Mateo 11 - KILOMBENO KIHYA KIA NFUMWETU YESU KIDISITU

¹ Bitakubakitshine Yesu habahudisha kukamikila bana-beba-bukishi ekumi na babidi, bakatukile kwanka kwenda mu kulambukisha na kulungula mu bibalo biabo.

² Yoano badi mu nshibo ya lukano, habahushishe bikitshino bia Kidisitu, biabia batumine bana-be-ba-bukishi babidi.

³ Mu kumwihusha’shi: Obē’nyi afiki’nyi, su atutengyela mungi?

⁴ Yesu bebālulwile’shi: Ndai, nukalubwile Yoano, na bianubahusha na bianubamono:

⁵ Bampofu abamono meso, bilema abitambuka, basha kīfwi abatoshibwa, basha kitwi abahusha, bafwe ababushibwa ku lufu, na balanda be na mukāndu-wibuwa ubalungudibwa kwabadi.

⁶ Muntu ese shī mukokole ha mwanda wande, e na mwabi.

⁷ Habayile, Yesu babangile kwakula kwi bibumbu bia bantu mwanda wa Yoano’shi: Nubayile mu kabāka mu kutala kinyi? Elenge adisane na luhahi?

⁸ Anka nubayile mu kutala kintu kinyi? Muntu mufwadikwe na bilamba bibofule su? tala! abo abafwala (bifwalwa) bibofule be mu mashibo a banfumu.

⁹ Anka nubayile mu kutala kinyi? Mutemuki su? E, n’ami nenulungula’shi, mukile mutemuki.

¹⁰ Mwand’au nyi bafundjibwe’shi. Tala! nantumu mukiendji wande kumpala kobe, e akalumbulwila eshinda diobe ku mpala kobe.

¹¹ Binyibinyi nenulungula’shi, munkatshimwa baba abatandjilwe kwi bakashi, tamutukye mungi mukile Yoano ntubatshishi; sunga biabia, yawa mukile buhela mu bufumu bwa mwiilu nyi mukile bukata.

¹² Na ku mafuku a Yoano mubatshishi mpā na binobino, bufumu bwa mwiilu abukwatshibwa na bukome, n’abanyengye abebunyenga ku bukome.

¹³ Mwanda batemuki boso ba mukanda-wa-bishila, babatemukyile myanda mpaa na kwi Yoano.

¹⁴ Su anuukumina, uno nyi Eliadya takyebe kufika.

¹⁵ Muntu e na matwi akuhusha, ahushe.

¹⁶ Anka anankahwandjikisha kino kifuko bu kinyi? Nkihwandjikishe bu bana bakinga abashāla mu bisalwe, abētanyina bakwabo’shi:

¹⁷ Tubenuombela milengye, tanwibāshe, tubenudidila mālo, n’anwe ta nwibadile.

¹⁸ Mwanda Yoano bafikile, tabadi adyi, tatomanga, n’abo’shi, E na kikudi kibi.

¹⁹ Mwan’a Muntu bafikile, badianga, batomanga, n’abo’shi: Tala! muntu e na mudioholo, na mutomi a malofu, kūku a basangishi-ba-milambu, na basodi ba myanda. Anka binangu bibabingishwa kwi bana babo.

²⁰ Biabia, E babangile kusashila bibalo mubakitshinyinwe bikitshino bia bukome, mwanda tabelangye mu mashimba’bo.

²¹ Mpombo kodi Koleshina! Mpombo kodi Betesaida! Mwanda abia bikitshino bikata bibakitshinwe mwanudi, su bibadi bibakitshinwe mu Tshile na mu Shidona, babadia kwīlanga kalā mu bilamba bia makutu na būto.

²² Anka nenulungula’shi: Ahakafiki adi’efuku dia kimu, bushito bwa malwa enu abukakidi āmalwa a Tshile na Shidona.

²³ N’obe Kahanauma wemukamishibwe mwiilu, akayishibwa ku kalunganyembo, mwanda abia bikitshino bikata bibakitshinwe mwanudi, su bibadi bibakitshinwe mu Sodomo, kibadia kwikala mpaa na lelo uno.

²⁴ Biabia nenulungula’shi: Ahakafiki adi’efuku dia kimu, bushito bwa malwa enu abukakidi ā malwa a Sodomo.

²⁵ Ha’kia kihindji, batandabwile mwanda’shi, A! Nakutumbula Yaiya, Nfum’ēilu na nsenga, mwanda obe bofyile yino myanda kwi basha binangu na kwi badimukye, bweifumbwila kwi bana bakinga.

²⁶ Ee! anka biabia Yaiya, au mwanda ubekala wibuwa ku mpala kobe.

²⁷ Bintu bioso bibampelwe kwi Yaiya, takwi muntu euku Mwana, anka Yaiya; sunga muntu euku Yaiya, anka Mwana, na yawa kwi ese muntu Mwana akamufumbula.

²⁸ Fikai kwandjimi (anwe) boso bakutuhuta na mufubo, n’ami nankenuha kikisho.

²⁹ Atai kikumbo kiande, nwambulei kwimi; mwanda nyi muhohele na kwihelesha mwishimba, n’anwe anukasañana kikisho mashimb’enu.

³⁰ Mwanda kibumbo kiande nkilombane, na kita kiande nkihela.