Mateo 3 - KILOMBENO KIHYA KIA NFUMWETU YESU KIDISITU

¹ Mu aa mafuku mubafikile Yoano mubatshishi, balungwile w’Efile mu mahia-a-kabāka a Yudea’shi:

² Nwilangei’mashimba mwanda wa bufumu bwa mwiilu tabudi hehi.

³ Au nyi winyi abakwile kwi mutemuki Esaiye’shi: Eyi dia’wa adiele musase mu kabāka’shi: Lumbulai eshinda dia Yehowa, lulamishai biki īlo bie susā.

⁴ Winyi Yoano badi na bifwalwa bia buaa bwa (nyama) shamo, na kikoba kia musekya mu kifuka kie, na bidibwa bie bibadi nshiye na būki bwa mahia.

⁵ Biabia bena Yelusalema abatukile kwadi, na boso iba mu Yudea na ku mahia oso e hehi ku Yodano.

⁶ Ababatshishwe kwadi mu Yodano, bakwete kusokola milwisho yabo.

⁷ Anka e habamwene Bafadeseo bebungi na Basadusea, babafikile kwadi mu kubatshishibwa, bebalungwile’shi: Anwe ba kifuko ba manyoka, a nanyi benudimwine kusuka bukyelo bwanafikye.

⁸ Nuhe bikuba abihwandjikila kwalula kwishimba.

⁹ Tanutentekyeshanga kwakula munda mwenu’shi: Twi na Abalahama bu shyetu, mwanda nenulungula’shi: Efile Mukulu euka kubusha mabwe ku bana ba Abalahama.

¹⁰ Binobino kabengyele kabatudibwa ku mashina a mitshi, biabia mutshi woso aushyauha bikuba, aukatshibībwa, welwe mu kālo.

¹¹ Binyibinyi ami nenubatshisha mu mema a ha kwilanga kwishimba, anka’wa andondo munyima munkile’mi bukata, bilato bie ami nkimuhwandjikile kwibitwala, ooo; e akenubatshisha mu Kikudi-E-Selelee na kālo.

¹² Kihehwilo kie ki mwiasa die, akatosha selelee ha mutāla he, akaumbula misekye ye mu mutala, anka akashikye mpaha mu kālo kashyakashimibwa.

¹³ Henyihaha Yesu bakatukile ku Ngadilea, bafikile ku Yodano kwi Yoano kubatshishwa n’e.

¹⁴ Anka Yoano batune’shi: Ami nyi na lukalo kubatshishibwa n’obe, n’obe tofiki kwandji’mi?

¹⁵ Biabia Yesu bamwalulwile’shi: Kumina’, nka biabia binobino; mwanda ubetuhwandjikile’twe kukumbasha kululama kwishimba koso. Henyihaha bamukuminyine.

¹⁶ Na Yesu hababatshishwe, babukile henyihaha mu mema; talangai, eilu dibamubulukile, bamwene Kikudi-E-Selelee e Efile Mukulu ayiki bwikutshi, bamutentamine.

¹⁷ Talangai, eyi dibatukile mwiilu’shi: Uno nyi Mwan’ande andji mukumine, mwadi e nyi na musanku.