Mako 16 - KILOMBENO KIHYA KIA NFUMWETU YESU KIDISITU

¹ Henyihaha liabakile’fuku dia Sabado, Madiya Mandelene, na Madiya nyin’a Yakoba, na Salonie, babadi baūle bukula bwa mahembwe’shi: Twende mu kushinga (Yesu).

² Biabia na mashik’ēse bwee, a mwifuku dimune dia lubingo, babafikile ku mashama, nguba nkiatunduka.

³ Babadi abeyihushena’shi: A nanyi aketwalashesha ebwe di ku kibelo kia muta?

⁴ Anka hababandulukile, babamwen’ebwe ndibungulwe, dibadi namu dikata dimoo.

⁵ Baba, ha kwete kutwela ’muta habamwene nsongwalume ’mushale ku mboko yibalume, mufwalwe na kilamba kila kitoka soo; babamwen’anka moo.

⁶ E bebalungwile’shi: Tanutshinanga moo, nyi Yesu a Nasaleta anukyebe, abayihayile ku nkulusu; e tahwile kusanguka (ku lufu), te muno ooo; talangai kihindji kiabekalanga bamuladishe.

⁷ Anka ndai bienu, nukalungule bana b’e ba bukishi, na Petelo namu’shi: E tenubadidile ku Ngadilea, mwanka anukamuhete anka bu bibenulungwile.

⁸ Kahindji n’aka babatukile mwanka, babakamine lubilo kwinyi ku mashama, mwanda wa kususa na moo na kukanya kubebakwete; sunga ta balungwile muntu sunga ngumune, mwanda babadi batshine moo.

⁹ Binyibiabia hababukile Yesu ku lufu (tadi na muwa), ku namashika ese efuku dia kwibedi dia lubingo, babadidile kumweka kwi Madiya Mandelene, winyi E babingile mikishi yisambobidi.

¹⁰ E bayile mu kulungul’aba babadi na Yesu bibabadi bakwete kudila kiuwa.

¹¹ N’abo habahushishe’shi, E na muwa, monwe namu na Madiya, tabakuminyin’ebo, ooo.

¹² Kumonga biabia E bamwekyele mu kingi kihaso (kia mbidi) kwi bantu babidi habadi abatambukanga ha mahia.

¹³ Babayile, babakalungwile bakwabo uno mwanda, anka ta mbebakumine’bo, ooo.

¹⁴ Biabia nyi bakamwekyele kwi’bo (bana ba bukishi) ekumi na umune, hababadi bashale ku bidībwa, bebebwele n’abo ha mwanda wa kidiodi kiabo na mashimb’abo abadi anka hoo, mwanda tabakuminanga kwi benyi abamumwene habasangukile na muwa.

¹⁵ Binyibiabia bebalungwile’shi: Ndai hanohansenga hoso, nukalungula myanda ya mukānduwibuwa ku boso.

¹⁶ Yaw’akakumina n’akabatshishibwa akahashibwa, ank’awa shī akakumina akahīshwa ku kimu.

¹⁷ Bino bitundwilo abikelondena na benyi abakakumina; mwishina diande abakabingi mikishi; abakākula’nyi na ndjimi yihia.

¹⁸ Na manyoka namu abakebosha; su namu abakatoma ki bulembe kioso, takibamwesha malwa, ooo: Abakatenteka maboko ha basha busungu, n’abo abakasangale.

¹⁹ Henyihaha Nfumwetu Yesu habahwile kwibalungula biabia, badi mutambwilwe mwiilu, bashale ku mboko yibalume y’Efile Mukulu.

²⁰ Binyibiabia babakatukile, babakalungwile mwanda w’Efile Mukulu kosokoso; winyi Nfumwetu namu kwete kwibafubisha hamune n’abo, kwete kunyisha mwanda namu ku bitundwilo abibelondena. Amena.