Mateo 5 - KILOMBENO KIHYA KIA NFUMWETU YESU KIDISITU

¹ Habamwene bibumbu, bakamine mu ngulu; habashalele, bana be ba bukishi babafikile kwadi.

² Babulwile mu kanwa mwe kwibalambukisha’shi:

³ Mwabi kwi balanda mwishimba, mwanda bufumu bwa mwiilu mbwabo.

⁴ Mwabi kwibo abanyeng’eshimba, mwanda abakekala basambībwe,

⁵ Mwabi kwi’bo bahohele, mwanda abakahyana nsenga.

⁶ Mwabi kwi’bo be na nsala na nyota bia kululama kwishimba, mwand’abakekuta.

⁷ Mwabi kwi’bo be na lusa, mwanda abakakwatshilwa lusa.

⁸ Mwabi kwi’bo be selelee ku mashimba, mwand’abakamono Efile Mukulu.

⁹ Mwabi kwi’basungwa ba bantu, mwanda abakaudikwa’shi, mbana b’Efile Mukulu.

¹⁰ Mwabi kwi’bo abamweshibwa malwa ha mwanda wa kululama kw’eshimba; mwanda bufumu bwa mwiilu mbwabo.

¹¹ Mwabi kwanudi h’ābenukaa, na h’ābenusabula, na h’ābenudimbila madimi oso, ha mwanda wande.

¹² Sehelai, nusangala bikata, mwanda bwedi bwenu mbukata mwiilu, mwanda babadi abamweshe malwa batemuki anka biabia bababadidile kwibedi kwenu.

¹³ Anwe nwi mungwa wa hanohansenga, anka su mungwa ubatukuluka, aukatu naminyi? biabia tawi bisumanga, anka kwiukatusha hashi, na kwashinwa ngwa ya bantu.

¹⁴ Anwe nwitata dia hanohansenga. Kibalo kībakwe ha ngulu ta kifībwa.

¹⁵ Bantu namu ta ’bosha etala kwiditula mushi mw’ekumbo, anka hanundu ha mutshi w’etala, biabia adimunyika kwi boso be mu nshibo.

¹⁶ Etata dienu dikale kumunyika biabia ku mpala kwa bantu’shi, bamone bikitshino bienu bibuwa, batumbishe namu Shyenu E Mwiilu.

¹⁷ Tanutentekyeshanga’shi: Ami nafiki kushimangisha mukanda-wa-bishila, sunga ngwa batemuki: Nki mufikye kulwisha, anka kwiyikumbasha.

¹⁸ Mwanda binyibinyi, nenulungula ’shi: mpā n’ahakashimina eīlu na nsenga, sunga kahelahela ke ntshantshantsha, su ke nyunyunyu ka mukanda-wa-bishila takakashimina sunga kahelahela kenyi, mpā na haukakumbana.

¹⁹ Ese muntu akashūla kamune’nka kahelahela ka yino milangilo, na kulambukisha bantu biabia, e akatemunwa bu kentshantshantsha mu bufumu bwa mwiilu; anka ese muntu akwiyilama na kwiyilambukisha, na mwinyi akatemunwa bu mukata mu bufumu bwa mwilu.

²⁰ Mwanda nenulungula’shi, su kululama kw’eshimba kwenu ta nkukile kwa bafundji-ba-mikanda na Bafadiseo, tanukatwele mu bufumu bwa mwiilu.

²¹ Nubahushishe bibakwile kwibakala’shi: Toihanga muntu, anka ese muntu akaihanatadi hehi ha kwelwa mu kimu.

²² Anka’mi nenulungula’shi: Muntu ese e na mukwabo nsungu bisumanga, tadi ha kwelwa mu kiniu, anka muntu ese akatemune mukwabo Laka, tadi hehi ha kutushwa ku kilumbeno kia bakulu, anka muntu ese akākula’shi: Obe we mulubi, tadi hehi ha kwelwa mu kālo ka Ngehena.

²³ Binyibiabia su ofiki na buntu bwobe ku kitahilo, otentekyeshe hanka’shi, mukwetu e nami mwanda:

²⁴ Olekye buntu bwobe ku mpala kwa kitahilo, wende, okabadile kulombana na mukwenu, biabia ofikye olambule buntu bwobe.

²⁵ Olombashe n’odi n’e luhuna bukidi, h’okī n’e mwishinda, tala, kutshina’shi, su kihindji kikampanda, winyi n’obe luhuna akakufisha kwi nsushi, na nsushi akakufisha kwi mpulushi, n’obe okelwa mu nshibo ya lukano.

²⁶ Binyibinyi, nakuamba’shi: Tokatuka mwanka mpā na hokafuta kishio kioso, sunga ekuta dimune kushala.

²⁷ Nubahushishe mwa kibakwilwe kwi ba kala’shi: Tokitanga lusandji.

²⁸ Anka’mi nenulungula’shi: Muntu ese atala mukashi meso mu kumukyebe, bahu kukita n’e lusandji kala mwishimba die.

²⁹ Su eiso diobe dibalume dibakukokosha, tondobola’dio, wedisumbule, mwanda wa kushimisha kintu kimune kia mbidi yobe, nkukila kwelwa mbidi yobe yoso mu Ngehena.

³⁰ Su mboko yobe yibalume yibakukokosha, tshibayo, weyisumbule, mwanda kushimisha kintu kimune kia mbidi yobe nkukile kwelwa mbidi yobe yoso mu Ngehena.

³¹ Kibakwilwe’shi: Ese muntu takatusha mpian’e, amuhe mukanda wa bulunda bubafu:

³² Anka’ mi nenulungula’shi: Muntu ese akatusha mpian’e anka su ha mwanda wa lukyebanokyebano, biabia amwikasha busha lusandji, na yawa muntu akabamba yawa (mukashi) mutushwe akekala bu sha lusandji namu.

³³ Nubahushishe kabidi kibākwile ba kala’shi: Totshihanga bia madimi, anka kitshinamitshiho yobe kwi Yehowa.

³⁴ Anka’mi nenulungula’shi: Tanutshihanga, sunga kwa mwiilu, mwanda di luhun’a nsulu lw’Efile Mukulu.

³⁵ Sunga kwa ha nsenga; mwanda nyi kitulo kia ngwa ye; sunga kwa Yelusalema, mwanda ki kibalo ki kituka kia Nfumu mukata.

³⁶ Sunga kutshiha’shi, mpā na bi ku mutwe w’obe, mwanda oshīuku kwalula lunyenye lumune su mbu lutoka, su mbu lufita, ooo.

³⁷ Anka misambo yenu yikala’nka’shi, uolo, uolo, ayoyo, ayoyo; yoso ayikidi yaya, ayifiki ku bubi.

³⁸ Nubahushishe mubalungudibwe’shi: Eyiso kwī’yiso, eino kwi eino;

³⁹ anka’mi nenulungula’shi: Tanukingisha bubi, anka muntu ese akakuhila luhi kwitama dibalume omwalulwile dingi namu.

⁴⁰ Su muntu akwimukisha ku kimu, akwata nsumishe yobe, mulekyele ekotshi diobe namu.

⁴¹ Muntu ese namu akukwiyisha luendo lwa kilometre kimune’nka, nda n’e bibidi.

⁴² Au akutekye kintu, omuhe; na kwi’wa akyebe kukwashima tomufutalanga.

⁴³ Nubahushishe mubalungudibwe’shi: Ikala na mwin’obe kifulo, shikwa e n’obe luhuna.

⁴⁴ Anka’mi nenulungula’shi: Ikalai na kifulo n’abo be nenu ngo, tulai mwabi kwi’bo abenuuele muloa; nukita kwi benushikwa, bibuwa, nwibatekyele’bo abenumwesha malwa.

⁴⁵ Bianudia kwikala bana ba Shyenu E mwiilu, mwand’E atushā nguba kwi bantu be bubi na kwi bebuwa, anoshā mpeshi kwi bantu balulame na bashi balulame.

⁴⁶ Mwanda su anwe nwi na kifulo anka kwi be nenu kifulo, bwedi bwenu bwi kunyi? Basangishi-bamilambu tabakitā hamune su?

⁴⁷ Su anwe anwimuna namu anka bakwenu, anukile bangi bantu na minyi? Basangishiba-milambu namu tabakita biabia su?

⁴⁸ Binyibiabia nwikale bakumbane, bu bi Shyenu E mwiilu E mukumbane.