Yoano 1 - KILOMBENO KIHYA KIA NFUMWETU YESU KIDISITU

¹ Kwibedi n’ebedi Mwanda ubadi kwanka; winyi mwanda ubadi n’Efile Mukulu, na mwinyi mwanda ubadi Efile Mukulu (na mwinyi).

² Ñanka e badi n’Efile Mukulu mu kibangilo.

³ Bintu bioso bibahangilwe kwadi, takwi kintu sunga nkimune kishī kihangibwe n’E.

⁴ Muwa ubadi mwadi E, muwa namu ubadi etata dia bantu.

⁵ Etata namu aditosha ’mufito, na mufito tawidishingula, ooo.

⁶ Kubafikile muntu, batuminwe n’Efile Mukulu, eshina die mbu Yoano.

⁷ Nyi winyi bafikile bu kamonyi, mwanda wa kuhatula’shi, nkebahatulwile mwiyile aya ya mwitata’shi, boso bakuminyine handji’mi.

⁸ E na mwinyi tabadi etata, ooo, anka batuminwe kuhatula mwiyile (dinyi) etata.

⁹ Etata dia binyibinyi nyi dibadi aditoshesha bantu boso abafiki hano ha nsenga.

¹⁰ E na mwinyi badi hano ha nsenga, na hano ha nsenga namu habadi hahangwe kwadi; anka bahanohansenga tambamwiukye.

¹¹ Bafikile ku b’e na mwinyi, anka b’e na mwinyi tambamutambule, ooo.

¹² Anka muhunda baba abamutambwile, nyi badi muhe matalwa a kwikala bu bana b’Efile Mukulu, nyi kwi baba abakumina mwishina die.

¹³ Kwi’bo bashī batandjibwe ku mase, sunga nkwishimba dia ku mbidi, sunga nkwishimba dia muntu, ñanka kw’Efile Mukulu.

¹⁴ Biabia winyi Mwanda ubalulukile taudi bu muntu, abombela munkatshi mwetu, (twabandjila ntumbo ye, ntumbo yinyi bu ya mwan’eleka kwi nshye,) muule bu muntu na biabinyibinyi.

¹⁵ (Yoano bamwisambile, bēle musase’shi: Nyi winyi anakwile’shi: Akandondo munkile kinemo: mwanda e badi ku mpala kwande.

¹⁶ Atwe boso tubatambwile ku kukumbana kwe, bu-muntu ha bu-muntu.

¹⁷ Mwanda mukanda-wa-bishila ubahelwe (bantu) ha Mosesa; bu-muntu na biabinyibinyi bibafikile ha Yesu Kidisitu.

¹⁸ Takwi muntu sunga ngumune bamwene Efile Mukulu sunga mpahelahela, winyi Mwan’umun’enka eleka E mu kiadi kia nshye; ñanka E bamutemwine.

¹⁹ Biabia yino nyi bu kamonyi bwa Yoano, habatumine Bena Yuda batshiite-bakwidi, na Bena Lewi ba mu Yelusalema kumwihusha’shi: Obe we’nyi?

²⁰ E besokwele, tamutune, besokwele’shi: Ami nki Kidisitu, ooo.

²¹ Biabia tabamukokōla’shi: A na minyi? We Elaidja su? E namu’shi: Ooo. Obe we (winyi) mutemuki su? Bālulwile’shi: A a.

²² Henyihaha abo nkumwalula’shi: A (biabia) we nyi? mwatudia kukahatulwila kwi betutumine. Wetemunā bu’nyi obe na mwinyi?

²³ Biamba’shi: Ami nyi eyi adiele musase mu kabāka’shi: Ludikai eshinda dia Yehowa bu mubakwidile mutemuki Eseasa.

²⁴ Benyi abatuminwe abadi ba ku Bafadiseo.

²⁵ Biabia tabamwihusha’shi: A henyihaha nkinyi kiobatshishā su twe (winyi) Kidisitu, sunga mbu Elaidja, sunga mbu (winyi) mutemuki?

²⁶ Yoano bebālulwile’shi: Ami nabatshishā mu mema; anka munkatshi mwenu mubaimana umune anushyanwiuku.

²⁷ Nyi winyi andondo ku nyima munkile kinemo; ye mioshi ya ku biashino nkimuhwandjikile kwiyiangula.

²⁸ Yino myanda yibakitshinwe mu Betabala adi’eshia dia Yodano kubadi Yoano abatshishā.

²⁹ Biabia habubatokyele Yoano bamwene Yesu afiki kwadi, bambile’shi: Talangai Mwan’a mukoko ’Efile Mukulu, akashā milwisho ya bahanohansenga.

³⁰ Nyi winyi anambile’shi: Ku nyima kwande akukafiki muntu munkile kinemo, mwanda E badi kwibedi kwande.

³¹ N’ami ntamushingulanga, ooo, anka mwadia kwisokwela kwi Isalele, nyi mbiabia nafiki nkwete kubatshisha na mema.

³² Biabia Yoano besambile bu kamonyi’shi: Namwene Kikudi-E-Selelee ayiki mwiilu bwikutshi, na kumushala.

³³ Tanadi mumushingule: anka winyi bantumine kubatshisha mu mema, nyi bandungwile’shi: Ha yawa okamono Kikudi-E-Selelee ayiki na kushala ha mbidi he, yawa nyi akabatshishā mu Kikudi-E-Selelee.

³⁴ N’ami namwene, nesambile bu kamonyi’shi: Uno nyi Mwan’Efile Mukulu.

³⁵ Dimonyi, habubatokyele, Yoano badi mwimane, na bana-be-babukishi babidi;

³⁶ Hakumona Yesu mwabatambukilanga, bambile’shi: Talai Mwan’a mukoko ’Efile Mukulu!

³⁷ Biabia aba bana-ba-bukishi babidi abamuhushishe kwete kwisamba, tabakalondo Yesu.

³⁸ Binyibiabia Yesu bealu lwile, ebamona abamulondo, tebehusha’shi: A nkinyi kianu kyebe? Abamwalulwile’shi: Labi, fkuhatula nyi nkwamba’ Mulambukishi,) obombelā kwi kunyi?

³⁹ E namu’shi: Fikai nukamone. Abafikile, bamona kwabadi mubombele, ababombelele n’e diadi’efuku: mwanda nsa yibadi tayikyebe kufika h’ekumi.

⁴⁰ Ku baba babidi abahushishe Yoano, tabalondo Yesu; kubadi Andeleo mukwabo na Shimona Petelo.

⁴¹ E, babadidile kuheta Shimona mukwabo ē na mwinyi, tamulungula’shi: Atwe tubamono Meseasa, kuhatula’shi: Nyi Kidisitu.

⁴² Bamufishishe kwi Yesu. Biabia Yesu hakumumona, tamba’shi: Obe we Shimona mwan’a Yona, okaudikwa bu Kefasa, kuhatula’shi: Nyi’bwe.

⁴³ Habubatokyele Yesu bakyebele kwenda mu Ngadilea, basañene Fidiha, bamulungwile’shi: Ndonde.

⁴⁴ Winyi Fidiha badi mwina Betesaida, kibalo kia Andeleo na Petelo.

⁴⁵ Fidiha basañene Natanyele, bamulungwile’shi: Tubasañana winyi badi mufundwe kwi Mosesa mu mukanda-wabishila, na muwa batemuki, Yesu a Nasaleta mwan’a Yosefa.

⁴⁶ Natanyele bamwalulwile’shi: Aaa! A kilumbulukye kitukye mu Nasaleta su? Fidiha’shi: Fik’okamone.

⁴⁷ Yesu bamwene Natanyele afiki kwadi, bamwambile’shi: Talai Mwina Isalele a binyibinyi, mwadi e tamwi bulamalama!

⁴⁸ Natanyele’shi: A bonukile na minyi? Yesu bamwalulwile’shi: Habadi Fidiha takakwitanyine, hobodi mushi mwa mutshi wa kikuku, nakumwene.

⁴⁹ Natanyele bamwalulwile’shi: Labi, obe we Mwan’Efile Mukulu, obe we Nfumu a Isalele.

⁵⁰ Yesu bamwambile’shi: Mwanda nakulungula’shi: Nakumwene mushi mwa kikuku, takukumina kobokumina’ku’be? okamono bintu bikile bino bukata.

⁵¹ Biabia bamulungwile’nyi’shi: Mbinyibinyi mbinyibinyi nakwamba’shi: Anukamono eilu dishitukye, na bamwikeilu b’Efile Mukulu bakaminanga, bayikanga ha Mwan’a Muntu.