1 AbanyaKorinto 12 - Nouveau Testament et Psaumes en Ndandi Version 1962

Erihitya ryeKirimu

¹ Nikwa busana nerihitya, bagala betu, sinyanzire mukabya butsira eriminya.

² Munasi omugulu mwabya beBihanda, momwatalibwa erikwama esisumba esitebuga, ngoko mwaso ndoribawa omo musindo oyo.

³ Kikaleka inasonda imwaminya ko hate mundu oyu wangabuga omo Kirimu kyoMungu ati, Yesu atakirawe! kandi sihari mundu wangatoka eribuga ati, Yesu ni Mukama ate neKirimu Kibuyirire.

⁴ Nikwa hari emisindo yerihitya, nikwa eKirimu ni kiguma;

⁵ kandi hari emisindo yerikola, nikwa oMukama ni muguma;

⁶ kandi hari misindo yerikola, nikwa Mungu ni muguma oyu kahira omuhwa omo buri mundu busana nebyosi.

⁷ Oko buri mundu akahabawa ekiminyikalo kyeKirimu busana neribuga riti abosi babane endundi.

⁸ Omuguma eKirimu kikamuha eribuga ebyamenge, nogundi kikamuha eribuga eKinywa kyeri minya omo Kirimu kiguma,

⁹ ogundi eKirimu kikamuha erikirirya, nogundi eKirimu kiguma ekyo kikamuha erihitya ryerilamya,

¹⁰ ogundi erikola ebitikotiko, ogundi erikangirirya, oko gundi amenge werisombola ebirimu, noko gundi emisindo misindo yemibuge, noko gundi eribindula emibuge.

¹¹ Aba abosi bakahabawa omuhwa neKirimu kiguma kandi kikagabira oburi mundu ngoko kyanzire.

Omubiri nebitsuko

¹² Kusangwa ngoko mubiri ni muguma kandi awite ebitsuko bingi, nebitsuko byosi byomubiri, nomo byangabya bingi, ni mubiri muguma, na Kristo kwari atya.

¹³ Kusangwa omo Kirimu kiguma twe bosi twabatisibawa omo mubiri muguma— abaYuda kutse abaGiriki, abakobe kutse abakayigenderaya netu itwe bosi twapulisibawa oko Kirimu kiguma.

¹⁴ Kusangwa si kitsuko kiguma nikwa ni bingi.

¹⁵ Ekisandu kyamabuga kiti, Kusangwa sindi byala, sindi goko mubiri, ekyo sikirileka kikatindabya kyoko mubiri.

¹⁶ Nokutu kwamabuga kuti, kusangwa sindi riso, sindi goko mubiri, ekyo sikyangaleka kukatindabya kwoko mubiri.

¹⁷ Kumbe omubiri gosi ni riso, eriowa iryabyahi kwehi? Kumbe omubiri gosi ni kutu, omwatsi werikumba iniabyahi kwehi?

¹⁸ Nikwa lino Mungu abiriko kotya ebitsuko omo mubiri, oburi kitsuko ngoko ayisogo.

¹⁹ Ebyosi byamabya ekitsuko kiguma, nomubiri iniabya hahi kwehi?

²⁰ Nikwa lino hari bitsuko bingi, nikwa omubiri ni muguma.

²¹ Eriso siryangatoka eribuga nebyala riti, Ukangu bira lwahi: kutse kandi omutwe eribwira ebisandu ati, Ukangu bira lwahi.

²² Nibya kwilaba aho, Ebitsuko byomubiri ebikaringikanibawa nga byolobyolo byo bikabya ibyo bitolere,

²³ nebitswe ebyo byomubiri ebyo tukaganiraya nga sibiwite erisikya byo tukaha erisikya inene okwilaba, nebitswe ebyo byetu ebitehuluka byo tukalembera kwilaba,

²⁴ nebitswe ebyo byetu ebikahuluka byo bitesonda erilemberwa kutsibu. Nikwa Mungu abiritondeka omubiri go haguma, eriha erisikya rinene oko kitswe ekyo ekitawite erisikya,

²⁵ isihabye erigabana omo mubiri, nikwa ebitsuko biwatikanaye haguma.

²⁶ Ekitsuko kigumakyamagalwa, ebyosi ibyagalwa haguma; ekitsuko kiguma kyamasikibwa, ebyosi ibyatsema haguma.

²⁷ Lino muri omubiri waKristo noburi mundu ni kitsuko kyago.

²⁸ Mungu mwatsuka erihira omo kanisa mwabakwenda, abakabiri abatuli bengulu, abakasatu abakangirirya, na bakoli bebitikotiko, nabakalamaya esyondwala, abawatikya, nabaka sondola mubiri, nabakabuga mibuge misindo.

²⁹ Abosi ni bakwenda kwehi? Abosi ni batuli bengulu kwehi? Abosi ni bakangirirya kwehi? Abosi ni bakoli bebitikotiko kwehi?

³⁰ Abosi bawite erihitya ryerilamya kwehi? Abosi bakabuga eyindi mibuge kwehi? Abosi bakabindula emibuge kwehi?

³¹ Nikwa musondaye nomuhwa erihitya erilabire. Nikwa ngabakangaya enzira eyuwene kwaho.