Mako 12 - KILOMBENO KIHYA KIA NFUMWETU YESU KIDISITU

¹ Henyihaha Yesu babangile kwi balungula myanda mu nkindji’shi: Kubadi muntu badjimin’efuba dia nfinyu mwifuba mwe, bemwelele luhoho lwa mitshi hanka, bahundwile na bwina bwa kukwengiela, bebakile nshibo yitentekieshene yibula, bedilekyele ’māsa a abadjimi, bayile namu ku lungi luhese lwi kulā.

² Binyibiabia habakumbene kihindji kia bikuba, e batumine mpik’e kwi balami, mu kuata bikuba bia nwifuba die kwi abadjimi.

³ Anka baba babamukwete, babamukuhile, abamwalwishe minweminwe.

⁴ Henyihaha batumine mungi muntu e kwabadi, baba mwashile mabwe, babamutanyine kabāla ka mutwe, babamukitshinyine bi bubi.

⁵ Dimo’nyi batumine mungi, yaw’abamwihayile, batumine’nyi bangi be bungi, bangi namu babakuluhilanga, babehayilwe.

⁶ Anka mwan’e kushala abatandjile, mwan’e mukuminyibwe na kifulo, bamutumine kwabadi kunfudilo, bambile’shi: Abakandemekyela mwan’ande.

⁷ Anka badimi baba, babumbishenene’shi: Au nyi muhianyi, twende tukamwihei, biabia buhianyi abukekala bwetu.

⁸ Biabia babamukwete, babamwihayile, babamusumbwile hasha h’efuba dia nfinyu.

⁹ A binyibiabia yawa shē’fuba dia nfinyu akakitshi na minyi? Akafiki mu kulwisha baba badimi, akahe bangi efuba die dia nfinyu.

¹⁰ A ta nwibatangye kino kifundjilwe kia mukanda w’Efile-Mukulu’shi; Ebwe dia’bahele kwi bebaki ba nshibo, diadia nyi adikālula tamutwe w’ehaka.

¹¹ Kinoki nyi kibakitshine Yehowa, na ku meso kwetu nyi mwanda wa kukanya?

¹² (Binyibiabia) babakyebele kumukwata, ankā’batshinyine moo kibumbu kibadi hanka; mwanda babeukile abo’shi, nyi kwītwe babele luno lukindji, henyihaha babamulekyele, babayile.

¹³ Biabia babatumine kwadi bangi ba Bafadiseo, na ba bena Helode’shi, bakamutee kasele mu biakulwa bie.

¹⁴ Abo habadi bafikile kwadi, abamulungwile’shi: A mulambukishi, atwiuku ’shi, biodi mbia binyibinyi, totentekyeshā binangu bia bantu, obe totalā mpala ya bantu, ooo, obe olambukisha bantu mwanda w’eshinda di’Efile-Mukulu mu biabinyibinyi; A nyi kishila’nyi mu kulambula Kaisa su?

¹⁵ A tumulambule’nyi, ta tumuhanga? Anka E kwete kushingula bunsesa bwabo bebulungwile’shi: A nkinyi kianuntompele munda, bandai kumpa mpata nyītale.

¹⁶ Abo abafwile n’ayo, n’E bebehwishe’shi: A kino kihwandjikisho nkia nanyi na mwanda ufundwe hanka’u? Abo abamwalulwile’shi: Mbia Kaisa.

¹⁷ Henyihaha Yesu bebalungwile’shi: Nuhe Kaisa bintu bia Kaisa, nuhe Efile-Mukulu bintu bi’Efile-Mukulu. Biabia na kukanya abakanyine.

¹⁸ Henyihaha Basadusea babafikile kwadi, baba bākulā’ shi: Kusanguka (kwa muntu ku lufu na muwa) ta kwi hanka, babamwihwishe’nyi’shi:

¹⁹ A mulambukishi, Mosesa betufundjile’shi: Su mukwabo na muntu amono lufu, su alekye mpian’e nkunga shi na mwana, biabia mukwabo (amuyhane) āte mpian’e, amone mwadia kutandjile mukwabo lubio.

²⁰ Tala, kubadi balume musambobidi, efu dia’bo dimune’nka. Tutu-abo bebakile mukashi, e bafwīle shī mutande mwana.

²¹ Henyihaha diakabidi bamuhyene, na kufwa bafwile namu, ta mulekye mwana; na mungi akasatu namu anka hamunenka.

²² Anka biabia musambobidi w’abo woso babadi n’e, anka ta mbalekye mwana. Henyihaha kunfudilo mukashi namu bamwene lufu.

²³ A henyihaha namu ahakafiki kusanguka kwa bantu ku lufu, e akekale mukashi a nanyi? mwanda badi mpiane a boso musambobidi.

²⁴ Y’esu bebālulwile’shi: wawa nyi ha mwanda wanulubīla, mwanda nubakutwe kushingula bibafundjibwe, sunga mbukome bw’Efile-Mukulu?

²⁵ Mwanda ahakasanguka bantu ku lufu ta bakebakil’abo ooo, sunga nkwibakilwa; abakekal’anka hamunenka bu bamwikeilu be mwiīlu.

²⁶ Ha uno mwanda wa kusanguka bantu bafwe, ta nwi babale mu mukanda wa Mosesa mu kihindji ki’ebūla ha bamumwekyel’Efile-Mukulu, shi: Ami nyi Efile-Mukulu a Abalahama, nyi Efile-Mukulu a Isaka, n’Efile-Mukulu a Yakoba namu’nyi?

²⁷ E t’Efile-Mukulu a bafwe, ooo, anka E nyi Efile-Mukulu a abatala; anwe biabia nwibakambe kulamuka bikata bimoo.

²⁸ Henyihaha umune a Bafundji ba mikanda befubwile, na ha kuhusha biabadi abeihushena, na hakushingula Yesu bebetaba bibuwa, bamwihwishe’shi: A mulangilo kinyi ukile yoso bukata?

²⁹ Yesu bamwalulwile’shi: Ukata wa milangilo yoso nyi nguno’shi: Hush’obe Isalele, Yehowa Efile-Mukulu etu nyi Yehowa umunenka.

³⁰ Obe okafulu kifulo Yehowa Efile-Mukulu obe n’eshimba diobe dioso, na muwa w’obe w’oso, na binangu biobe bioso, na bukome bwobe bwoso; uno nyi mulangilo wa kumbangilo ukata.

³¹ Mulangilo wa kabidi wi bino’shi: Okekala na kifulo na mukwenu bu biodi mwifule obe na mwinyi. Ta kwi ungi mulangilo ukile yino bukata, ooo.

³² Mufundji a mukanda bamulungwile’shi: Ee, anka biabia mulambukishi, nyi binyibinyi bioakula’shi, kwi ank’Efile-Mukulu umun’enka; ta kwi mungi, nyi ank’E nyaa.

³³ Na kumufula kifulo n’eshimba dioso, na binangu bioso, na muwa woso, na bukome bwoso, na kufula mukwenu hamune biodi mwifule obe na mwinyi; biabia mbikile milambu yoso yekyelwe na Bitahwa.

³⁴ Habeukile Yesu’shi, E betab’eyi di kalolo, bamulungwile’shi: Obe twe kulā na bufumu bw’Efile-Mukulū’be. Habahwile wawa mwanda ta kubadi muntu’nyi badi na kisukusuku kia kumwihusha mwanda’nyi.

³⁵ Biabia Yesu habadi alambukisha mu ntempelo y’Efile Mukulu bebehwishe’shi: A nkinyi Bafundji ba mikanda kiabakwila’shi: Kidisitu nyi mwan’a Dafida?

³⁶ Mwanda Dafida na mwinyi bakwile mu Kikudi-E-Selelee’shi, Yehowa balungwile Nfumwami eshi: Shāla ku mboko yande yibalume mpaa na hankatulu be n’obe luhuna mūshi mwa ngwa y’obe.

³⁷ Binyibiabia Dafida na mwinyi bamutemunanga’shi; Nfumwami; a biabia E mwan’e na minyi? Henyihaha kibumbu kikata kia bantu bisumanga kibamuhushishe na kusangala.

³⁸ Biabia mu lulambukisho lwe E bebalungwile’shi: Dimukai Bafundji ba mikanda, baba abasehela kukindakana bafwale mitwelo yīla, na kusehela kwimunwa mu bisalwe.

³⁹ Na mankwasa akata a kumpala e mu bitumbwilo, na ha bidibwa bikata namu abakyeb’anka ha mankwasa akata.

⁴⁰ Baba namu abanyengā bintu bia mashibo a bakashī bafwilwe, bioso mpaa; na kuteka nteko kwEfile-Mukulu kihindji ki bula anka mwanda wa busesa bwabo. Abo, kuhīshwa kwabo akukakidi bukata.

⁴¹ Henyihaha Yesu bashālele kwinyi ku kilambwilo, badi amono bantu kwete kwela mfalanga mwanka; bebungi babadi bampeta babelele mpata yi bungi.

⁴² Henyihaha kubafikile mukashi mufwilwe, mulanda, belele mwanka makuta e bu mansenke abidi.

⁴³ Yesu baitamine bana be ba bukishi, bebalungwile’shi: Binyibinyi nenwamba’shi, Bintu bibēle uno mukashi mufwilwe mulanda, nyi mbikile abiele bakwabo boso abēle mu kilambwilo.

⁴⁴ Mwand’aba boso babalambulanga mwanka mulombene bibungi bwabo; ank’awa shī n’abio batudile mwanka tw’etoso tubadi n’ato, bintu bie bioso bia kudia bi na bene.