Mako 15 - KILOMBENO KIHYA KIA NFUMWETU YESU KIDISITU

¹ Kahindji n’āka bufuku habubatokyele na mashika, batshiite bakwidi bakata bēbungile kimu na bakulu na bafundji ba mikanda, na bena kimu kikata boso; biabia babanyine Yesu, babamwatshile, babamufishe kwi Pilato.

² Pilato bamwinwishe’shi: Obe we nfumu a bena Yudea su? E bamwululwile’shi: Bibōmba’nyi mbinyibinyi

³ Batshiite-bakwidi bakata babamwanyinene myanda yibungi, ank’E tamwalule mwanda, ooo

⁴ Henyihaha Pilato bamwihwishe dimo’nyi’shi: Obe tōlula mwanda’nyi? A tohusha bia bakwamba?

⁵ Anka Yesu ta mwalule, biabia Pilato bakanyine na lukanyo lukata.

⁶ Biabia binyi mu bidibwa bikata bia Paque badi ebahoswela umune umune abakyebanga na mashimb’abo.

⁷ Biabia kubadi umune (mu nshibo ya mashika) n’eshina die’nyi bu Balabasa, badi mwanyibwe na bantombishi n’e; mu buntomboshi bwabo badi bayihanga (bantu.)

⁸ Henyihaha kibumbu (kia bantu) kibanyishishe mayi, kibabangile nami kumwihusha’shi: Etukitshin’anka mokitshina bihwa bioso.

⁹ Anka Pilato bebehwishe’shi: A nukyebe’nyi nenufungwile nfumu a bena Yudea su?

¹⁰ Mwanda Pilata beukile’shi, batshiite-bakwidi bakata mbamufishe ha mwanda wa kiutu.

¹¹ Anka batshiite-bakwidi bakata babashikidishe kibumbu kia bantu’shi: Bibuwa enufungwile Balabasa.

¹² Pilato bebālulwile dimonyi’shi: A biabia, anankakitshi kinyi na uno anutemuna bu nfumu a Bayudea?

¹³ Dimonyi babanyishishe mayi’shi; kamwihayishe’nka ku nkulusu.

¹⁴ Binyibiabia Pilato bebalungwile’shi: A ngi’nyi mwanda ubasole wa kulwisha? Abo babanyishishe bikata’ shi: Kamwihashe ’nka ku nkulusu.

¹⁵ Biabia Pilato mwanda kutokesha mashimba a bantu bebahosodile Balabasa; henyihaha hakukuhila Yesu, ebamufisha kwabadi’shi: Akehayibwe ku nkulusu.

¹⁶ Bashidika babayile n’e mu luhoho (lualwa lubadi ebalasa dikata dia nfumu,) dibatemunwanga bu Peletodyuma; abeyitamishenene kibumbu kiabi kioso.

¹⁷ Biabia babamufwadikile mutwelo ukundakane, babamulukile lubango lwa milobo, babamutentekyele ku mutwe w’E.

¹⁸ Babangile kumwimuna’shi: Mwanana, Obe nfumu a baYudea,

¹⁹ Babamukuhile na mulenge ku mutwe kwe, babamufidile mata, babakunamine manwi (hāshi) kumulangwila.

²⁰ Henyihaha habahwile kumusenga, babamufudile mutwelo ukundakane, babamufwadikile bilamba bie, abayile n’e mu kumwihā ku nkulusu.

²¹ Muntu, eshina die’nyi bu Shimona, mwina Saidine, shye wa Alekesande na Lufusa badi afiki ku mahia, habafumankene n’abo (bashidika) babamufinyikile’shi, mutwadishe nkulusu y’E.

²² Babafikile n’e ku kihindji kibatemunwa’shi, bu Ngolongota, kuhatula nyi nkwamba’shi, nyi Kihindji kia Kabāla.

²³ Biabia babamuhele nfinyo yisangakane na (biakutoma bi būlo,) anka E beutune.

²⁴ Habamwihayile ku nkulusu babeabila bilamba bie’shi: Twibitēle bubale su abikala su mbianyi su mbianyi.

²⁵ Nguba tabadi ha nsā yisatu, nyi habamwihayile ku nkulusu.

²⁶ Na kifundjilo kia kwanyinwa kwe kibadi kifundwe kunundu’shi: NFUMU A BAYUDEA.

²⁷ Babamwihayile namu na bantomboshi babidi ku nkulusu, au ku mboko yibalume, au ku mboko yibakashi.

²⁸ Biabia kilundjilo ki’Efile-Mukulu kibadi kikumbashwe’shi: E badi mubadikilwe hamune na basodi ba myanda.

²⁹ N’aba bakidi eshinda babamukāyile, kwete kuhunga mitwe yabo’shi: A leka! Obe mushindji a ntempelo (y’Efile-Mukulu) ku mafuku asatu na kushimika inginyi.

³⁰ Ehashenge, wekatushe ku nkulusu.

³¹ Anka hamunenka batshiite-bakwidi bakata, na bafundji ba mikanda babamusehe na kahesha’shi: E bahashanga bangi (bantu) E na mwinyi teuku kwihasha.

³² A Kidisitu nfumu a Isalele ayike binobino ku nkulusu, biabia tumone na kukumina. Na baba babayihayilwe n’eboso ku nkulusu babamukāyile namu.

³³ Henyihaha habafikile nsā ha yisamombo, mufito ubafumankene ku mahia oso, ubafishishe mpaa na ku’nsā kitema.

³⁴ Henyihaha habafikile nsā kitema Yesu belele musase n’eyi dikata’shi: Eloi! Eloi! lama sabakatane? kuhatula nyi nkwamba’shi: Efile-Mukulu ande, Efile-Mukulu ande, A bonfutala’mi nkinyi?

³⁵ Bangi abadi bemane h’anka hakuhushā’bio’shi: Aī! ngiawa tayitamina Elaidja.

³⁶ Henyihaha umune bayile bukidi bakaushishe ehondje na nfinyo yi busasa, babeyisomekyele ku mulengye, babamuhele’shi atome, bambile’shi: Bandai kuleka, tumone Elaidja suakafiki kumwisha kwanka.

³⁷ Biabia Yesu belel’eyi di’E bi bukoho, (kahindji n’āka) batudil’eshimba die.

³⁸ Henyihaha mbwisha yibadi yikingwe mu ntempelo y’Efile-Mukulu yibasanuka hankatshi, bihese bibidi, kunundu kwayo mpaa na kūshi.

³⁹ Kimankinda kia bashidika kibadi kimene hehi na Yesu, habamwene E banyishishe eyi, na kutul’eshimba, bakwile’shi: Mbinyibinyi uno muntu ekalanga mwan’Efile Mukulu.

⁴⁰ Kubadi namu bana bakashi babadi tadilanga kwi bula; kubadi kwanka Madiya Mandalene, na Madiya nyin’a Yakoba hela, na Yosese, na Salome:

⁴¹ Baba (bantu) habadi mu Ngadilea bamulondele, na kumukwatshisha mifubo, Bangi bakashi namu nyi babakamine n’E ku Yelusalema.

⁴² Biabia hakuhona ha nguba, mwand’adi’efuku dibadi efuku dia Dilumbulwilo, kuhatula nyi nkwamba’shi, maloba nyi efuku dia Sabado.

⁴³ Nyi bibafikile Yosefe a Alematea, muntu muneme a mu bena kimu, e namu badi atengyela bufumu bw’Efile Mukulu, bayile kwi Pilato ku shī na moo, mu kumuteka kitanda kia Yesu.

⁴⁴ Pilato bakanyine’shi, su tadi mufwe binobino; bayitamina kwadi kimankinda kia bashidika, bamwihwishe’shi: A tafwile kihindji kikata su?

⁴⁵ Biabia habamushingulwishe kimankinda kia bashidika uno mwanda, batushishe kitanda kwi Yosefe.

⁴⁶ N’e baūle mbwisha ya linene lwi buwa bukalabale, biabia bamwiyishishe hashi, bamuhōmbele mwanka, bakamushikile ’muta usēbwemw’ibwe, bālashishe ding’ebwe mpaa na ku kibelo kia muta.

⁴⁷ Henyihaha Madiya Mandelene na Madiya (winyi nyin’a) Yosese, abo babamwene hababamubikanga.