Mateo 16 - KILOMBENO KIHYA KIA NFUMWETU YESU KIDISITU

¹ Bafadiseo na Basadusea namu abafikile kumutompa, abamutekyele’shi: Etuleshe kitundwilo kia mwiilu.

² Bebālulwile’shi: Hakufika kiolwa anwakula’shi: Akukekala kubuka kushī mpeshi, mwanda eilu ndjimonge hyaa.

³ Namashika namu (anwakula’shi) akukekala kubuka mpeshi lelo, mwanda eilu ndjimonge hyaa, na makumbi abafindji. Anwe bansesa, anwiuku kushingula mpala y’eilu; anka tanwiuku kushingula bitundwilo bia bihindji’nyi?

⁴ Kihungilo lda bubi na kia lusandji akikimbi kitundwilo; anka takikebahebwa, anka kinyi kitundwilo kia Mutemuki Yonasa. Biabia bebalekyele, bakatukile.

⁵ Habafikile bana-be-babukishi adi’eshia, babadi abayilwe kuata mampa.

⁶ Binyibiabia Yesu bebalungwile’shi: Talai, mudimukye kitatusho kia Bafadiseo, n’akia kia Basaduseo.

⁷ N’abo tabeakushena mpaka, abo bana bene’shi: Nyi ha mwanda tatwi baate mampa.

⁸ Uno, Yesu hakushingula, bebalungwile’shi: Aa, anwe’ba lukuluhilo luhela. A nkinyi kianwiakushena ’nwe mpaka anwe bana bene’shi: Nyi mwanda tatwibafwishe mampa?

⁹ Tanwibabande kushingula, sunga kutentekyesha mitanda ya mampa yitano y’abe binunu bitano, na bisēle binga bianubasangwile’nyi?

¹⁰ Sunga mitanda musambobidi ya ku binunu binanka, na bisēle binga bianubasangwile’nyi?

¹¹ A nkinyi kianushī bashingule’shi, ntshī mwinwakule ha mwanda wa mampa, ooo, nenulungulanga kudimuka kitatusho kia Bafadiseo na Basadusea.

¹² Biabia abeuhatulwile’shi; tamwitwamba’shi, dimukai kitatusho kia ano mampa a bidibwa, ooo, anka ha mwanda wa lulambukisho lwa Bafadiseo na Basadusea.

¹³ Binyibiabia habafikile Yesu mu mpese ya Kesalea Fidihai, behwishe bana-be-ba-bukishi’shi: A bantu abantemuna’mi Mwan’a Muntu bu nanyi?

¹⁴ Abamwālulwile’shi: Bamo’shi, we Yoano Mubatshishi; bamo’shi; Elaidja, bangi’nyi: we Yelemiya, su we umune a ku batemuki.

¹⁵ Bebakwile’shi: Anka’nwe anuntemuna bu nanyi?

¹⁶ Shimona Petelo bamwālulwile’shi: Obe we Kidisitu, Mwan’Efile Mukulu a muwa.

¹⁷ Yesu bamwālulwile’shi: Obe sha mwabi, Shimona Bashona, mwanda mbidi na mase tabibakufumbukile, ooo, anka Shami e mwiilu.

¹⁸ Ami namu nakulungula ami’shi: Obe we Petelo, na ha luno lubwebwe nankebaka kikoñeno ki Efile kiande; bibelo bia kalunganyembo tabikekikambila.

¹⁹ Nankakuha nfungulo ya Bufumu bwa mwiilu; na kioso kioanya hanohansenga, akikekala kianyibwe mwiilu; kioso namu kiokahososha hanohansenga, akikahososhwa mwiilu.

²⁰ Henyihaha E bakamikile bana-be-ba-bukishi’shi: Tanulungulanga muntu’shi, ami nyi Kidisitu.

²¹ Kuatshila ha kiakia kihindji. Yesu babangile kuhatula kwi bana-be-ba-bukishi mubadi akyebe kwenda mu Yelusalema, mu kufwambuka mu bintu bi bungi ku bakulu na batshiite-bakwidi bakata b’Efile Mukulu, na ku bafundji-bamikanda, na kwihaibwa, na kusangulwa dimo h’efuku dia kasatu.

²² Henyihaha Petelo bātshile Yesu buhenka, bamutosheshe’shi: Twelekeshanga Mwanana, uno tawikala kodi, ooo.

²³ Ank’E beālulwile, balungwile Petelo, eshi: Kīla ku nyima kwande obe Satana; we bu kikokwelo kiande, mwanda twe mutee eshimba diobe ku bintu bi’Efile Mukulu, anka ku’bia bantu.

²⁴ Biabia Yesu balungwile bana-be-ba-bukishi’shi: Su muntu akyebe kundondo ehele na mwinyi, āte nkulusu ye, andonde.

²⁵ Mwanda ese akahasha muwa we akeushimisha; n’ese akashimisha muwa we ha mwanda wande, akeumono.

²⁶ A muntu asungula busunga kinyi, su akahete bioso bia hanohansenga, n’akashimisha muwa we? sunga, muntu e na kintu kinyi kia kushintushena ku muwa we?

²⁷ Mwanda Mwan’a Muntu akafiki mu ntumbo ya Shye na bamwikeilu be; henyihaha akaha bwedi kwi muntu oso mulombene bikitshino bie.

²⁸ Binyibinyi nenulungula’shi: Kwi ibamo bemane hano, tabakamono lufu, anka su abahu kumoma Mwan’a Muntu afiki mu Bufumu bwe.