Mateo 23 - KILOMBENO KIHYA KIA NFUMWETU YESU KIDISITU

¹ Henyihaha Yesu bakwile kwi kibumbu kia bantu na kwi bana-be-ba-bukishi’shi:

² Bafundji-ba-Mikanda na Bafadiseo abashalā ha kishalelo kia Mosesa.

³ Biabia bioso bia benulungula kukita, nwibikite, anka tanulondanga bikitshino biabo, mwanda’bo abākulā, anka tabakitā.

⁴ Mwanda abānya bita bi bushito, bi bukoho ha kutwala; abebitulu ha mahampa a bantu, anka’bo (ba na bene) tabakyebe kwibisanyisha sunga na munwe wabo umune.

⁵ Anka bikitshino biabo bioso biabakitshi mbia kutadibwa na bantu: abatamishā nfalakatele yabo, abatamishā namu masasala a bifwalwa biabo;

⁶ abasehelā na mbalo yineme ha bidibwabia-kusehela, na bishalelo bia ku mpala mu bitumbwilo;

⁷ na kwimunwa ku maboko mu bisalwe, na kutemunwa na bantu’shi: Labi, Labi,

⁸ Anka’nwe tanukuminanga kwitaminwa bu Labi; mwanda umunenka nfumwenu nyi Kidisitu, n’anwe nwi bana ba muntu umune.

⁹ Tanwitanyinanga muntu a ha nsenga bu nshenu; mwanda umune nshenu E mwiilu.

¹⁰ Tanwitanyinanga namu bu banfumu, mwanda umune nfumwenu, E Kidisitu.

¹¹ Anka yawa mukile bukata munkatshi mwenu, ekale bu mufubi enu.

¹² Muntu oso aketumbisha e na mwinyi akaheleshwa; e namu akehelesha akatumbishibwa.

¹³ Anka mpombo kwanudi Bafundji-ba-Mikanda, na Bafadiseo, bansesa! mwanda anushitshila bantu ku Bufumu bwa mwiilu: mwanda tanutwele mwanka anwe bana bene, na baba abakyebe kutwela mwanka anwibaheleshā.

¹⁴ Mpombo kwanudi Bafundji-ba-Mikanda na Bafadiseo, bansesa! mwanda anufinā mashibo a bana bakashi-ba-bafwe, na kuteka nteko yila mwanda wa bunsesa bwenu: binyibiabia anukatambula kuhoneshibwa kukila bukata (ku kimu).

¹⁵ Mpombo kwanudi Bafundji-ba-Mikanda, bansesa! mwanda anwifunyā hoso ha mema, na lia mahia, mwanda wa kwalula muntu’mune ku luhese lwenu, na hanubamwalula, anumwikasha bu mwan’a Ngehena mwinukile bubi misusa yibidi.

¹⁶ Mpombo kwanudi, balomboshi ba bampofu, anwakula’shi: Ese atshihi ku ntempelo mutshiho’shi, kwi bu bisumanga; anka ese atshihi kilonda kia nsahabu kia mu ntempelo, e na kishio.

¹⁷ Anwe balotakane na bampofu; a nkinyi kikile bukata, kilonda kia nsahabu’nyi, su ntempelo ayihatulusha selelee kilonda kia nsahabu.

¹⁸ Ese namu atshihi ku kihayilo kia milambu’shi: ki bu bisumanga; anka ese atshihi mulambu utentekwe hanka, e bahīla ’mwanda.

¹⁹ Anwe balotakane na bampofu: nkinyi kikile bukatā, mulambu’nyi, su kihayilo kia mulambu akihatulusha selelee mulambu?

²⁰ Binyibiabia ese muntu akatshihi kihayilo kia mulambu, biabia batshihila ku kia, mpaa na ku bitentekwe bioso bi hanka.

²¹ Ese namu akatshihi ku ntempelo, batshihila ku’ya (ntempelo) mpaa, na yawa ashala mwanka.

²² Yawa namu akatshihi kwiilu batshihila ku luhun’ānsulu lw’Efile-Mukulu, na kwi’wa ashalā hanka.

²³ Mpombo kwanudi Bafundji-ba-Mikanda na Bafadiseo, bansesa! mwanda anulambula ki’ekumi kia mutshi wa kyēnyēnyi, na kia luenyi, na kia kikotshi, anka nubalekye yaya myanda yikile bukata ya mukanda-wa-bishila’shi, kutshiba kwa myanda, na ya lusa, na ya lukuluhilo; yino’nyi yibadi yibenuhwandjikile kukitwa, na kushī kuleka yikwabo yishīyikitwe.

²⁴ Anwe balomboshi bampofu, anukakamina ha kumina keshi; ngamedia anumuhitumuna,

²⁵ Mpombo kwanudi Bafundji-ba-Mikanda na Bafadiseo, bansesa! mwanda anutoshā ha mbidi hasha ha kihulu na ha luanda, anka munda ’muule na bunyenanyi na kukishakisha (kwa myanda).

²⁶ (Obe) Mufadiseo mpofu, banda kutosha kwibedi munda mwa kihulu na mwa luanda’shi, hasha ha’bio mbitoshwe namu.

²⁷ Mpombo kwanudi Bafundji-ba-Mikanda na Bafadiseo, bansesa! mwanda nwi bahwandjikile bu mashama atoshwe soo, hanundu ahamweka buwa bukalabale, anka munda muule na mifufwa ya bafwe, na kushūla kwa bishila koso.

²⁸ Anka hamune anwe namu anumweka ku mpala kwa bantu bu balulame, anka munda mwenu ’muule ndaa na bunsesa na kushiula kwa bishila.

²⁹ Mpombo kwanudi Bafundji-ba-Mikanda na Bafadiseo, bansesa; mwanda anwibakisha bilele bia batemuki, anulengye mashama abalulame;

³⁰ anwakula namu’shi: Su tubekele mu mafuku a bashyetukulu, tatubadia kulombana n’abo ha mwanda wa mase a batemuki, ooo,

³¹ Binyibiabia nwi tumonyi kwanudi anwe bana bene’shi; nwibana b’abāabayihayilabatemuki.

³² Biabia nukumbashei kihimu kia bashenu.

³³ Anwe manyoka, na tunkwatamanwi twa manyoka, anwiuku na minyi mwa kuhanda ku kuhoneshibwa kwa Ngehena?

³⁴ Henyihaha nenutumina batemuki na basha binangu, na Bafundji-ba-Mikanda; bamo b’āba anukebayiha, na kwibahudika ku mutshi uhingakane; bangi namu anukebakuhila mu bitumbwilo bienu, na kwibamwesha malwa ku kibalo ku kibalo.

³⁵ Biabia mase oso abantu balulame abasumbukilwe hashi, afiki hanudi, kubanga ku mase a Abele badi mululame, mpaa na kufisha ku mase a Sakadiya mwan’a Balakiasa, winyi anubaihayile hankatshi ha ntempelo na kihayilo kia mulambu.

³⁶ Binyibinyi nenulungula’shi: Bino bioso abikafiki ha tunkwatamanwi tuno.

³⁷ A Yelusalema, Yelusalema, (obe) waihā batemuki, ōsā babakutumina mabwe, misusa yinga yinadia kukongola banab’obe, bu amukongwela nsolo bana be mushi mwa mbaba ye, anka’nwe tanwi bakyebele’nwe, ooo!

³⁸ Talai nshibo yenu yibenulekyelwa musadi.

³⁹ Mwand’ami nenulungula’shi: Tanuka’mono dimonyi mpaa n’ahanukākula’shi: Yaw’ā mwabi ngiuafiki mwishina dia Yehowa.