Yoano 9 - KILOMBENO KIHYA KIA NFUMWETU YESU KIDISITU

¹ Habadi (Yesu) akidi, bamwene muntu batandjilwe bu mpofu.

² Biabia bana-be-ba-bukishi babamwihwishe’shi: A Mulambukishi, bakitshine bibi nanyi? uno muntu su babamutandjile, mwanda bamutande nabumpofu.

³ Yesu bebalulwile’ shi: sunga nguno, sunga benyi abamutandjile takwi mukite ibibubi, ooo: anka ha mwanda bikitshino bi’Efile Mukulu abikamwekyela mwadi.

⁴ Mwandji nao ngwa kukita mifubo ya bantumine ha ki kanya kwanka: bufuku abukafiki bushia bwiuku muntu kukita mufubo.

⁵ Ha nki ha nsenga nyi etata dia ba-hano-ha-nsenga.

⁶ Habahwile kwakula biabia, bafile mata hashi, basobakene nsenga na mata, bashingile yanka ’meso a muntu mpofu.

⁷ Bamulungwile’shi: Nd’oketumpe mwishiba dia Siloama (kuhatula nyi kwambashi, Mutumibwe.) Biabia, bayile, beitumpile, bālukile na meso abulwe.

⁸ Binyibiabia bākwabo n’ababamumonanga kala habadi kī mpofu, aboshi: Au tangwinyi badi mushale atekye?

⁹ Bangi’shi; Nyank’e; bangi’shi: Ooo, mumwifwane ku na minyi: ank’e na mwinyi’shi: Nami uno.

¹⁰ Abamwambile’shi: Meso’be ababulwa na minyi?

¹¹ E beba lulwile’shi: Muntu, atemunwa bu Yesu basobakana nsenga, banshingi ’meso, bañambashi: Nda kwidindji dia Siloama oketumpe: nayile, nanketumpa, namono.

¹² Biabia, babamwihwishe’shi: E kwi kunyi? E bambile’shi: Tañuku’mi.

¹³ Babafikile n’e badi mpofu kwi Bafadiseo.

¹⁴ H’efuku dibasobakenye Yesu nsenga, na dibabulwe meso’e dibadi efuku dia Lubingu.

¹⁵ Henyihaha Bafadiseo namu babamwihwishe dimonyi’shi: Bomono na minyi? E bambile’shi: ’E banshingi nsenga yifundakane ’meso ande, neitumpu, biabia namono meso.

¹⁶ Binyibinyi, bangi ba Bafadiseo, babambile’shi: Au muntu ta ngw’Efile Mukulu, mwanda tamushile’efuku dia Lubingu. Bangi’shi: Muntu mulwishi euku kukita myanda ya bilengeleshi na minyi? Biabia babelamunwine.

¹⁷ Babaihwishe badi mpofu dingi’ nyi’shi: Obe namu okula na minyi kwi’wa bakubula meso? E balulwile’shi: E mutemukye na mwinyi.

¹⁸ Anka ba Yudea tambakumine ha mwanda we’shi: badi mpofu, bamono meso, mpa na hababaitanyine babatandjile winyi babulwilwe meso.

¹⁹ Binyibiabia, babebehwishe’shi: Uno ngwinyi mwan’enu anwambashi batandjilwe mpofu su? a bino nkinyi kibamumwesha meso.

²⁰ Babamutandjile’ abambile’shi: Atwiuku’shi, uno nyi mwan’etu, atubatandjile mpofu.

²¹ Anka tatwibeukye mu babalwila binobino, tatwibeukye namu bamubula meso’e; mwihushei, na mwinyi, tadi muntu mukulu, ākula e na mwinyi.

²² Babamutandjile babakudile biabia ha mwanda wa kutshina ba Yudea; mwanda Bena Yudea babashimikile kala’shi: su muntu bakumina’shi E Kidisitu, atumubingi mu kikoñeno.

²³ Binyibiabia, babamutandjile abakwile’shi: Tadi mukulu, mwihushei na mwinyi.

²⁴ Biabia, babaitanyine dimo batandjibwe mpofu, bamwambashi: Otumbishe Efile Mukulu: atwiuku’shi uno muntu ’mubi.

²⁵ E bebalulwile’shi: Su E mulwishi tafiuku; neuku mwanda umune’nka’shi: ami nadi mpofu kala, binobino namono.

²⁶ Babamwihwishe’shi dimonyi, E bakukitshine kinyi? babulusha meso’be na minyi?

²⁷ E bebalulwile’shi: Tampwile kwinulungula kala, n’anwe tanwibashushe: A! kia nukyebela kuhusha dia kabidi nkinyi? Anukyebe namu kwikala bana-be-ba-bukishi su?

²⁸ Biabia babamukayile’shi: Obe we Mwan’E a bukishi; anka’twe twi bana-ba-bukishi ba Mosesa.

²⁹ Atwiuku’ Efile Mukulu bakwile kwi Mosesa; anka uno muntu tatwibeukye kubafikile.

³⁰ Biabia awa muntu bebalulwile’shi: Nyi henyiha mwanda wa ku kanya’shi: E bambule meso ande, n’anwe tanwibeukye kubafikile.

³¹ Binobino atwiuku’shi ’Efile Mukulu tahushā basodi ba myanda: anka su muntu e mulangwidi w’Efile Mukulu ne akitshi abikyebe’shimba diE, E amuhusha.

³² Kumbangilo, kwa nsenga, mpā na binobino, takwahushishwe muntu batandjibwe mpofu kubulwa meso na mungi muntu.

³³ Su uno muntu tamufikye kw’Efile Mukulu, tabadi akwiuku kukita mwanda.

³⁴ Babamwalulwile’shi: Obe bodi mutandjibwe binyibinyi mu bubi, wetulambukisha’twe su? Biabia babamubingile.

³⁵ Yesu bahushishe’shi babamubingi; habamusañene, bamwihwishe ’shi: Okumine Mwan’Efile Mukulu su?

³⁶ E balulwile’shi: E nanyi Mwanana, mwandji a kumukumina?

³⁷ Biabia Yesu bamwambile’shi: Obe bohu kumumona, n’akula n’obe’u n’E.

³⁸ Au bambile’shi: Mwanana, nakumina. Biabia bamulangwidile.

³⁹ Yesu balungwile’shi: Nyi ha mwanda wa kutshiba kimu nafikile hano ha nsenga’shi: bashia bamono, bamone; na bamone bekale bu bampofu.

⁴⁰ Biabia bangi ba Bafadiseo babadi n’E, babahushishe yino misambo, babambile’shi; Atwe’nyi twi bampofu namu su?

⁴¹ Yesu bebalungwile’shi: Su nubadi bampofu, tanubadi na bubi: anka binobino anwamba’shi: Atumono meso; binyibiabia milwisho yenu nwi nayo.