Mako 5 - KILOMBENO KIHYA KIA NFUMWETU YESU KIDISITU

¹ Biabia ababukīle adi’eshia di’eshiba, mu mahia a Ngadalene.

² Hakwabuka mu bwato, anka henyihaha bafumankene na muntu mukwatwe na kikudi ki butete mutukye mu mashama.

³ Badi mubombele ’mashama, ta kubadi akumōbesha kumuanya ooo, sunga mu nkano:

⁴ Mwanda badi mufungibwe misusa na misusa mu miomba na nkano, nkano namu e na mwinyi beihobolanga, na miombo yinyi beitshomwene bihindji bihindji: Sunga ngumune akumukokyesha.

⁵ Bukyelebukyele, bufuku na kanya badi mu mangulu na mu mashama, badi ēle misase, kwete kwītaha na mabwe.

⁶ Habamwene Yesu kula, bakamine lubilo, bamulangwidile.

⁷ Banyishishe eyi dikata’shi: A n’obe n’aminyin’obeunyi? Obe Yesu Mwan’Efile-Mukulu ’mukile ntumbo a mwiīlu, nakutshihila mwishina di’Efile-Mukulu’shi, to’mweshanga malwa.

⁸ Mwanda (Yesu) bamulungwile’shi: Tuka munda mwa muntu ū, obe kikudi ki butete.

⁹ N’E bamwihwishe’shi: Eshina diobe mbu’nyi? E bamwalulwile’shi: Eshina diande mbu Ngoshi, mwanda twi bungi.

¹⁰ E bamusendelele bikata’shi: Toetutakulanga mu ano mahia.

¹¹ Tala, kubadi lombe lukata lwa ngulube hehi na ma ngulu, lukwete kudia.

¹² Mikishi yoso yibamusendelele’shi: Etutume munda mwa ngulube, tukatwele mwanka.

¹³ Yesu kahindji n’āka beikuminyine’shi: Ee, ndai. Henyihaha bikudi bi butete bibamutukile, bibakatwelele munda mwa ngulube; biabia lombe loso lubakulumukile mu iuhongo mpaa na ’mema, (yibadi hehi binunu bibidi) yibafwile’mema.

¹⁴ Aba babadishanga ngulube babasukile, babakalungwile aba babadi mu kibalo, mpaa na babadi mu mafuba, uno mwanda. Abo namu babayile mu kutala bibakitshibwa.

¹⁵ Abafikile kwi Yesu, abamwene awa badi na mikishi mushāle tadi mufwadikwe bilamba, tadi namu na binangu bia bu muntu, biabia babakwete moo.

¹⁶ Aba babahetekyelwe abadi tabākula mwa kibakitshinwe kwi’wa badi mukwatwena mikishi, na bibakitshinwe ngulube.

¹⁷ Bababangile kumusendela’shi: Etukatukile mu yino mpese yetu.

¹⁸ (Yesu) habatwele mbwato, winyi badi mukwatwe na mikishi bamusendelele’shi: Nende n’obe.

¹⁹ Anka Yesu ta mukumine, bamulungwile’shi: Nda kwenu kwi ba kifuko bobe, okebalungule bibakukitshina Nfumu obe, na bibakufwila lusa.

²⁰ N’e bayile, babangile kushingulusha bantu ba mu Dekahodise myanda yikata yibamukitshine Yesu, na bantu boso abakanyine.

²¹ Yesu habābukile dimonyi ’mbwato kudi’eshia, bantu abakongyele kibumbu kikata kwadi E; badi kubukunkula kw’eshiba.

²² Henyihaha tala, kubafwīle umune a batontshi ba mu kitumbwilo, eshina die mbu Yailusu; e, habamumwene bēle ku ngwa y’E.

²³ Bamusendelele bikata’shi: Mwan’ande’hela mukashi takyebe kufwa; otwende, okamutentekye māsa akahashibwe, akekala na muwa.

²⁴ (Yesu) bayile n’e, na kibumbu kikata kibamulondele, kibefinene hadi.

²⁵ Kubadi mwana mukashi badi na busungu bwa kushila luendenda bihwa ekumi na bibidi.

²⁶ Bakambanga kumweshwa malwa kwi bananga-buka be bungi; twi ku minwe twe tubamuhwile, busungu bwe ta mbutale, anka bubakalabele.

²⁷ Habadi muhushe nkumo ya Yesu bafikile mu kibumbu kia bantu kumongo kwe, bakumine ku mutwelo w’E.

²⁸ Mwanda bākwile munda mwe’shi: Su neuku kukuma sunga ku mutwelo w’E nankahashibwa.

²⁹ Kahindji n’āka hambangilo ha mase e habaumu, n’ebefwakene mu mbidi ye bwinyi busungu bubahwishibwa.

³⁰ Anka henyihaha Yesu, hakushingula munda mwe’shi, bukome bubantuku, benyoñene munkatshi mwa kibumbu, bambile’shi: A bankumu ku mitwelo yande nanyi?

³¹ Bana be ba bukishi abamwambile’shi: Obe omono kibumbu nkifinene hodi na kwihusha’shi, a nanyi bankumu?

³² N’E bashokolweshe meso aku n’aku’shi, ’mone bankitshi bino.

³³ Anka mwana mukashi hakushingula bibamukitshinwa basushile moo, bafikile, batwile manwi hāshi kumpala kwe, bamulungwile myanda yoso ya binyibinyi.

³⁴ E bamwambile’shi: Mwan’ande, lukuluhilo lobe lubakuhasha, ndanga n’eshimba diobe ditale nyaa! ekala muhwishibwe mukumbo w’obe.

³⁵ Habadi kiesamba, kubafikile bantu ba mutontshi a mu kitumbwilo babambile’shi: Mwan’obe mwana mukashi bahu kufwa, akiokambakasha’nyi Mulambukishi binobino nkinyi?

³⁶ Habahushishe Yesu mwanda w’abākwile, balungwile mutontshi a mu kitumbwilo’shi: Totshinanga, anka kumina.

³⁷ E ta mukumine muntu kumulonda, anka Petelo, na Yakoba, na Yoano mukwabo na Yakoba.

³⁸ Bafikile ku nshibo ya mutontshi a mu kitumbwilo, bahetele eunga na kiuwa kikata kia basha mālo.

³⁹ E habatwele mwanka bebehwishe’shi: Nkinyi kianwele eunga na kudila’nwe? Songwakashi ta mufwe, tulo tuadi mulale.

⁴⁰ Tabamuseha na kumukyengula. Anka E habebakatwishe boso, bātshile shye na nyin’a songwakashi, na baba abafwile n’abo, abatwelele mwanka mubadi mulale songwakashi.

⁴¹ Bakwete songwakashi ku mboko, bamwambile’shi: Tadita Kumi, kuhatula nkwamba’shi: Obe songwakashi, nakwamba’shi, buka.

⁴² Kahindji n’āka songwakashi babukile, batambukile, mwanda tabadi mufishe bihwa bu ekumi na bibidi. N’abakanyine na lukanyo lwi moo.

⁴³ E bebalungwile bukoho’shi: Ta nukashingulanga muntu uno mwanda, bambile namu’shi: Muhei biakudia.