Mateo 10 - KILOMBENO KIHYA KIA NFUMWETU YESU KIDISITU

¹ Habaitanyine kwadi bana-be-ba-bukishi ekumi na babidi, bebahele matalwa kunundu kwa bikudi bi butete na kubinga’bio, na kuhwisha bihaso bioso bia kubofula kwa mbidi, na bihaso bioso bia masungu.

² Mashina a batumibwa ekumi na babidi nyi a kwibedi: Shimona, dimo die bu Petelo, na mukwabo Andeleyo, Yakoba a Sebede, na mukwabo Yoano.

³ Fidiha na Batolomyu, Tomase na Mateo winyi musangishi-a-milambu, na Yakoba mwan’a Alafesa na Lebeusa, dingi die bu Tadeusa.

⁴ Shimona mwina Kanana, na Yudasa Isakadiata winyi bamwihulukile kīhuko.

⁵ Bano ekumi na babidi, Yesu bebatakwile, na kwibakamikile’shi: Tanuendanga mwishinda dia Badjentaila, sunga mu kibalo kia Bena Samadia tanutwelanga mwanka.

⁶ Anka nwende kwi mikoko yishimine yi a mu nshibo ya Isalele.

⁷ Bianuende nulungule’shi: Bufumu bwa mwiilu tabudi hehi.

⁸ Nuhwishe basha kubofula kwa mbidi, nutoshe basha kifwi, nubushe bafwe, nutushe bikudi bibi, nubatambwile bisumanga, nuhei bisumanga.

⁹ Tanukakimbanga bia kwela mwidimba dienu, sunga nfalanga ya nsahabu, sunga ya nfedha, sunga ya lembela.

¹⁰ Sunga nsaka ya lwendo, sunga makotshi abidi, sunga bidiato, sunga mukombo winyi, mwanda mufubi ’muhwandjikile bidibwa bie.

¹¹ Mu kibalo kioso na mu musumbā woso mwa nukatwela, nwihushe a muhwandjikile mwamwa nanyi, nushale mwanka mpaa na hanukatuka kwanka.

¹² Hanukafiki mu nshibo nwibemunei.

¹³ Su nshibo yihwandjikile, kufukama kwenu kufikye kwanka, anka su yishī yihwandjikile, kufukama kwenu kwalukye kwanudi.

¹⁴ Ese muntu a shī enutambula, sunga kuhusha myanda yenu, biabia hanutuku mu yaya nshibo, sunga mu kibalo kiakia, kukulai lufūfi ku ngwa yenu.

¹⁵ Nenulungula binyibinyi’shi: Ahakafiki adi’efuku dia kimu, bushito bwa malwa a kiakia kibalo akakidi ā malwa a Sodomo na Ngomolo.

¹⁶ Talai! Nenutumu bu mikoko munkatshi mwa tumīshi: binyibiabia nwikale na budimu bwa manyoka, na kuhohela bu nkudimba.

¹⁷ Anka dimukai bantu, mwanda abakenufishishe ku bimu, n’abakenukuhila mu bitumbwilo biabo.

¹⁸ Anukafishwa namu ku meso kwa batontshi na banfumu ha mwanda wande, kwikala bu kitundwilo kwabadi, na kwi Badjentaila.

¹⁹ Anka habakenufisha, tanunyenganga mwishimba’shi, atwākula na minyi; mwanda anukahebwa bia kwakula mu yawa nguba.

²⁰ Mwanda, tananwe abakākula, anka Kikudi-E-Selelee a Shyenu akākula munda mwenu.

²¹ Mukwabo na muntu akasokosha mukwabo ku lufu, shye akasokola mwan’e, bana’bakatombokyela bebatande, na kwibehaisha.

²² Anukekala bashikibwe kwi bantu boso ha mwanda w’eshina diande, anka e akakankamana mpaa na kunfudilo akahashibwa.

²³ Anka habakēnumwesha malwa mu kibalo kiakia, sukai ku kingi, mwanda nenulungula binyibinyi’shi: Mwan’a muntu akafikibwa kwibedi tanwibabandjile kuhudisha bibalo bioso bia Isalele.

²⁴ Mwan’a bukishi takila mulambukishi a bukishi, sunga mpika takila nfumu e.

²⁵ Mbilombane mwan’a bukishi, ekale bu mulambukishi a bukishi, na mpika bu nfumu e. Su babatemwine sha nshibo bu Bēlesebuba tabakakidi kutemuna baba be mu nshibo ye hamune su?

²⁶ Binyibiabia tanwibatshinanga, mwanda takwi kintu kifībwe kishī akikasokolwa, sunga bufyefye bushī buukibwa,

²⁷ Kinenulungula ’mūfito nwakulei mwitata; na mwanda wanuhusha ku matwi, nwiulungule ku misaka ya mashibo.

²⁸ Tanutshinanga’bo abaiha mbidi, anka bashī abeuku kwihā kikudi; anka nukile kutshin’awa euku kulwisha kikudi, na mbidi bioso namu mu Ngehena.

²⁹ Misodya ibidī’nka taiudibwa ku nsenke umune, na umune’nka w’ayo takahono hashi kushī (kukumina) Shyenu.

³⁰ Anka nyene yenu yi na mwinyi yibadikwe yoso.

³¹ Binyibiabia tanutshinanga; mūlo wenu ngukile wa misodya yi bungi kinemo.

³² Binyibiabia muntu ese akandungwila ku mpala kwa bantu, ami namu nankamulungwila kumpala kwa Yaiya E mwiilu.

³³ Anka muntu ese akantunu ku mpala kwa bantu, ami namu nankamutuna ku mpala kwa Yaiya E mwiilu.

³⁴ Tanutentekyeshanga’shi, ami nafikile kufisha kufukama hano-ha-nsenga; nkimufwile kufisha kufukama, anka luhete lwa ngoshi.

³⁵ Mwanda nafikile’shi, mwana na nshye abakatuhishena, na mwana mukashi na nyin’e, na mpian’a mwan’e na nyin’e, mwenu anka hamune.

³⁶ Muntu akashikibwa n’abe mu nshibo ye.

³⁷ Muntu e na shye su nyin’e kifulo kikambe kiadi n’akio kwandji’mi, tamuhwandjikile’mi; na muntu e na kifulo na mwan’e mulume, sunga mwan’e mukashi kukila kiadi nakio kwandji tamuhwandjikile’mi.

³⁸ Na yawa namu bakutwa kwibosha nkulusu ye na kundonda, tamuhwandjikile’mi:

³⁹ Muntu ese amono muwa we akeushimisha; n’āshimisha muwa we ha mwanda wande, aukeumono.

⁴⁰ E akenukumina ankumina’mi, ankumina ’mi n’amu, akumina bantumine.

⁴¹ Muntu akumina mutemuki mwishina dia mutemuki, akatambula bwedi bwa mutemuki, n’e akumina muntu mululame mwishina dia muntu mululame, akatambula bwedi bwa muntu mululame.

⁴² Na muntu ese akatomesha umune a mu bano bana bahela kihulu kimune ’nka kia mema e mashika anka mwishina dia mwan’a bukishi, binyibinyi nenulungula’shi; takashimisha bwedī bwe, ayoyo.