मत्ती 3 - परमेस्वर को सच्चो वचन ख जाननू

यूहन्ना बपतिस्मा देनवाला

¹ वी दिन म यूहन्ना बपतिस्मा देनवालो यहूदा प्रदेस को निर्जन प्रदेस म आयो, अऊर वहाँ असो प्रचार करन लग गयो:

² “मन फिराओ, काहेकि स्वर्ग को राज नजीक आ गयो हैं।”

³ यूहन्ना उईच व्यक्ति आय जेको बारे म भविस्यवक्ता यसायाह न बोल्यो रहा। “जंगल म एक हाका देन वालो कि आवाज सुनाई देवा हैं प्रभु के यहाँ जान को रस्ता तैयार करो; ओकी रोट ख सिधो करो।”

⁴ यूहन्ना ऊँट को रुआ को कपड़ा पहिनियो हतो, अर कमर म चमडा को पट्टा बाँधी हतो रहा ओको खाना टिड्डी हुन अर जंगल म की मोऊरस हती।

⁵ तब यरूसलेम सहर अर पुरो यहूदिया प्रदेस ख, अर यरदन नद्दी को आजू बाजू का सब सिवाना से इंसान हुन यूहन्ना को जोने आत रा।

⁶ अर उनना अपना-अपना पाप हुन ख मान ख यरदन नद्दी म ओसे बपतिस्मा लियो।

⁷ जब ओ ना ढ़ेर सारा फरीसी हुन अर सदूकी हुन ख बपतिस्मा को लाने अपनो जोने आते देखियो, ते ओ ना उनसे बोल्यो, “अरे साँप को पोरिया हुन, तुम ख कोना जता दियो कि आवन वालो गुस्सा से भागो?”

⁸ एकोलाने मन फिराव को लायक फल लाओ।

⁹ अर अपनो मन म यू मत सोचो कि हमारो बाप अब्राहम की अवलाद आय; मी तुम से कहू हैं कि परमेस्वर इन पत्थर हुन से अब्राहम को लाने अवलाद पैदा कर सका हैं।

¹⁰ अब कुल्हाडी झाड़ हुन की जड़ पा रख्यो हैं, एकोलाने जे-जे झाड़ चोक्खो फल नी देवा हैं, वी काट ख अर आगी म झोका दियो जाएगो।

¹¹ “मी तो तुम इंसान हुन ख पानी से पस्चाताप करन को बपतिस्मा देऊ हैं; उ मोसे जादा सक्तिसाली हैं। मी ओको जूता उठान को भी कबील नी हैं। उ तुमका सुध्द आत्मा अर आग से बपतिस्मा देहे।

¹² ओको सूपडा ओको हात म हैं, अऊर उ अपनो खल्ला चोक्खो तरीका से सफा करेगों, अऊर अपनो गहूँ ख तो बखारी म जमा करेगों, पर भूसा ख वा आगी म जलायगो जे बुझन की नी।”

यूहन्ना को दुवारा यीसु को बपतिस्मा

¹³ वी बखत म प्रभु यीसु यूहन्ना से बपतिस्मा लेवन को लाने गलील प्रदेस से यरदन नद्दी को किनार म पहुँचियो।

¹⁴ पर यूहन्ना ओखा असो बोल ख रोकन लग गयो, “मोखा तो तोरो हात से खुद बपतिस्मा लेन कि जरूरत हैं। अऊर तू मोरो जोने आयो हैं?”

¹⁵ पर यीसु न ओखा जुवाब दियो, “अब तो असो ही होन दा, काहेकि हम ख असोई तरीका से सब धार्मिकता ख पूरो करनो उचित हैं।” येपर यूहन्ना न यीसु कि बात मान ली।

¹⁶ अर यीसु बपतिस्मा ले ख तुरत पानी म से ऊपर आयो, अऊर देखनो, ओको लाने आकास खुल गयो, अर ओ ना परमेस्वर की आत्मा ख कबूतर को जसो उतरते अऊर अपनो ऊपर आते देख्यो।

¹⁷ अऊर देखनो, स्वर्ग से असी आवाज सुनाई दी, “यू मोरो सबसे अच्छो पोरिया आय, जसो मी बेजा खुस हैं।”