Yakoba 4 - KILOMBENO KIHYA KIA NFUMWETU YESU KIDISITU

¹ Ngoshi na mima bi munkatshi mwenu abifiki kwi kunyi? tanku ngabiabi yenu ayilu ngoshi mu bia ku mbidi bienu?

² Anulakila (bintu) anka tanwi n’abio; anuihā, nwi na kinsukunsuku kia kwabila, anka tanwiuku kutambula; anwitahena anulu ngoshi, anka tanwi n’abio, mwanda tanutekye, ooo.

³ Anutekā, tanutambula, mwanda anutuhishena ha kuteka bianudia kwikihana ha ngabiabi yenu.

⁴ Anwe bashudi ba kishila ki’ebambo tanwiuku’shi, bukūku na bia hanohansenga nyi nduhuna n’Efile Mukulu? biabia ese akekala bu kūku na bia hanohansenga e mushikwa n’Efile Mukulu.

⁵ Anutentekyesha’shi, Kifundwe-ki-’Efile akiakula bisumanga’shi; Kikudi abombela n’etu e na lwabi lwa mukao su?

⁶ Ank’e ahanā bu-muntu bukilekile. Binyibiabia bākula’shi, Efile Mukulu atuhishena na ba kwinemeka, anka kwi’ba abehelesha ebaheya bu-muntu.

⁷ Biabia nwibofushei anwe bana bene kw’Efile Mukulu, shikilai kafilefile, n’e akenusuku.

⁸ Nwifubulei kw’Efile Mukulu n’E akenwifubula. Sulai maas’enu anwe balwishi, toshai mashimb’enu anwe ba mashimba abidi.

⁹ Nunyingye mbishiotshi, nuhombei na kudila mpolo, kutanyansadi kwenu kwalulukye tēhombo, na muloo (wenu) winyongole.

¹⁰ Nwiheleshei ku meso kwa Nfumwetu, biabia akenukamisha.

¹¹ Tanwiakushenanga bibubi, anwe bakwetu, ooo. E akwihula ntukwabo, sunga nkumutshibila kimu (biabia) nyi mukanda-wa-bishila waihula, na kwiutshibila, anka sōtshibila mukanda-wa-bishila, (biabia) twe mukitshi a mukandawa-bishila, anka todi nsushi.

¹² Kwi mushidiki a bishila umunenka, na bu nsushi, nyi ēuku biakuhasha na biakulwisha: anka obe we’nyi atshibila mungi?

¹³ Twendei binobino anwe abakula’shi: Lelo uno su maloba atukēnde ku kibalo kikampanda, tukekale kwanka kihwa kimune, kusunga na kuhana mwa kumwena mono.

¹⁴ Anka tanwiuku akia akikafiki dia maloba, ooo. Mwanda muwa wenu wi bu kinyi? wi bu mulemba aumweka kahindji kahela, biabia watanduka.

¹⁵ Mwanda nubandia kwakula’shi: Su Efile Mukulu akumina, biabia tukekale na muwa na kukita bikampanda su mbikankyengye.

¹⁶ Anka binobino anwitumbisha mu kwilungula kwenu: Kwitumbisha koso kwi biabia mbubi.

¹⁷ Binyibiabia kwi yawa euku biakukita bibuwa, su tamwibikite kwadi e nyi nkulwisha.