Yoano 7 - KILOMBENO KIHYA KIA NFUMWETU YESU KIDISITU

¹ Habahwile yaya myanda Yesu badi akindakana mu Ngadileo: tabadi akindakana mu Yudea, ha mwanda wa Bena Yudea babadi abakyebe kumwiha.

² Bidibwa bia Kusehela bia ku Bitanda bibadi hehi.

³ Bakwabo n’e babamulungwile’shi: Katuka kuno, wende mu Yudea’shi, bana bobeba-bukishi bakamone bikitshino biobe biokitshi.

⁴ Takwi muntu sungangumune akitshi mwanda ku bufiefi, su akyebe kwiukyibwa kwi bantu. Su okitshi bino binyi, eleshe kwi be-hano-ha-nsenga.

⁵ Mwanda bakwabo ba munda tambamukumine.

⁶ Biabia Yesu bebambile’shi: Kihindji kiande takiabandjile kufika; anka kihindji kienu ki kwanka mafuku oso.

⁷ Ba hano-ha-nsenga tabeuku kwikala nenu lukuna: anka be nami lukuna mwanda nebasokola’shi, fbikitshino bienu bibubi.

⁸ Anwe kakaminei ku bino bidibwa, tanyende binobino ku bino bidibwa; mwanda kihindji kiande takiabandjile kukumbana.

⁹ Habahwile kwakula yino misambo kwabadi, tabashalele mu Ngadileo.

¹⁰ Anka habayile bakwabo ne, biabia E namu bakamine, tamwende ha toka, anka bu mu bufiefie.

¹¹ Biabia Bena Yudea baba mukimbile ku Bidibwa bia Kusehela abeihushene’shi; E kwi kunyi?

¹² Kubadi bangi be bungi babadi abaununa ha mwanda we. Bangi’shi: E muntu ebuwa: bangi namu’ ’shi: Ooo, ’ōngola bantu bisumanga.

¹³ Anka tambamu temuna ku meso kwa bantu, mwanda badi aba tshinyi Bena Yudea.

¹⁴ Binyibiabia, Yesu bakamine mu Ntempelo, hankatshi ha Bidibwa bia Kusehela, balambukishe.

¹⁵ Biabia Bena Yudea babakanyine’shi: A! uno muntu mwiukye mikanda bi kunyi kwa shī mulambukishwe.

¹⁶ Yesu bebalulwile’shi: Lulambukisho lwande ta ndwande, ny’anka lwa bantumine.

¹⁷ Ese muntu, su akakitshi mulombene’ shimba die, akashingula lulambukisho luno, su ndw’Efile Mukulu, su neisambila ami na mwinyi.

¹⁸ E akwila na mwinyi, akimbi ntumbo ye na mwinyi: ank’e akimbi ntumbo ya bamutumine, e nga binyibinyi, te na yishīyilulame munda mwe.

¹⁹ Mosesa tamwinuhe mikanda ya milangilo su? anka takwi muntu sungangumune’nu eyikitshi. A ha mwanda kinyi wa nukyebe kuñihaila?

²⁰ Bantu abamwalulwile’shi: We na mukishi munda: A mbanyi abakukimbi kukwiha?

²¹ Yesu bebalulwile’shi: Nakitshine mufubo umune’nka, n’anwe boso nubeukanya.

²² Binyibiabia, Mosesa benuhele mwanda wa kisale (tankia kwi Mosesa, anka nkia bashenukulu) n’anwe mwifuku dia Sabado anusala muntu.

²³ Su muntu musale h’efuku dia Sabado, kutshina’shi: kishila kia Mosesa takikashulwa; nwi nami nsungu su, mwanda nahashishe muntu h’efuku dia Sabado?

²⁴ Tanuhwandjikishanga muntu bu bia numumono kumpala, anka hwandjikisha kihwandjikisho kia kululama.

²⁵ Henyihaha bangi ba Yelusalema babaihwishe’shi: Au tangwinyi abakimbila kwiha’u?

²⁶ Anka, talanga, husha bu biakula na matalwa, n’abo tabamwalula mwanda. A! batontshi abeuku binyibinyi’shi uno nyi Kidisitu na Mwinyi su?

²⁷ Sunga biabia, atwe atumwiuku kubafikile: anka ahafiki Kidisitu takwi muntu akeuku kwafiki.

²⁸ Binyibiabia Yesu belele musase mu Ntempelo, mubadi mulambukisha’shi: Anunyiuku, anwiuku namu kunafikile: nkimwifwile anka bantumine nga binyibinyi, E tanumwiuku.

²⁹ Anka’mi nyimumwiukye, mwanda nyi mufikye kwadi, n’E bantumine.

³⁰ Biabia abatompele kumukwata: anka takwi muntu bamukumine masa, mwanda kihindji kie takibadi kibande kukumbana.

³¹ Bantu be bungi babamukuminyine, ababambile’shi: Ahafiki Kidisitu, akakitshi bilengeleshi bikile’bi abikitshi uno su?

³² Bafadiseo abahushishe bia bamununanga bino bintu ha mwanda we; na Bafadiseo na batshiite bakata abatakwile bampulushi kumukwata.

³³ Binyibiabia Yesu bebalungwile’shi: Nyi anka nenu kihindji kihela, biabia nyende kwi bantumine.

³⁴ Anukankimbi, tanuka ’mono, na kwatulji anwe tanwiuku kufika.

³⁵ Biabia Bena Yudea tabeakushena munkatshi mwabo’shi: Akēnde kwi kunyi kwa tushatwiuku kumumo no? akēnde kwi bakwetu abahalakene munkatshi mwa Badjentaila, akalambukisha Badjentaila su?

³⁶ Au uno mwanda wi na minyi wambashi: Anukankimbe, tanuka’ mono; na kwandji tanukafikye kwanka?

³⁷ Kwifuku dia kunfudilo, adia dikata dia Bidibwa bia Kusehela; Yesu baimene bēlele musase’shi: Su muntu e na nyota, afikye kwandjimi, atome.

³⁸ Ese ankumina, bu bibafundjibwe bibakwile, munda mwe amukatuku ngui yamema a muwa.

³⁹ (Anka uno E badi akula wa Kikudi-E-Selele, badi akikyebwa kuhebwa kwi bakumukumina, mwanda Kikudi-E-Selele badi tabandjile kufika, mwanda Yesu tabadi mutumbishibwe.)

⁴⁰ Binyibiabia, bantu be bungi hababahushishe uno mwanda’shi: Binyibinyi E ngwinyi mutemukye.

⁴¹ Bangi’shi: Uno nyi Kidisitu. Anka bamo namu’shi: Aa! Ki disitu akatuku mu Ngadileo su?

⁴² Bifundjibwe tabibetulungwile’shi: Kidisitu batukile ku kekulu ka Dafidi, mu kibalo kia Beteleme, nyi kubadi Dafidi su?

⁴³ Biabia kulāmuna kubatukile munkatshi mwabo ha mwanda we.

⁴⁴ Bangi babakyebele kumukwata, anka muntu tamumukume masa.

⁴⁵ Henyihaha, kubafikile basalai kwi batshiite bakata na Bafadiseo, babebehwishe’shi: A nkinyi kianushi befikile n’E?

⁴⁶ Bampulushi babebalulwile’shi: Takubadi muntu kala mpa na binobino, euku kwakula hamune na uno muntu.

⁴⁷ Biabia Bafadiseo bebalulwile’shi: Anwe namu bahu kwinongola su?

⁴⁸ Bamo ba mu batontshi betu, na ba Bafadiseo babamukumina su?

⁴⁹ Anka bantu ba kina kibumbu kishī kiukye mukanda wa milangilo nkielwe mulua.

⁵⁰ Nikodema, yawa bafikile kwi Yesu bufuku, biabadi mwikale a ku ba’nka, bebalungwile’shi:

⁵¹ Milangilo yetu ayitshibi kimu kia muntu anushī ahushishe, na kwiuka mwanda wadimukite su?

⁵² Babamwalulwile’shi: Obe namu we a ku Ngadileo? Okimbe, okamono’shi: Ku Ngapoile takwa kutuka mutemukye.

⁵³ Biabia muntuna muntu ibabālukile muntu kwe, muntu kwe.