1 AbanyaKorinto 1 - Nouveau Testament et Psaumes en Ndandi Version 1962

Erikerya kanisa

¹ Paulo oyo wabirikirawa eribya mukwenda omwisonda ryoMungu, na mugala wetu ye Sositeni,

² oko kanisa yoMungu eyiri eKorinto, noko bahigulawa omwisi wa Kristo Yesu, babirikirawa eribya babuyirire haguma na bosi behosi abakahula erina ryoMukama wetu Yesu Kristo, Mukama wabo nowetu:

³ Olukogo lubye kwinywe nobuholo ebikalwa oko Mungu Tata wetu noko Mukama Yesu Kristo.

⁴ Ngaha ewasingya oko Mungu ebiro byosi busana nenyu bu sana nolukogo lwoMungu olo mwahabawa omwisi wa Kristo Yesu,

⁵ omo myatsi yosi mwabwene ebindu omwisi wuwe omwi buga ryosi nomo menge gosi—

⁶ ngoko eritulago uku Kristo ryasikibawa omukati-kati kenyu—

⁷ kikatuma imutasigalira okwihitya ryekirimu neriguma mukalindirira eriminyikala ryo­Mukama wetu Yesu Kristo;

⁸ oyo wasyabasikya erihika oko nduli, butsira olubanza omo kiro kyoMukama wetu Yesu Kristo.

⁹ Mungu siarisiganaya, oyo wababirikira omwihitana haguma na Mugala wuwe, Yesu Kristo oMukama wetu.

Erigabana

¹⁰ Ngabago, bagala betu, busana nerina ryo­Mukama wetu Yesu Kristo, inywe bosi mubuge kiguma sihabye erigabana omukati-kati kenyu, nikwa mubye muguma omo buringikania buguma nomwitswera iguma.

¹¹ Kusangwa abemwa Kloe mobanyitulirago, balikyetu, ko hari erinegena omukati-kati kenyu.

¹² Nyiti, oburi mundu omukati-kati kenyu akabuga ati, Ingye ndi wa Paulo, nogundi ati, Ingye ndi wa Apolo, nogundi ati, Ingye ndi wa Kefa, ogundi ati, Ingye ndi wa Kristo.

¹³ Ko Kristo agabirwe kwehi? Paulo yo wabambawa busana nenyu kwehi? Kutse mwabatisibawa omo rina rya Paulo kwehi?

¹⁴ Ngaha Mungu ewasingya kusangwa sinditabatisya nomuguma omukati-kati kenyu ni na Kristo na Gayo;

¹⁵ sihabye nomuguma oyo wangabuga ati abatisibawa omo rina ryage.

¹⁶ (Nibya monabatisya abekitunga kya Setefano. Kwilaba aho sinyasi nga hari gundi nabatisirye).

¹⁷ Kusangwa Kristo mwatanyituma eribatisya nikwa eritula engulu yowene, butsira na menge weribuga, omusalaba wa Kristo sialusibawe omo kagala kago.

Engulu yomusalaba

¹⁸ Kusangwa eKinywa kyomusalaba ni sire oko bakahera, nikwa kwitwe ababirilamibwa ni kagala koMungu.

¹⁹ Ku sangwa kisakire kiti, Nasyaherya amenge wabamenge, Neriminya ryabakaminya nasyalimbusyaryo.

²⁰ Omundu wa menge ari hahi kwehi? Omusaki ari hahi kwehi? Omukubi wobuhaka ari hahi kwehi? OMungu siaritayira amenge we kihugo kino mo bukiru kwehi?

²¹ Ku sangwa omo menge woMungu, e kihugo mokitetaminya Mungu omo menge, moryatsemesya Mungu busana nobukiru bwekyo tukakangiriraya erilamya abakikiriraya.

²² Kusangwa abaYuda bakabulaya ebitikotiko, na baGiriki bakasonda amenge,

²³ nikwa itwe tukakangiriraya Kristo oyo wabambawa, ekyeri twikalya busana nabaYuda nobukiru busana neBihanda,

²⁴ nikwa busana nabakabirikirawa, abaYuda na baGiriki, ni Kristo akagala koMungu na menge woMungu.

²⁵ Kusangwa obukiru bwoMungu ni menge alabire awabandu, nobolobolo bwoMungu bukalire kwilaba abandu.

²⁶ Muganiraye eribirikirwa ryenyu, bagala betu; si bangi abakwinywe ababya bamenge omo lulengero lwe kihugo, si bangi ababya bamaka, si bangi babya banya mwami, ababirikirawa;

²⁷ nikwa Mungu mwayisoga ekilwe kikiru ekye kihugo eriita abamenge esisoni, Mungu mwayisoga ebilwe byolobyolo byomo kihugo eriita ebyamaka byesisoni,

²⁸ Mungu mwayisoga ebilwe bikaponawa nebitanzirwe byomo kihugo, nibya bindu ebiteho eriyira ebiriho mo buyira,

²⁹ isihabye omundu oyu kayihalamba embere syoMungu.

³⁰ Iye ni nzuko yengebe yenyu omwisi wa Kristo Yesu, oyo Mungu ayira mo menge wetu, neritunganene nerihigulwa, nendongolya;

³¹ neryo kisakire kiti, Oyu kayihalamba ayihalambe oko Mungu.