Mako 9 - KILOMBENO KIHYA KIA NFUMWETU YESU KIDISITU

¹ (Yesu) bebalungwile’shi: Binyibinyi nenuamba’shi: Kwi bamo bemane hano ta bakamono lufu, mpaa n’ahabakamono bufumu bw’Efile-Mukulu abufiki na bukome.

² Habakile mafuku asamombo Yesu bātshile Petelo, na Yakoba, na Yoano, bebakunkwishe mu ngulu yibula, mwiīlu abo ba na mwinyi: E bālulukile kumpala kwabo.

³ Bilamba bie bibahenyahenyanga anka soo bu mafulu a nsubanga; sunga ta kwi mutoshi hano ha nsenga teuku kwibitosha biabia.

⁴ Henyihaha Elaidja na Mosesa abamwekyele kwabadi, babadi abākula na Yesu.

⁵ Petelo balungwile Yesu eshi: A mwanana, hano mpetulombene kwikala, bibuwa tukite bitanda bisatu, kimune nkiobe, kingi kia Mosesa, kimo’nyi ki’Elaidja.

⁶ Mwanda ta mwiukye kia kwakula, mwanda babadi na moo ukata.

⁷ Kubafikile ekumbi dibebahutshile, n’eyi dibatukile mwikumbi’shi: Uno nyi mwan’ande mufudibwe kifulo, hushai eyi die.

⁸ Kahindji n’āka habatadil’eku n’aku, tabamwene sunga ngumune, anka Yesu n’abo bana mwinyi, nyaa.

⁹ Habadi abayiki ha ngulu E bebakamikile’shi: Ta nukalungulanga muntu myanda yanubamono, anka ahakasanguka Mwan’a Muntu ku lufu.

¹⁰ N’abo abalamine uno mwanda munda mwabo, babadi abeihushena’shi: A kusanguka kwa mu lufu kwi na minyi?

¹¹ Abamwihwishe’shi: A Bafundji-ba-Mikanda a nkinyi kiabamba’shi: Elaidja akabadila kufika?

¹² E bebālulwile’shi: Binyibinyi Elaidja akabadila kufika, akalumbula bintu bioso bu bia bibadi kwibedi, na bu bibafundjilwe Mwan’a muntu’shi, akamono malwa e bungi na kubendwa.

¹³ Ank’ami nenuamba’shi: Elaidja tabahwila kufika, tabahwile kumukita mwabakyebele, bu biabamufundjile.

¹⁴ (Ku mongo) habafikile kwi bana be ba bukishi, bamwene kibumbu kikata kimane habadi, na Bafundji-ba-Mikanda abebehusha myanda.

¹⁵ Na binobino kibumbu kioso, habamumwene abakanyine bikata, abakamine lubilo kwadi, abamwimwine.

¹⁶ E behwishe Bafundji-ba-ikanda’shi: A nwibehushanga kinyi?

¹⁷ Muntu a mu kibumbu bamwalulwile’shi: A Mulambukishi, nafisha kodi mwan’ande mulume, e na mukishi wa kamama.

¹⁸ Koso kwaumuyisha aumwasākinya, aumutusha efulu ku kanwa, aumwisumisha meno, aumuhongolosha mbidi; nehushanga bana b’obe ba bukishi’shi, bamubingile kwanka, ank’abo abakutwa.

¹⁹ E bamwalulwile’shi: A ee! anwe ba kihindji kishī na kukumina, a nankashala n’enu kihindji ki bula na minyi? aneshinena n’enu bihindji bi na minyi: mufwishei kwandji’mi.

²⁰ Abamufwishishe kwadi; habamumwene, kihindji n’āka mukishi bamusunyishe, na mwana bahonene kingadingadi na kwalasha n’efulu ku kanwa taa.

²¹ (Yesu) behwishe nshe’shi: Uno mwanda ubafikile kwadi kihindji ki bula na minyi? Bamwalulwile’shi: Anka habadi ki mukinga.

²² Na misusa yi bungi ubamwelanga mu kālo, na mu mema kumwiha; anka su obe euku kukita kintu etufwile lusa, etukwashye.

²³ Yesu bamulungwile’shi: Su euku kukumina, biabia myanda yoso kwi sha kukumina aiuku kukitshibwa.

²⁴ Kahindji n’āka shye mwana bēlele musase na kudila mpolo’shi, Mwanana, nakumina, nkwashye kushī-kukumina kwande.

²⁵ Habamwene Yesu kibumbu kikwete kwibuñena mbilo basashile mukishi wi ntanka’shi: Obe mukishi wa kamama na wa kitwi, nakukamika’shi: Tuka munda mwe, totwelanga mwanka dimo.

²⁶ Biabia (Mukishi) ubelele musase, ubamusunyīshe misusa yi bungi, ubamutukile, badi anka bu mufwe, biabia bangi’ shi bāfu.

²⁷ Anka Yesu bamukwete ku mboko, bamwimikile, baimene.

²⁸ Habatwelele mu nshibo, bana be ba bukishi babamwihwishe ku bukunkula’shi: A tukutshīlwe kumubingila na minyi?

²⁹ E bebālulwile’shi: Kino kihaso (kia mikishi) ta yibingwa bisumanga, anka ku luteko na kushila bidibwa.

³⁰ Abakatukile’ko, abakile munkatshi mwa Ngadileo, ta mukumine muntu kwiushingula.

³¹ Mwanda badi alambukisha bana be ba bukishi, bebalungwile’shi: Mwan’a muntu talubulwa’masa a bantu, n’abo abakamwiha; habahu ku mwiha akasanguka h’efuku dia kasatu.

³² Ank’abo tabashingulwile yaya mīsambo, babadina moo kumwihusha.

³³ Bafikile ku Kahanauma; mu nshibo mubadi badi ebehusha’shi: Kibadi kinyi kianubeleshenanga mpaka mwishinda?

³⁴ Anka’bo babauminyine nyaa, mwanda babadi abēleshena mpaka mwishinda’shi, a mukile mukwabo bukata nanyi?

³⁵ E bashalele, betamine b’ekumi na babidi, bebalungwile’shi: Su akukyebe muntu kukila ku mpala, ekale ku nyima kwa boso, na bu mufubi a boso.

³⁶ Bātshile mwana mukinga, bamwimikile munkatshi mwabo; habamwibosheshe ’maboko, e bebalungwile’shi:

³⁷ Awa’tambula mwana mukinga bi uno’bi mwishina diande, biabia antambul’ami: awa’ntambula, ta nami atambula, anka yawa bantumine.

³⁸ Yoano bamulungwile’shi: A mulambukishi, tubamwene umune badi abingi mikishi mwishina diobe, shī etulondo’twe; atwe tubamutosheshe, mwanda e te mu mulongo wetu.

³⁹ Anka Yesu bambile’shi: Ta numutoshanga, mwanda ta kwi muntu, sunga ngumune akakitshi kilengeleshi mwishina diande, euku kunyialulwila tampelesha lubilo.

⁴⁰ Awa ashī atuhela e n’etu.

⁴¹ Mwanda aw’akenuha biakutoma, sung’ekoho dia mema mwishina diande, mwanda w’anwe nwi bena Kidisitu, nyi mbinyibinyi nenulungula’shi: E ta kakutwa bwedi bwe, sunga mpahelahela, ooo.

⁴² Ank’awa akakokosha umune a mu bana bahela abankumine, akikemukile buwa efuto die’shi, su abamwanye ebwe dia bahela bukula mu nshinga ye, abakamwele namu mwishiba dia mema.

⁴³ Su mboko yobe ayikukokosha, biabia eitshibe, mwanda, kutwela ’muwa na kilema nyi kukila kodibe, su kuelwa mu Ngehena na māsa abidi mu kālo kashi keuku kushima.

⁴⁴ Nyi mwamwa kifinwa kiabo kishī akiuku kufwa, na kālo namu kashī akashima, ooo.

⁴⁵ Su ngwa yobe ayikukokosha, biabia eyitshibe, mwanda kutwela ’muwa na kilema nyi kukila kodibe, su kuelwa mu Ngehena na ngwa yobe yibidi mu kālo kashī keuku kushima.

⁴⁶ Nyi mwamwa kifinwa kiabo kishī akiuku kufwa, na kālo namu kashī akashima, ooo.

⁴⁷ Su eiso diobe namu adikukokosha, edikatusha, mwanda, kutwela mubufumu bw’Efile-Mukulu n’eiso dimune nyi kukila kodibe, su kuelwa mu kālo ka Ngehena na meso obe abidi.

⁴⁸ Nyi mwamwa kifinwa kiabo kishī akiuku kufwa, na kālo namu kashī akashima, ooo.

⁴⁹ Mwanda’nka hamune bintu mbishinwa mungwa, anka biabia namu bantu na kālo, na bitahwa bioso namu abikashina na mungwa.

⁵⁰ Mungwa wibuwa, anka su mungwa ubatukuluka aukatu na minyi? Nwikale na mungwa mu anwe bana bene, na kufukama namu muntu na muntu.