Yuda 1 - KILOMBENO KIHYA KIA NFUMWETU YESU KIDISITU

¹ Yuda, mpika a Yesu Kidisitu, mukwabo na Yakoba, kwi’ba abaitanyinwa, batomibwe kifulo mw’Efile Mukulu Yaiya, abalamibwa na Yesu Kidisitu.

² Lusa, kufukama, na kifulo bifwime kwanudi.

³ A batomibwe kifulo, hanadi asasakata kwinufundjila ha mwanda wa kihandjilo kietu’twe boso, nadi munyishwe mwishimba diande kwinufundjila, na kwinulanga’shi, nulwile na kutuhwita ha mwanda wa lukumino lwinyi lubahelwe mususa umunenka kwi bahatulwe-bekishila.

⁴ Mwanda kwi bamo bantu abadi ababembela mwanudi ku bukunkula, aba nyi abasangwilwe kala ku kuno kuhīshwa, bantu bashī na bwin’Efile Mukulu mpaa na ku mudioholo w’eshimba dibi, na kutuna Mwana’etu umunenka, Nfumwetu Yesu Kidisitu.

⁵ Binobino nankyebe kwinutentekyesha sunga nwiuku kala myanda yoso’shi, Nfumwetu habahashishe bantu mu nsenga y’Edjihitu, ku monge balwishishe baba bashyabakumina.

⁶ Na bamwikeilu bashī balame mwikelo wabo wa kwibedi, a kunyi abalekyele mbalo yabo ba na bene, mwibalame mu nkano ya ikala-ika ya mufito mpaa na ku kimu kia diadi’efuku dikata.

⁷ Anka bu Sodoma na Ngomola na bibalo ku bukunkulu bwabio, habehene hamunen’abo kubia lukyebanokyebano na kulonda bia mbidi yingi, mbatulwe bu kileshesho, bakwete kufwambuka kumweshwa kwa kālo kaikala-ika.

⁸ Nyi mbiabia bamu mu bilotwa biabo abalwisha mbidi, abo ababenge butontshi, na kusabula bakata.

⁹ Anka Mikaele mwikeilu mukile bukata, habadi alwila na kafilefile, belele mpaka ha mwanda wa mbidi ya Mosesa, tamukume kufisha kwadi kimu kia kukaa, ooo, anka bakwile’shi: Yehowa akusashile.

¹⁰ Anka bano abakaa ku myanda yoso yiabashyabeuku; n’aya yiabeuku’bo mwiyile butandjilo, hamunenka bu nyama yishī na binangu, mu yino myanda abalwishibwa.

¹¹ Mpombo kwabadi! mwanda abayile mwishinda dia Kena, abakamine lubilo mu ya kuuhakana mu kuluba kwa Balfima ha mwanda w’efuto, abashimine namu mu kutomboka kwa Kola.

¹² Bano benyi nyi mbwebwe yifwame mu bidibwa bienu bia kifulo, hābadi n’enu; kudia abedishā’bo bana bene kushī na moo; makumbi ashī na mpeshi anyungakashibwa na ntpahi; mitshi yi na bikuba biayo bifumbe, yishī na bikuba; yifwe kubidi na kushudidilwa na mishi;

¹³ mbundambunda ya mema ayifunu bukyelo bwa kutusha mafulu a būfu bwa ’bo bana bene; nyenyenyi yabwendende, kwabadi nyi nkubombeleshwe mufito we fututu mpaa na kwikala-ika.

¹⁴ Biabia Enoka namu, a musambobidi kubangila kwi Adama, batemukile ha mwanda wa bano’shi: Talangai, Nfumwetu afiki na bahatulwebekishila be binunu na binunu,

¹⁵ kwimukishe kimu ha boso, na kutonyesha boso bashī na bwin’Efile munkatshi mwabo ha mwanda wa bikitshino, bishī bia bwin’Efile, biabakitshine mu bushī bwin’Efile, na ha mwanda wa’bia bi bukoho, bibākwile balwishi bashī ba bwin’Efile kwadi.

¹⁶ Bano mbasha miununo, bashā kwiunyinganyinga, abatambukila mwiyile ngabiabi yabo; makanwa’bo amwisamba’nka yikata ya kwitatula, mbanemekye bantu ha mwanda wa bia bwedi.

¹⁷ Ank’anwe batomibwe kifulo nutentekyeshe myanda yibakwile batemuki ba Nfumwetu Yesu Kidisitu kwibedi’ shi,

¹⁸ (mwa) benulungudile’shi, mu kihindji kia kunfudilo akukekala basabudi abakatambukila mwiyile ngabiabi yabo yi na mwinyi ya bushī bwin’Efile.

¹⁹ Bano nyi benyi abalamunā ba ku mbidi, ta be na Kikudi-E-Selelee.

²⁰ Anka’nwe bafudibwe kifulo, nwikudishe’nwe bana bene mu lukumino lwenu luhatulwe-lwi-kishila, (na) kuteka mu Kikudi-E-Selelee.

²¹ Nwilame mu kifulo ki’Efile Mukulu, na kutengyela lusa lwa Nfumwetu Yesu Kidisitu mpaa na ku muwa wa ikala-ika.

²² Ha bamo be na mealasheno nwikale na kanye;

²³ bangi nyi nwibahashe, bwibōhola mu kālo; ha bangi namu nwibafwile lusa na moo; nushikwe mabashi abo a myanda yibi.

²⁴ Binobino kwadie euku kwinulama ku kukokola, na kwinutula ku mpala kwa ntumbo ye kushī kilema na muloo ukilekile,

²⁵ kw’Efile Mukulu umune buhenka bwe, Muhashi etu mu Yesu Kidisitu Nfumwetu, (kwikale) ntumbo, bukilekile, butontshi, na matalwa kwibedi kwa mbangilo, na binobino mpaa na kwikala-ika. Amena.