Mako 13 - KILOMBENO KIHYA KIA NFUMWETU YESU KIDISITU

¹ Henyihaha (Yesu) habatukile mu ntempelo, mungi mwan’e a bukishi bamulungwile’shi: A mulambukishi, banda kutala mwikele ano mabwe (e kuno,) aaa! na mwa aibakibwe.

² Yesu bamwalulwile’shi: Omono ano mashibo akata su? ta kukashala ebwe ditentekwe hanundu ha dingi dishī adikatelemunwa hashi, ooo.

³ Habadi mushale’nyi ha ngulu ya Olefeta mbulambula na ntempelo, Petelo, na Yakoba, na Yoano, n’Andeleo, baba mwihwishe ku bukunkula’shi:

⁴ Banda kwitulungula mwanda, yino myanda aikafikī efuku kinyi? A kitundwilo kinyi kia kihwa kiabikafiki?

⁵ Henyihaha Yesu bālulwile na kwibalungula’shi: Dimukai, tala muntu akenulubisha.

⁶ Mwanda bebungi abakafiki mwishina diande na kwamba’shi: Ami nyi E, abakalubisha bebungi.

⁷ A hanukahusha myanda ya ngoshi na nkumo yangoshi, tanukasusanga ’mashimb’enu, mwanda yinomyanda ayikafiki, anka kunfudilo kushī mubandjia kwikala.

⁸ Mwanda ungi mwīlo aukatuku ungi mwīlo, na bungi bufumu abukatuku bungi bufumu, nsenga namu ayikatenkatenka mu bihindji bikwabo, na bihuha bia nsala abikamweka na malwa, abio bioso nyi bia kumbangilo bia bishiotshi bimoo.

⁹ Anka dimukai anwe bana bene, mwanda abakenufishe mu bīmu bia basushi, anukakuhilwa mu bitumbwilo, abakenufishe namu ku meso kwa batontshi, na ku meso kwa bafumu ha mwanda wande, na kwikala bu kitundwilo ku meso kwabo.

¹⁰ Anka mukāndu-wi-buwa (w’Efile-Mukulu) abakalungula milo yoso kwibedi.

¹¹ Biabia habakenufisha (mu kimu) ta nukambanga kwalashena’shi, atukesamba kinyi? sunga kunangushena mwanda kwibedi: ank’akio kioso akikenuhebwa mu nguba wawa, ank’akio anukākula; mwanda ta nanwe abakākula, ooo, nyi Kikudi-E-Selelee.

¹² Tala, mukwabo na muntu akafishe mukwabo ku lufu, na shya mwana ku mwana anka hamunenka; bana namu abakatombokyele bashyabo na banyin’abo, na kwibehashe.

¹³ Bantu boso namu abakenushikwa ha mwanda w’eshina diande, anka yawa akashimata hoo, mpaa na kunfudilo biabi’akahashibwa.

¹⁴ Anka hanukamono kihatakene kia musalu wa bisumanga, kibabakwilwe kwi Danyele mutemuki, nkimane mu kihindji ki kishila mu ntempelo (E abala mwanda eu ashingule), binyibiabia baba be mu Yudea abasukile ku mangulu.

¹⁵ Henyihaha (mimtu) e ku musaka wa nshibo ta kaiki’shi, nkatwele mu nshibo, nkatushe kintu ki mwanka, ooo.

¹⁶ Yawa namu e mwifuba ta kāluka’shi, nkate mutwelo wande.

¹⁷ Aa leka! malw’abo aba basha mayimi, na kwi basha kōmesha bana mu aa mafuku.

¹⁸ Nuteke Efile-Mukulu’shi, kukama lubilo kwenu ta kukekalanga mu hamashika.

¹⁹ Mwanda mu aa mafuku amukekala malwa akata akutwe sunga kuhwandjikila n’angi namu, kubanga ku mbangilo yibahangil’Efile-Mukulu, kufisha mpaa na lelo, sunga nkumpala kwinyi.

²⁰ Su Efile-Mukulu ta muheleshe aa mafuku, kushī muntu’mune akuhanda, anka ha mwanda wa bantu be babasangudibwe, E baheleshe’nyi mafuku aa.

²¹ Biabia su muntu enwamba’shi; Talai’u nyi Kidisitu, sunga’shi: Talai ngiawa ekwaa! Ta numukuminanga, ooo.

²² Mwanda kukabukanga bakidisitu ba madimi, na batemuki ba madimi, abakalesha bitundwilo na myanda ya kukanya, ha mwanda wa kubemba benyi bantu abasangulwe kw’Efile-Mukulu, su babadi akwiuku kukitshina biabia.

²³ Anka dimukai anwe; Talangai tampwile kwinulungula myanda yoso kwibedi.

²⁴ Anka mu aa mafuku, kiakia kia malwā’kata hakibakidi, nguba aikakekala mufito, na mweshi taukatoko.

²⁵ Na nyenyenyi ya mwiilu ayikahono hashi, na biabukome bia mwiilu abikatshinkatshinka.

²⁶ Kumongo abakamono Mwan’a muntu kwete kufika ’makumbi na bukome bukata na ntumbo.

²⁷ Henyihaha E akatumu bamwikeilu be, akakongo basangudibwe be ba ku mpese yoso yinanka ya luhahi, na ku kunfudilo kwa nsenga, mpaa na kunfudilo kw’eilu.

²⁸ Talai, ambule’nyi lukindji luno’lu lwa kikuku. Hanumono lutabi lwao lukī lubishī, talutusha namu mabishi, nyi hanushingulwila’shi, hampeshi tadi hehi.

²⁹ Anka biabia anwe namu, hanukamono yino myanda yoso hayikafiki, nyi hanukashingula’shi, tadi hehi, anka ku kibelo.

³⁰ Mbinyibinyi nenwamba’shi: Bantu ba kino kihungilo ta bakakidi, sunga mpahelahela, mpaa n’ahakakumbana yino myanda yoso.

³¹ Eilu na nsenga abikashimina, anka myanda yande tayikashimina, sunga mpahelahela.

³² Anka mwa diadi’efuku su nguba kinyi ta kwi muntu ebiuku, ooo, na bamwikeilu ba mwiilu benyi, sunga E winyi Mwana, ooo, anka Shye nyaa.

³³ Dimukai, nwikalei na kutengyela na luteko namu, mwandā’nwe ta nwiuku ahakafiki kiakia kihindji.

³⁴ Mwanda eu nyi bu muntu mwende ku angi mahia kula, balekye nshibo ye, bahele bahika ba matalwa, bebābile’nyi mifubo kila w’e, kila w’e, balayile nsentedi aha kibelo’shi: ontengyele.

³⁵ Binyibiabia nwikalei na kutengyela, mwanda tanwiuku hakafiki sha nshibo, su nkiolwa su munkatshi a bilo, su h’etombol’ebedi, su mpa lutokyela.

³⁶ Biafiki lubilo (biabia) tenusangananga balale mu tulo.

³⁷ Anka bino binenulungul’anwe, nebilungula mpaa kwi boso’shi; Nutengyelai.