Mateo 20 - KILOMBENO KIHYA KIA NFUMWETU YESU KIDISITU

¹ Mwanda Bufumu bwa mwiilu mbwifwane na sha nshibo, batukile namashika ese mu kutula bafubi mwifuba die dia nfinyo.

² Habahwile kulombashena n’abo mwa kwibafutshila nfalanga ya ndenadi kwifuku, bebatumine mwifuba die.

³ Ha nsa yisatu E batukile, bamwene bangi bemane bisumanga ku kisalwe;

⁴ Bebalungwile’shi: Ndai anwe namu mwifuba, na kioso akilombana, nankenuha’kio; N’abo abayile kwanka.

⁵ Dimonyi, batukile hehi na nguba mitwe, na ha nsa yisatu ya kiolwa bakitshine mpamune.

⁶ Habafikile nsa hehi yitano, batukile, bahetele bangi bemane bisumanga; bebalungwile’shi: A nkinyi nwibemane hano bisumanga ngub’ese?

⁷ Abamwalulwile’shi: Mwanda takwi muntu betuhele mufubo. E bambile’shi: Ndai namu mwifuba dia nfinyo; na kioso akilombana nankenuha’kio.

⁸ Biabia nguba hakuhona, sh’ēfuba balungwile mulami a bintu bie’shi: Itanyina bafubi, webahe efuto diabo, kubanga na a kunfundilo, mpaa n’a kwibedi.

⁹ Habafikile baba abatudilwe mufubo ha nsa yitano, abatambwile muntu ndenadi, muntu ndenadi.

¹⁰ Anka habafikile baba ba kwibedi, abatentekyeshe’shi: Atwe atukakila kutambula; n’abo namu abatambwile muntu ndenedi, muntu ndenedi.

¹¹ Habadi abaditambula, tabamumūna sh’efuba’shi:

¹² Bana ba ku nyima abafubile nsa umune, n’obe, bwebahwandjikisha hamunenka n’atwe abatuhutanga na kanya ngub’ese.

¹³ Anka E bālulwile kwi umune a abo’shi: A kūku, nkimukukitshine shī buwa, ooo, atatubalombashene efuto dia ndenadi umune su?

¹⁴ Ata kiakia nkiobe, wende; nankaha uno a kunfudilo munakuhela’be.

¹⁵ Bi kishila kukita bintu biande mwa nkyebela ami na mwinyi su? Eiso diobe di bubi su mwanda’mi nyi buwa’nyi?

¹⁶ Biabia e a kunfudilo akekala bu a kumpala, n’a kumpala akekala bu a kunfudilo; mwanda be bungi abetanyinwe, anka bahela abasangulwa.

¹⁷ Yesu hakukamina ku Yelusalema, bātshile bana-be-ba-bukishi buhenka bwabo mwishinda, bebalungwile’shi:

¹⁸ Talangai, biatwende ku Yelusalema, na Mwan’a Muntu abakamwihulukila kwi batshiite-bakwidi bakata, na kwi bafundji-ba-mikanda, n’abakamuhīsha mpaa na ku lufu.

¹⁹ Abakamutula kwi Badjentaila, mu kumusenga, na kumukuhila, na kumubamba ha mutshi uhingakane, na kwifuku dia kasatu akasanguka dimonyi.

²⁰ Henyihaha kubafikile kwadi, nyin’a bana ba Sebede na bana be balume, kwete kumulangwila, na kukyeba kintu kwadi E.

²¹ Bamwihwishe’shi: Okyebe kinyi? E bamwā-lulwile’shi: Akula bano bana bande balume babidi, bashale mu Bufumu bwobe, umune ku mboko yi balume, mungi ku mboko yi bakashi.

²² Anka Yesu bālulwile’shi; Tanwiuku bianutekye. Anwiuku kutoma kwikoho diankatomo’mi su? sunga nkubatshishwa na lubatshisho lwankabatshishwa n’alo’nyi? Abamulungwile’shi; Atwiuku.

²³ E bebalungwile’shi: Anukatomo binyibinyi kwikoho diande, anukabatshishwa na lubatshisho lwanbatshishibwa n’alo; anka kushala ku mboko yande yi balume na ku yi bakashi, tankwande kuha, ooo, anka akikahebwa baba babalumbulwilwe kwi Shami.

²⁴ Habeuhushishe ba b’ekumi, abakwatshile nsungu kwi bakwabo babidi.

²⁵ Anka Yesu bebaitanyine kwadi E’shi: Anwiuku’shi, banfumu ba Badjentaila abebamunu namu nganka Badjentaila, na baba nyi bakata abebamunu na matalwa.

²⁶ Anka takikekalanga biabia munkatshi mwenu, ooo; anka muntu ese akukyeba kwikala bu mukata munkatshi mwenu, ekale bu mufubi enu;

²⁷ Muntu ese namu akyebe kwikala hanundu henu, ekale bu mpik’enu:

²⁸ Mwanda Mwan’a Muntu tamufwile kufubilwa ooo; anka kwibafubila, na kuhana muwa w’e bu nkūlo ya be bungi.

²⁹ Habadi abatuku ku Yediko, kibumbu kikata kibamulondele.

³⁰ Talangai, bampofu babidi abadi bashale ku bukunkula kw’eshinda; habahushishe’shi, Yesu ngiu akidi, abēle musase’shi: Etufwile lusa, obe Nfumwetu, Mwan’a Dafidi.

³¹ Binyibiabia kibumbu kibebatosheshe’ shi; Uminai; anka’bo abanyishishe kwela musase’shi: Etufwile lusa obe Nfumwetu Mwan’a Dafidi.

³² Yesu baimene, bebetamine’shi: A nkinyi kianukyebe’mi nyi nukitshine?

³³ Abo namu’shi: A Mwanana, meso etu abulukye

³⁴ Biabia Yesu bebakwatshile kanye, bebakumine meso abo; biabia, kahindji n’āka meso abo ababulukile; Tabamulondo.