2 Yohana 1 - Amatengu

¹ Nepani nunseja nuguhandaki wehapa wa nyongo weguhaguliwi na Sapanga, pamu na bana baku monupai sakaka. Wala nga nepani pena nenumpai, lakini kabee na boti babugumanyi usakaka bumpai mwanganya,

² kwa ndaba usakaka gutama na twepani kabee wiiendalia kutama na twepani yaka petapeta.

³ Nunndoba Sapanga Atati bitu na Yesu Kilisitu, Mwana wa Atati, butupekia waamboni ni ikia nu lukwali lwakii ibiya pamu na twepani mu usakaka nu upali.

Usakaka nu upali

⁴ Natoguli ngamaa kubona bana baku bangi atama mu usakaka ngati Atati ebutulagalaki.

⁵ Ndienu, mwaamabu nunndoba sindu simu kuhuma kwinu: Tupalana. Ngase nunhandaki mihilu minyae, ila nunhandaki mihilu ajelaje jetwajopa tumbuka pu uwanzu ili tupalana.

⁶ Nu upali ndi kutama sukuhenga malagalaki gi mihilu jaka Sapanga. Jenze ndi mihilu jemujijoana tumbuka pu uwanzu: Ntama su kupalana.

⁷ Ndaba baalonge isoli bingi apitii punndema. Bandu haba ngaseajetake ana Yesu Kilisitu jwahikiki na jabi mundu. Mundu ngati hoju julonge isoli na ampenga Kilisitu.

⁸ Nala, mulilenda mwabeti ili mwihoa senhengi lihengu, ila mpata seketule jejijagani.

⁹ Mundu jojujonzuke sindu sokapi na janga kutama mu mabole gaka Kilisitu ngasejubii na Sapanga. Lakini jo juigali mu mabole haga hoju jubii na Atati na Mwana.

¹⁰ Ndienu, ana mundu juhikiki kwinu sanga kwalete mabole haga, mwaanzopa mu nyumba jinu, wala mwaanndamuki.

¹¹ Ndaba joanzopa mundu hoju, jujongana naku mu mahengu gaki gilia.

Malobi gu kujomule

¹² Mii na gingi gukumpwagi, lakini ngasembai kuhenga hela su kuandika mu likalatasi; badala jaki, nhobale kuhika kwinu nu kulonge na mwanganya ana kwa ana, ili kutogule kwitu kupeekia.

¹³ Bana baka nndombu waku jojuhaguliwi na Sapanga atenda kukulamuki.