Aebulania 1 - Amatengu

Sapanga jupwaga kupete Mwana waki

¹ Pamwandi Sapanga jalongila naka hoku bitu mala jingi na kwi indela hingi jalongila nabu kupete alota baki,

² lakini masoba ga mwisu gani, julongi na twepani kupete Mwana waki. Sapanga jwabomba nndema kupete jombi, joniojuwe Sapanga anhagwi ili andekila hindu yoti ibia yaki.

³ Jombi ndi unang'anu gu ulumbi waka Sapanga, ni lilenganu la sakaka laka mweni Sapanga nu ku uwesu ulilobi laki lelibii na makili julonda hindu yoti. Baada jukunyambisa mahakau, jutemi kunani kwaka Sapanga hoku, upandi wa malele wo Ukolongu ukunani kwaka Sapanga.

Ukolongu waka Mwana waka Sapanga

⁴ Mwana ndi nkolongu kupeta atumi buku nani, ngati elibii lihina leampekia Sapanga helibii likolongu kupeta mahina gabu.

⁵ Ndaba Sapanga ngaseampwagi hata kulenga, ntumi waki jumu jukunani: “Weapa ndi wa Mwanango; nepani lelenu mii Atati baku.” Wala ngaseandongali mtumi jukunani jokapi, “Nepani niibiya Atati baki, najombi jwiibiya Mwanango.”

⁶ Lakini Sapanga pajabiya antuma Mwana waki, jojutumbuli kubelekwa punndema, japwaga, “Atumi boka bu kunani kwaka Sapanga bunzinamia.”

⁷ Lakini pajaalongaliya atumi bu kunani japwaga, “Sapanga jaahengiki atumi baki bu kunani kuba loho, na baahenga lihengu baki kuba miengi ja mwotu.”

⁸ Lakini paandongaliya Mwana; Sapanga japwaga, “Kiteu sii su Ubambu Ukolongu mwa Sapanga kitama yaka petapeta! Weapa waalongosa bandu baku ngati ejupala Sapanga.

⁹ Weapa gupala kuhenga gajwagapala Sapanga nukusuki ubaja. Ndi mana Sapanga, jojubi kabee Sapanga waku jutei kuguhagu, nukugupeke ndogule ngolongu kupeta ajaku.”

¹⁰ Nakabee: “Bambu, weapa wabomba nndema pamwandi, nu kunani kwaka Sapanga kwa bombwa kwa maboku gaku.

¹¹ Hei yoti yiitenda kuhoba, lakini weapa guiigaliya masoba goha; yoka itenda kulala ngati ingobu.

¹² Biitulana ngati kaputi, nayombi ing'anambuka kuba ngati ingobu. Lakini weapa ndi ajolajola masoba goha, na Maisa gaku ngagiikubi na mwiso.”

¹³ Sapanga ngaseampwagi hata kulenga jumu ja atumi baki bu kunani: “Tama upandi wangu wamalele, mbaka panaabeka abaja baku pai ja magolu gako.”

¹⁴ Atumi baka Sapanga buku nani ndi kyane? Baniaba ndi loho yeyuntumaki Sapanga na yeitumwa kwaajangati bandu babiijopa wokopu.