Mako 2 - KILOMBENO KIHYA KIA NFUMWETU YESU KIDISITU

¹ Habakile mafuku (Yesu) batwele dimo mu Kahanauma, abahalakeshe ntumbo’shi E mu nshibo.

² Kahindji na kano kubebungile bantu be bungi, anka kubakutshilwe sunga kihindji, na ha kibelo henyi, n’e bebalungwile mikāndu-yibuwa.

³ Kubamufwidile bantu abafishishe mukumbe kususa, mutwalwe na bantu bananka.

⁴ Habakutshilwe mwa kwishesha kwanka mwanda w’efina dia kibumbu, abahulwile musaka, abatubwile mwanka, abayishishe lusala lubadi mulale sha busungu bwa kususa.

⁵ Yesu habamwene lukuluhilo lwabo tākula sha busungu bwa kususa’shi, A mwana, milwisho yobe yibakulekyelwa.

⁶ Anka kubadi bāmo ba Bafundji ba mikanda bashāle hanka, tabanangushena ’mashimba’bo’shi.

⁷ Au uno namu nkinyi kiakwila kukaa Efile-Mukulu? A nanyi euku kulekyela milwisho su ñanka Efile-Mukulu?

⁸ Kahindji na kano Yesu bibeukile mwishimba die biabadi abanangushena munda mwabo, tēbamba’shi; A nkinyi kianunangushena biabia munda mwenu?

⁹ A kikambe kubofula nkinyi, a nkwamba uno akumbu kususa’shi; Milwisho yobe yibakulekyelwa, su nkwamba’shi; Buka, ebwēshe lusala lobe, wende?

¹⁰ Ank’anwiukye’shi, Mwan’a muntu biadi na matalwa a kulekyela milwisho hano hashi (ākula ku sha busungu bwa kususa’shi).

¹¹ Nankwamba ’shi; Buka, ebwēshe lusala lobe, wende ku nshibo yobe.

¹² Kahindji na kano babukile, na hakwibwēsha lusala lwe, tēnde ku meso kwa boso, n’abo abamukanyine boso, tababihwandjikile Efile-Mukulu’shi: Tā’twe bimwene kashiā bihwandjikile na kino hamune.

¹³ Binyibiabia (Yesu) batukile dimo kunfudilo kwa mema, na kibumbu kioso kibafikile kwadi, e namu tebalambukisha.

¹⁴ Habadi akidi, bamwene Lewi mwan’a Alehesusa kwete kushāla ha kilambwilo; bamwambile’shi: Ndonde! E namu bebwele, tamulondo.

¹⁵ Henyihaha Yesu habadi mushāle ha bidibwa mu nshibo ye, balambudi-ba-milambu, na balwishi be bungi bashāle hamune na Yesu, na bana be ba bukishi; mwanda be bungi babadi hanka, tabamulondo.

¹⁶ Bafundji-ba-mikanda na bafadiseo hakumumona bi badianga na balambudi-ba-milambu na balwishi, tabamba bana be ba bukishi’shi: A nkinyi kiadila na kiatomena na balambudiba-milambu na balwishi’nyi?

¹⁷ Yesu hakuhusha biabia tabamba’shi: Abo be musangyelo ta be na kia’bakyebela ñanga, ooo, anka’bo abakumbu kubofula kwa mbidi; nkimufwile kwitanyina balulame ba mashimba, anka balwishi belangei ’mashimba.

¹⁸ Bana ba bukishi ba Yoano n’aba bafadiseo babadi abashidi biakudia, abafikile kumwamba’shi: A nkinyi bana ba bukishi ba Yoano na baba ba bafadiseo abashilā biakudia, anka b’obe ta bashilā?

¹⁹ Na Yesu bebehwishe’shi: Bantu ba mubambi a mukashi abeuku mwa kushila biakudia hakī mubambi a mukashi e n’abo’nyi? habakī na mubambi a mukashi, ta bakwiuka mwa kushila biakudia.

²⁰ Anka mafuku akafiki kwanka ahakakashwa mubambi a mukashi, binyibiabia’nyi habakashila biakudia mu ā mafuku.

²¹ Ta kwi muntu ēle kīla kia mbwisha yihia ku mutwelo ukulu, ooo, su b’ēle biabia aya yihia yioshiki hanka ayinyisha kusanusha h’etubu, biosobi h’etubu henyi habakamba kusanuka.

²² Biabia ta kwi muntu alongesha malofu ahia mu milangi ya misokia yikulu, mwanda su biabia, malofu ahyaakatubula aya milangi ya misokia, n’ao asumbuka na milangi biayilwila; anka malofu ahya akyebe akitshinwe mu milangi ya misokia yihya.

²³ Binyibiabia e tēnde mu mabala a mebele mu dia Sabado, na bana be ba bukishi hakwenda ababangile kukula mebele a mifwafwa.

²⁴ Na bafadiseo abamwambile’shi; Talanga’kia nkinyi kiabashiiwila dia Sabado?

²⁵ E bebambile’shi: A ta nwi babalē’kia kibakitshine Dafida habakutshilwe bintu, na nsala yibamukwete, e, n’aba badi n’aba benyi?

²⁶ Mubakatwelele mu nshibo y’Efile-Mukulu mu bihwa bia Abiata, tshiite-mwakwidi mukata, na kudia, badile mikate yileshwe ku mpala kw’Efile-Mukulu, yibadi yishidikwe kishila kudia kwanka, anka batshiite-bakwidi b’Efile-Mukulu, e namu tāha na babadi n’abo.

²⁷ Na (Yesu) bebambile’shi: Dia Sabado dibakitshinyine mwanda wa bantu, ta mbantu mwanda wa Sabado, ooo.

²⁸ Binyibiabia, Mwan’a muntu nyi nfumu namu a dia Sabado.