikako inywe bene kwehi?

³⁷ Omundu amaganirya kwari mutuli wengulu yowene, kutse owekirimu, ritolere iniaminya ebyo namabasakira ko biri eritegeka ryoMukama.

³⁸ Omundu amatindaminya eki, abye atya siariminyawa.

³⁹ Ritya, abagala betu, musondaye nomuhwa eritula engulu yowene, nakandi simukage eribuga omo yindi mibuge;

⁴⁰ nikwa emyatsi yosi mukoleyo ndeke neritondekayo.