1 AbanyaKorinto 10 - Nouveau Testament et Psaumes en Ndandi Version 1962

Israeli omo mbwarara

¹ Nyanzire imwaminya, abagala betu, ngoko abotata wetu abosi babya omwisi syekitu nabosi mobalaba omukati kengetsi,

² nabosi mobabatisibwa uku Musa omo kitu nomo ngetsi,

³ nabosi mobarya akaryo kaguma kekirimu

⁴ nabosi mobapulya awepulya maguma wekirimu. Kusangwa bapulaya okwibwe eryo ryekirimu eryakwamabo, neribwe eryo ryabya ini Kristo.

⁵ Nikwa hakuhi na bosi mobatatsemesya oMungu; kusangwa mobahwera omo mbwarara.

⁶ Neryo emyatsi eyi iri busana neritukunga, situsondaye ebibi ngoko basondabyo.

⁷ Situbye basabi besisumba ngoko abandi bakubo bayira; ngoko kisakire kiti, Abandu mobabera erirya neripulya mobahangana nerisata.

⁸ Situkola amaragane ngabandi bakubo kobakola, neryo mobahola omo kiro kiguma maelfu makumi abiri nasatu.

⁹ Situlenge oko Mukama, ngoko abandi bakubo bakola mobitwa nesyonzoka;

¹⁰ kutse simuri tonge ngoko abandi bakubo bayitonga mobatogotibwa no Mutogotya.

¹¹ Nikwa emyatsi eyi moyabya kubo busana neritukunga, nikwa yasakawa busana neritukangirirya ku sangwa ukwitwe enduli yimigulu yabirihika.

¹² Neryo oyu karingikanaya ati ahangene ayitegaye siayihinde.

¹³ Sihari erilengwako erikabahikako erite ryabandu bosi. Mungu siari birirawa, naye siendisyaleka mukalengwako kwilaba akagala kenyu, nikwa omwilengwako asyabana aherisagira, imwatoka erisika muryo.

Erisaga esisumba

¹⁴ Neryo abanze bage, musage erisaba esisumba.

¹⁵ Ngaba bwira ngabandu bamenge; nenyu mutswere ebyo ngabuga ngoko bine.

¹⁶ Olutehi lwomuyisa olo tukatsumula, lolutetu sangiraya omo musasi wa Kristo kwehi? Nobundu tukatsu tsanga, bobutetusangiraya omo mubiri waKristo kwehi?

¹⁷ Kusangwa hari mbiga nguma, netu turi bangi turi bomubiri muguma, kusangwa twe bosi tukagabana embiga nguma.

¹⁸ Muganiraye emitsye Israeli bakakola; abakarya amahere sibesangire aheriherera kwehi?

¹⁹ Neryo kyo ngahula niki kwehi? Nyiti akaryo kakahererawa ni kindu, kutse lusumba ni kindu kwehi?

²⁰ Eyihi, ekyo ngabuga nyiti ebyo abatikirirye bakaherera bakabiherera esyombinga butsira oko Mungu. Sinyanzire mukasangira nesyombinga.

²¹ Simwangatoka eri pulya olutehi lwoMukama nolutehi lwesyombinga. Simwanga­toka erisangira ebyo ko butara bwoMukama nebyo ko butara bwesyombinga.

²² Tukalwa obuha noMukama kwehi? Tumulengirye akagala kwehi?

²³ Emyatsi yosi iri ko hamuli, nikwa emyatsi yosi siriwati kaya. Emyatsi yosi iri na hamuli, nikwa emyatsi yosi sirihimba.

²⁴ Sihabye omundu oyu kayisonderaye endundi yiwe iyowene, nikwa asondeyo busana na mulikyabo.

²⁵ Urye ebyosi bika gulibawa omwiguliro ryesiswi butsira eribulya omo mwatsi womulenge womutima.

²⁶ Kusangwa e kihugo ni kyoMukama nebyosi bya mukyo.

²⁷ Omuguma wabatikirirye amababirikira okwirya nenyu mwamanza erigenda, ebyosi bakahira emuliro wenyu muryebyo butsira eribulya nomulenge womutima.

²⁸ (Nikwa omundu amabuga nawe ati, Eki kyaherawa mo buhere, sumuryekyo, busana nomundu oyu riababwira, na busana nomulenge womutima:

²⁹ nikwa mutima ngahula si wawe nikwa ni wagundi.) Kusangwa busana naki eriyigenderya ryage rikatswerawa nomulenge womutima wogundi mundu kwehi?

³⁰ Namarya newasingya, busana naki ngatsumangawa busana nekyo ndiahera ewasingya kwehi?

³¹ Ritya, mwamarya kutse eripulya, kutse kindi kyahi mukakola mukole ebyosi omo lukengerwa lwoMungu.

³² Si muhe obulige oko baYuda kutse oko baGiriki kutse oko kanisa yoMungu,

³³ ngoko ngalenga eritsemesya abandu bosi omo myatsi yosi ngakola, butsira erisonda-sonda endundi yage ingyowene, nikwa endundi busana na bangi, ibatoka erilamibwa.