Mateo 22 - KILOMBENO KIHYA KIA NFUMWETU YESU KIDISITU

¹ Yesu bebālulwile dimonyi na miele, bakwile’shi:

² Bufumu bwa mwiilu mbuhwandjikile na nfumu kampanda, batekyele mwan’e bidibwa bia kubamba.

³ Batumine bahika be kwitanyina’bo abakyebibwe ku bidibwa; ank’abahele kufika.

⁴ Dimonyi, batumine bangi bahika’shi: Lungulai abetanyinwe’shi; Talai, nahu kulumbula bidibwa biande, ñombe, na nyama yande yinune ngihaibwe, bintu bioso mbimēne, fikai kwibambo.

⁵ Ank’abo abasābulanga, abayile mashinda’bo, umune kwifuba die, mungi ku būsunga bwe;

⁶ Bangi namu abashēle abakwete bahika be, abebakitshine bibubi, na kwibehā.

⁷ Anka nfumu habahushishe biabia, bakwatshile nsungu; batumine efita die, abehayile baba bantahanyi, kibalo kiabo abekishikile kālo.

⁸ Henyihaha bakwile kwi bahika be’shi; Bi’ebambo mbimēne, anka’abo abadi betanyinwe tababadi bahwandjikile, ooo.

⁹ Binyibiabia, ndai ’masanka a misese, na boso banukasañana nwibetanyine ku bidibwa bi’ebambo.

¹⁰ Biabia baba bahika abayile mu misese, abakongwele boso bābasañene, bebubi na bebuwa; na nshibo y’ebambo yibadi yiule na bakyebībwe.

¹¹ Habatwelele nfumu mu kutala bakyebībwe, bamwene mwanka muntu shīmufwale mutwelo w’ebambo.

¹² Bamwihwishe’shi: A kūku, botwele na minyi muno koshī na mutwelo w’ebambo? N’e bakutshilwe biakwakula.

¹³ Henyihaha nfumu balungwile bafubi be’shi; mwanyei ku maboko na ku mikolo, numwibweshe, numusumbule mu mufito wi fututu hasha. Akemwīkala na kudila na kwisuma meno.

¹⁴ Mwanda bebungi abetanyinwe, anka buhela abasangwilwe.

¹⁵ Henyihaha Bafadiseo abayile mu kumudila lukuku lwa kumwanyina ’moso mwakakwila.

¹⁶ Biabia abatumine kwadi bana babo ba bukishi, na Bena Heloda hamune’shi: A Mulambukishi, atwiuku’shi, obe we a binyibinyi, olambukisha eshinda di’Efile-Mukulu mu biabinyibinyi; sunga totshinyi muntu: mwanda tobasukā mahala a bantu, ooo.

¹⁷ Binyibiabia etulungule motentekyesha’shi; Nyi nkishila kuha Kesala mulambu su mbisumanga?

¹⁸ Anka Yesu bashingulwile bubi bwabo, bakwile’shi: A nkinyi kianuntompo anwe bansesa?

¹⁹ Ndeshei nfalanga ya mulambu. Biabia abamufwishishe ndenadi.

²⁰ E bebālulwile’shi: Kino kihwandjikisho na kifundjilo mbia anyi?

²¹ Abamulungwile’shi: Nyi mbia Kesala. Henyihaha bebālulwile’shi: Lambulai biabia kwi Kesala bintu bia Kesala; na kw’Efile-Mukulu namu lubwilai bintu bi’Efile-Mukulu.

²² Hababahushishe (bino bishima), abakanyine; abamulekyele, abayile.

²³ Mu dinyi efuku diadia Basadusea abafikile kwadi, abo abakulā’shi: Ta kwi lusangukilo lwa ku lufu; abamwihwishe’shi:

²⁴ A Mulambukishi, Mosesa bakwile’shi: Su muntu bafu, te na bana, mukwabo mulume akabamba mukashi e, amutandjile bana.

²⁵ Tala, munkatshi mwetu mubadi bana-balume musambobidi b’ēfu dimune; A kwibedi hababambile mukashi bafwile, na ha mwanda tabadi na bana, balekyēle mukwabo mpian’e,

²⁶ Biabia namu a kabidi anka hamune, akasatu namu mpaa n’ā musambobidi.

²⁷ Kumongo kwa boso, mukashi winyi bafwile namu.

²⁸ Binyibiabia ha lusangukilo lwa bafwe, akekala mukashi a nanyi a ku’ba musambobidi? mwanda boso babadi n’e.

²⁹ Yesu bebālulwile’shi: Anwe anuluba mwanda wa kukutwa kwiuka Bifundwe bi’Efile, sunga katshintshi k’Efile-Mukulu.

³⁰ Mwanda ha lusangukilo lwa ku lufu, tababambā, sunga mbahebwe mwibambo, anka’bo be bu bamwikeilu b’Efile-Mukulu be mwiilu.

³¹ Anka ha mwanda wa lusangukilo lwa bafwe, tanwi babale akia kibākwile Efile-Mukulu kwanudi’shi:

³² Ami nyi Efile-Mukulu a Abalahama, n’ā Isaka, n’Efile-Mukulu namu a Yakoba? Efile-Mukulu te Efile-Mukulu a bafwe, ooo, anka a abatala.

³³ Habahushishe kibumbu biabia, babakanyine lulambukisho lwe.

³⁴ Anka habahushishe Bafadiseo’shi, E bauminyishe Basaduseo, abekoñene hamune.

³⁵ Biabia, umune abo, muhatudi a bishila, bamwihwishe (lwihusho) lwa kumutompa’shi:

³⁶ A Mulambukishi, mulangilo kinyi ukile milangilo yoso bukata mu mukanda wa bishila?

³⁷ Yesu bamwālulwile’shi: Okafule Yehowa, Efile-Mukulu obe kifulo n’eshimba diobe dioso, na muwa wobe woso, na binangu biobe bioso.

³⁸ Uno nyi mulangilo ukata wa kwibedi.

³⁹ Wa kabidi wi hamune na uno’shi; okafule mukwenu kifulo, bu modi mwifule obe na mwinyi.

⁴⁰ Ha yino milangilo yibidi nyi ngihudikwe mukanda-wa-bishila na ya Batemuki.

⁴¹ Bafadiseo hababadi bekoñene hamune, Yesu bebehwishe’shi:

⁴² Anutentekyesha kinyi ha mwanda wa Kidisitu? E mwan’a anyi? Babamwālulwile’shi: E mwan’a Dafidi.

⁴³ E bebalungwile’shi: A biabia’nyi, mu Kikudi-E-Selelee Dafidi amutemuna’shi bu Nfumu na minyi’shi;

⁴⁴ Yehowa bakwile kwi Nfumwami’shi: Shala ku mboko yande yi balume, mpaa na hangalula be n’obe ngo, bu kitudilo kia ngwa yobe?

⁴⁵ A biabia’nyi, su Dafidi amutemuna bu Nfumw’e ekala’nyi bu mwan’e na minyi?

⁴⁶ Kubanga ku’diefuku, mpaa na a kumpala, takubadi muntu beukile kumwalula sunga kishima kimune, tabakumanga namu kumwihusha lungi (lwihusho).