Mateo 17 - KILOMBENO KIHYA KIA NFUMWETU YESU KIDISITU

¹ Habakile mafuku asamombo Yesu bātshile Petelo, Yakoba, na mukwabo Yoano, bakamine n’abo mu ngulu yila, buhenka bwabo.

² N’E bālulukile kumpala kwabo; mpala ye yibahenyahenya bu nguba, na bilamba bie bibālulukile bitoka bu kanya.

³ Talangai, kubebamwekyelwe Mosesa na Elaidja, abadi abākula n’e.

⁴ Henyihaha Petelo bālulwile kwi Yesu’shi: A Nfumwetu, mbibuwa atwe kwikala hano; s’okyebe, tushimikye bitanda bisatu hano; kimune nkiobe, kingi kia Mosesa, na kikwabo’nyi kia Elaidja.

⁵ Habadi kwete kwakula, talangai, ekumbi ditoka selelee dibebahutshile; talangai, eyi dibatukile mwikumbi’shi: Uno nyi mwan’ande a kifulo andji mutokyele mwishimba, numuhushei.

⁶ Habedihushishe, bana-be-ba-bukishi, abahonene hashi ha mahala’bo, abatshinyine bimoo.

⁷ Binyibiabia Yesu bafikile bebakumine, bakwile’shi: Ebwei, tanutshinanga.

⁸ Hababulwile meso abo, tabamwene muntu, anka Yesu buhenka.

⁹ Habadi abayiki ku ngulu, Yesu bebakamikile’shi; Tanulungulanga muntu mwanda wa kimonwa, mpaa n’ahakasanguka dimo ku lufu Mwan’a Muntu.

¹⁰ Bana-be-ba-bukishi abamwihwishe’shi: A binyibiabia, a nkinyi bafundji-ba-mikanda abākula’shi: Elaidja badi akubadila kufika?

¹¹ Yesu bebālulwile’shi: Binyibinyi Elaidja badi akubadila kufika mu kulumbula bintu bioso.

¹² Anka’ mi nenulungula’shi: Elaidja tahwile kufika kala; anka’bo tabamushingule; abamukitshine bioso bia babadi abakyebele. Anka biabia namu Mwan’a Muntu akafwambuka kwabadi.

¹³ Henyihaha bana-ba-bukishi abashingulwile’shi, Etwakula mwanda wa Yoano Mubatshishi.

¹⁴ Habafikile kwi kibumbu, kubafikile muntu kwadi, bamufukamine, bakwile’shi:

¹⁵ A Mwanana, fwila mwan’ande mulume lusa; mwanda e na mombe, amono malwa e moo: misusa na misusa ahono mu kālo, na mu mema hamunenka.

¹⁶ Namufwishishe kwi bana-ba-bukishi bobe, n’abo abakutshilwe kumuhasha.

¹⁷ Henyihaha Yesu bālulwile’shi: A ee, anwe kifuko kishī na lukumino, na basha mpuha; kihindji kiankekala n’enu kinyingye ki na minyi? mufwishe kuno kw’andji’mi.

¹⁸ Biabia Yesu basashile mukishi; n’e bakatukile mwanka; na mwana bahashishwe ha kiakia kihindji kīnyi.

¹⁹ Henyihaha banaba-bukishi abafikile kwi Yesu ku luhese, eshi: A nkinyi kiatushībeukye kumutusha?

²⁰ Yesu bebalungwile’shi; Mwanda wa kushīlukumino lwenu; mwanda binyibinyi nenulungula’mi’shi: Su anwe nwi na lukuluhilo aluhwandjikila na katete ka mutāde, anukalungula yino ngulu’shi, katuka kuno wend’ekwaa, n’ayo ayikakatuka; takukekala kintu akikenukambila.

²¹ Sunga biabia, kino kihaso (kia mukishi) taukatukanga anka ku nteko na kushila kwa biakudia.

²² Habadi bekale mu Ngadelea, Yesu bebalungwile’shi: Mwan’a Muntu akehulukwa mu māsa a bantu;

²³ abakamwihā, na h’efuku dia kasatu akasangulwa dimo’nyi. Abo, abafitshile bibi ku mashimba.

²⁴ Biabia habadi bafikile mu Kahenauma, baba abatambwile milambu abafikile kwi Petelo, abamwihwishe’shi: Mulambukishi enu tafutā kitadi su?

²⁵ Eshi, ee (afuta). Habatwelele mu nshibo, Yesu babadidile kumwihusha’shi: Otentekyesha na minyi Shimona? Banfumu ba hanohansenga abatambula milambu kwi banyi? kwi bana babo’nyi, su kwi benyi?

²⁶ Petelo bamwālulwile’shi: Kwi bēnyi. Yesu bamulungwile’shi; Biabia bana be be baluñantu.

²⁷ Sunga mbiabia, tala twebakokoshanga, obe ndanga kwdshiba, wele’mo bulobo, wāte mushiha aubadila kulobola, na hakwiuasamisha mukanwa, okamono lufalanga lwa shekela mwanka. Wate’lo webahe’lo ku kitadi kiande na kiobe.