Mako 6 - KILOMBENO KIHYA KIA NFUMWETU YESU KIDISITU

¹ Binyibiabia Ebakatukile kwanka, bafikile ku luheselwabo; bana be ba bukishi abamulondele.

² Habafikile efuku dia Sabado babangile kulambukisha mu kitumbwilo; bebungi habahushishe abakanyine’shi: A uno muntu bātshile yino myanda kwi kunyi? anka nkalolo kinyi kabamuhebwa ka kukita bino bikitshino bikata ku maboko E?

³ A unou tanfwintshi a mabaya’ube, winyi mwan’a Madiya, mukwabo na Yakoba na Yose n’ā Yuda na Shimona? na bankashan’e ta twi n’abo kuno su? Na baba babakokeshwe ha mwanda w’E.

⁴ Anka Yesu bebalungwile’shi: Mutemuki e na kunemekwa mu mpese yoso, anka te n’ako ku luhese lwabo, na munkatshi mwa bakwabo na mu nshibo ye na mwinyi, ooo.

⁵ Biabia’nyi (Yesu) bakutshilwe kukita kwanka kingi kikitshino kikata, anka kutenteka maboko E ha kisaka kihela kia basha kubofula kwa mbidi, bebahwishishe.

⁶ E bakanyine kidiodi kiabo, n’ebefunyine bibalo na kulambukisha.

⁷ Bētamine benyi b’ekumi na babidi, babangile kwibatuma babidi babidi; bebahele matalwa a kubinga bikudi bi butete.

⁸ Bebakamikile’shi, ta nuatanga kintu kia kwenda n’akio mu luendo, anka kibango nya; sunga nsaka, sunga mampa, sunga nfalanga mwibenga,

⁹ anka nwikale bafwale tubato, ta nufwalanga mitwelo yibidi.

¹⁰ E bebalungwile’shi: Mōso mu nshibo yianukatwele, nushāle mwanka mpaa na bianukatuku.

¹¹ Baba bashī abakenutambula, sunga kwinwifwakena, hanwibō hanka nwibakukwile lufūfi ku ngwa yenu, kwikala bu kishingulwilo kwabadi. Binyibinyi nenuamba’shi, ahakafiki adi’efuku dia kimu, bushito bwa malwa bwa kiakia kibalo bukakidi a malwa a Sodomo na Ngomolo.

¹² Na baba abakatukile, babalungwile bantu (mwanda w’Efile-Mukulu’shi): Nwilangei mashimb’enu.

¹³ Bababingile mikishi yibungi, abēlele mwimu ha basha kubofula kwa mbidi be bungi, abebahwishishe.

¹⁴ Nfumu Heloda bahushishe nkumu (ya Yesu) (Mwanda eshina die dibahalakene koso kwiukibwa) bakwile’shi: Yoano Mubatshishi bahu kusanguka ku lufu, binyibiabia ha uno mwanda bikitshino bia kukanya abimweka mwadi.

¹⁵ Bangi bamba’shi: Nyi Eleasa, bangi namu’shi: nyi mutemuki, su tambiabia mwifwane mutemuki.

¹⁶ Anka habahushishe Heloda nkumu ye, bambile’shi: Ngwinyi Yoano anatshibile mutwe, nyi basanguka ku lufu.

¹⁷ Mwanda Heloda e na mwinyi tabadi mutume bakukwata Y’oano, bamufungishe mu nshibo ya lukano ha mwanda wa Helodiasa, mukashi a mukwabo Fidipa, tabadi muhwe’nyi kumuata amwibakila.

¹⁸ Mwanda Yoano tabadi muhwe kulungula Heloda’shi: Toemulonde kishila’bi ha mwanda wa kwikala na mukashi a mukwenu.

¹⁹ Henyihaha Helodiasa badi n’e lumanyi lwa kumwihayisha, anka ta mumone mwa kukitshina.

²⁰ Mwanda Heloda batshinanga Yoano moo, bashingulwile’shi, E muntu mululame na muhatulukye-selelee, bamulame bibuwa; Heloda habahushanga eyi dia Yoano, eshimba die dibadi na katshima munda, bamuhushanga na muloo.

²¹ Habafikile efuku dilombane dia habatandiile Heloda, batekeshe bidibwa kwi batshiite be, na bimankinda bie bia bashidika, na bakata ba mu Ngadilea.

²² Habatwelele mwan’a winyi Helodiasa, bāshīle masha, baseheleshe’shimba dia Heloda, na babadi bashāle n’e ku mesa; nfumu balungwile mwana mukashi’shi: Tonga kioso kiokyebe su kinyi su kinyi, n’ami nkuhe kianka.

²³ E batshihīle kwadi’shi: Kioso kiontekye, nankuha, mpaa na ku luhese lwa hankatshi lwa bufumu bwande.

²⁴ N’e bakatukile, bakehwishe nyin’e eshi: A nkasangula kinyi? (Nyi’ne) bamwalulwile’shi: Katekye mutwe wa Yoano Mubatshishi.

²⁵ Kahindji n’āka batwelele lubilo mubadi nfumu, bamutekyele’shi: Nankyebe ompe mutwe wa Yoano Mubatshishi ha kihindji kihi ha kibaa (kia mutshi).

²⁶ Biabia eshimba dia nfumu dibafitshile bibi, anka ha mwanda wa kutshiha kwe, na ha mwanda wa baba babadi bashāle n’e, ta mukumine kumusumina.

²⁷ Kahindji n’āka batumine mushidika badi nsentedi, bamukamikile’shi: Fwa na mutwe we, n’e bayile, bakamutshibile mutwe we mu nshibo ya lukano.

²⁸ Bafwile na mutwe we ha kibaa kia mutshi, beuhele nsongwakashi, nsongwakashi namu bakeuhele nyin’e.

²⁹ Bana be ba bukishi, hakuhusha, abayile abakātshile kitanda kie, abakekishikile ’mashama.

³⁰ Batumibwe abekongyele kwi Yesu, abamulungwile bioso biabakakitshine, na myanda yoso yabalambukishe bantu.

³¹ E bebambile’shi: Fwai’nka anwe bana bene mu kihindji kia kabāka, nubande kwiikisha kihindji, mwanda kubadi akufiki bebungi, bakwete kufika na kwenda, biabia ta mbamone mwinyi sunga mwa kudila.

³² Abakābukile m’bwato ba na mwinyi mpaa na mu kabāka.

³³ Bibumbu bibebamwene bakwete kwenda, bebungi abamushingulwile biya, be mbibalo bioso tabakama mbilo ya hashi, abebabadidile kufika kumpala, abekongyele kwadi.

³⁴ Yesu hakutuka m’bwato bamwene kibumbu kikata kia bantu, bebamwenene lusa, mwanda babadi bu mikoko yishī na katshunga; babangile kwibalambukisha myanda yi bungi.

³⁵ Habadi nguba takyebe kutwela, bana be ba bukishi abafikile kwadi, tabamwamba’shi: Muno nyi mu kabāka na binobino nguba bende.

³⁶ Bakatushe, bēnde ku mahia efunye hanoa, na mu bibalo, bakaule ba na mwinye bidibwa, mwanda ta be n’abia kudia.

³⁷ Bebālulwile’shi: Anwe ebahei biakudia, abamwambile’shi: Atwende mu kuula bidibwa ku nfalanga nkama yibidi bia kwibaha su?

³⁸ E bebehwishe’shi: Nwi na mitanda ya mikate yinga? ndai nukatale; Habashingulwile abambile’shi: Ngitano, na mishiha yibidi.

³⁹ E bebambile’shi, ebashadikei boso hashi ha lubishi, batala habo batala habo.

⁴⁰ Henyihaha abashālele hashi kwi kimo kifunda lukama, kwi kimo kifunda ki makumi atano.

⁴¹ E habātshile yinyi mitanda yitano na mishiha yibidi, babandulukile meso e mwiilu, batumbwile Efile-Mukulu, batshomwene mitanda, beihele bana be ba bukishi kwibatambika; na yinyi mishiha yibidi abeiabile boso.

⁴² Boso bwabo abadile, bēkuta.

⁴³ Abātshile bisele biule ndaa bia bifingifingi, na bia mishiha.

⁴⁴ Benyi (bantu) abadile babadi su mbu binunu bitano bia balume.

⁴⁵ Kahindji n’āka bakamikile bana be ba bukishi kwiikila m’bwato, babadile adi’eshia ku Beseda, e namu ashāle mu kuhalakasha kibumbu.

⁴⁶ Habahwile kwibahalakasha, E bakamine mu ngulu mu kuteka (Efile-Mukulu).

⁴⁷ Habafikile kiolwa, bwato tabubadi munkatshi mwishiba, n’E badi buhenka bwe ku mahia.

⁴⁸ E bebamwene bakwete kutuhuta na kwīta, mwanda wa luhahi lubadi alwibaalusha: na habadi kilo kia ha matombele E bayile kwabadi, afwashinanga ha nundu ha mema, badi akwibakidi.

⁴⁹ Anka habamumwene afwashinanga ha nundu ha mema, tabatentekyesha’shi: Tubamono mukishe, tabeokakena.

⁵⁰ Mwanda boso bwabo abamumwene, abasushile, na binobino bebākwile’shi: Nyishai mashimb’ēnu, nami ū, tanutshinanga moo.

⁵¹ E bēkile m’bwato mwabadi, luhahi namu lubafukamine; abo abakambile kukanya munda mwabo na lukanyo.

⁵² Mwanda ta banangwile binangu mubadi mukitshinwe (kinyi kilengileshi) kia mitanda ya mukate, mwanda mashimb’abo abadi akome hoo.

⁵³ Habābukile adi’eshia, abafikile ku mahia a Ngenesaleta, abakungile bwato.

⁵⁴ Habatukile m’bwato, kahindji n’āka bantu abamushingulwile’shi, (Nyi Yesu).

⁵⁵ Abakamine lubilo ku mpese yoso, abasemwine basha kubofula kwa mbidi ha bitala kwinyi kwabamwifwakene’shi, nyi kwadi.

⁵⁶ Mu bibalo bioso bibatwelanga, mu bihela sunga mu bituka, sunga ’mafuba, babadi abatula basha kubofula kwa mbidi mu misee ya bisalwe; abadi amusendela’shi, bibuwa abakume, sunga ku mulomo wa mutwelo w’e, baba babadi abamukumu abahwishibwa.