Mateo 7 - KILOMBENO KIHYA KIA NFUMWETU YESU KIDISITU

¹ Tanutshibilanga muntu kimu; biabia anwe tanukatshibilwa kimu,

² Mwanda bu nubatshibila kimu, biabia namu anukatshibilwa, na kihimo kiohiminā’kio akikakuhiminwa kabidi.

³ A nkinyi kiotala kasomwa ke mwiiso dia mukwenu, anka tonangushena mulamba wi mu diobe eiso?

⁴ Okalungula mukwenu na minyi’shi, nkutushe kasomwa ke mwiiso diobe, anka tonangushena mulamba wi mu diobe eiso?

⁵ Obe nsesa, badila kwibedi kutusha mulamba wi mwiiso diobe, biabia okamono bibuwa mwa kukatusha kasomwa ke mwiiso dia mukwenu.

⁶ Tanuhanga mbwa kilamunwa-ki-kishila, sunga nkwela mabwe aneme ku mpala kwa ngulube, tala ayiashina mushi mwa ngwa yabo, ayialulukye kwinuhalakasha namu.

⁷ Nutekye, akikenuhebwa, nukimbe, anukamono, tutulai akikenushitwilwa.

⁸ Mwanda muntu ese atekye atambulā, n’e akimbi amono, n’e atutulā akikamushitwilwa.

⁹ Muntu kinyi w’anwe, su mwan’e amutekye biashi akamuha ebwe?

¹⁰ Sunga atekye mushiha akamuha nyoka’nyi?

¹¹ Biabia, su anwe bianudi bekale be bubi, anwiuku kuha bana benu biabuntu bibuwa; Shyenu E mwiilu takakidi kuha bantu abamutekye bintu bibuwa’nyi?

¹² Binyibiabia moso anukyebe bantu kwinukitshina, anwe namu nwibakitshine: mwanda uno nyi mukanda-wa-bishila na batemuki.

¹³ Twelai mu kibelo kihela, mwanda kibelo nkikata n’eshinda di ngabale abiishwa ku lwila, na bantu be bungi abatwela kwanka.

¹⁴ Mwanda’kia kibelo akīshwa ku muwa-autala, nyi nkibuname, A! kintshantshantsha, n’eshinda dihela hamune, n’abakedimono be bahela.

¹⁵ Dimukai batemuki bamadimi abafiki kwanudi mu misokya ya mikoko, anka munda mwabo be bu tumishi twi na bukyelo.

¹⁶ Anukebatundula ku bikuba biabo: Bantu abakulu bikuba bia nfinyo ku milobo su? Sunga bikuba bia kikuku ku nahimbia?

¹⁷ Anka biabia, mutshi woso wibuwa auheya bikuba bibuwa; anka mutshi ubi auheya bikuba bibubi.

¹⁸ Mutshi wibuwa tawiuku kuha bikuba bibubi, sunga mutshi ubi tawiuku kuha bikuba bibuwa.

¹⁹ Mutshi woso ushī auha bikuba bibuwa aushindjibwa hashi, welwe mu kālo.

²⁰ Biabia anukebatundula ku bikuba biabo.

²¹ Shī muntu ese autemuna’shi, Nfumwetu, Nfumwetu, akatwele mu bufumu bwa mwiilu ooo, ank’e akitshi akikyeb’eshimba dia Shami E mwiilu.

²² Mu diadi’efuku bantu be bungi abakanamba’shi: A Nfumwami, a Nfumwami, tatwibatemukile bu mutemuki mwishina diobe? Tatwibabinge bikudi bibi mwishina diobe su? Tatwibakitshine bikitshino bi bungi bia bilengeleshe?

²³ Biabia, nankebalungula’shi, tanyinwiuku sunga mpahelahela, katukai kwandji, anwe bakitshi ba bubi.

²⁴ Binyibiabia, ese muntu ahusha yino myanda yande, eyikite, nankamuhwandjikisha bu muntu a kalolo, baibakile nshibo ye ha lubwebwe:

²⁵ Mpeshi yibanokyele, bieshi bibaule, bihahi bibafikile, bibakuhile ku yaya nshibo, anka tangihone, mwanda yibadi yibakwe ha lubwebwe.

²⁶ Muntu ese namu ahushe yino myanda yande, n’e tayikitshi: Akahwandjikilwa bu muntu e mutshikame ubaibakile nshibo ye ha misengyeya.

²⁷ Mpeshi yibanokyele, na bieshi bibaule, na bihahi bibafikile, bibakuhile ku yaya nshibo, n’ayo yibahone; na kuhona kwayo kubadi kukata kwi moo.

²⁸ Habahudishe Yesu yino myanda, bibumbu bia bantu bibakanyine lulambukisho lwe.

²⁹ Mwanda E bebalambukishe bu muntu badi na matalwa, kushī bu bafundji-ba-mikanda.