Mako 10 - KILOMBENO KIHYA KIA NFUMWETU YESU KIDISITU

¹ Henyihaha Yesu bebwele kwanka, bafikile mu bukunkula bwa Yudea, ku di’eshiya dia Yodana; bibumbu bia bantu bibamukoñene kwadi, n’E bebalambukisha dimo, bu kibadi kihikwa kie.

² Biabia Bafadiseo babafikile kwadi, tabamwihwishe’shi: A nyi nkishila mulume kubinga mpian’e su? babadi abamutompa.

³ E bebālulwile’shi: A Mosesa benushikile kinyi?

⁴ Henyihaha’bo abo’shi: Mosesa betukuminyine mwanda wa kufunda mukanda wa kwihā kibambo, na kumubinga.

⁵ Yesu bebālulwile’shi: Ha mwanda wa bukoho bwa mashimb’enu, nyi ubenufundjile uno mulangilo.

⁶ Anka ku mbangilo koso kwa kuhanga, Efile-Mukulu bahangile mulume na mukashi.

⁷ Nyi ha uno mwanda aukelekyela mwana mulume shye na nyin’e, na kulamata kwi mpian’e.

⁸ Biabia bubidi bwabo abukekale bu mbidi umune, ta be bu bantu babidi dimo’nyibo, tambidi umune.

⁹ Binyibiabia kiakia kibalamatshish’Elile-Mukulu, muntu ta kumanga kukilamuna.

¹⁰ Mu nshibo namu, bana be ba bukishi babamwihwishe’dimo wawa mwanda.

¹¹ E bebalungwile’shi: Awa akubinga mpian’e, na kuata mungi, biabia basolo ebāsa.

¹² Su mukashi namu ahele mulume e, akebakibwa na mungi, biabia basolo ebāsa.

¹³ Henyihaha babamufwisha bana bahela’shi, ebakume, anka bana be ba bukishi babadi abatosha babafwanga n’abo.

¹⁴ Anka Yesu hakumona biabia badi mufitshilwe kwishimba, bebamba’shi: Kuminai bana bahela bafike kwandji’mi, ta nwibatoshanga, mwanda bufumu bw’Efile-Mukulu mbwabo.

¹⁵ Mbinyibinyi nenwamba’shi: Awa shī akumina bufumu bw’Efile Mukulu hamune bu mwana uhela, ta katwele mwanka, sunga mpahelahela.

¹⁶ E bebatwadile ’maboko e, bebatentekyele maboko, bebahele mwābi.

¹⁷ Henyihaha habadi kwete kwenda mwishinda, muntu bakamine lubilo, bamukunamine hāshi, bamwihwishe’shi: Obe Mulambukishi Ebuwa, aki nkinyi kiandjia kukita mu kuhiana muwa wa ikala-ika?

¹⁸ Yesu bamwambile’shi: A nkinyi kiontemuna ebuwa, ta kwi muntu ebuwa, anka umune, Efile-Mukulu, nyaa.

¹⁹ Weuku milangilo y’Efile-Mukulu’shi; Tosolang’ebāsa, twihanga muntu, twibanga, todimbilanga mukwenu madimi, todimbanga mukwenu, nemeka shobe na nyin’obe.

²⁰ (Songwalume) bamulungwile’shi: A Mulambukishi, nakitshine yaya myanda yoso mpaa na hanadi bu mwana mukinga na binobino.

²¹ Binyibiabia Yesu bamutadile nyaa, bamufudile kifūlo, bamulungwile’shi: Kubakushala’nka kimune, nda, okahane biodi n’abio bioso, okebihe balanda, biabia okamono buheta mwiilu, olukye, eboshe nkulusu, ondonde.

²² Anka haba-hushishe yaya misambo boñamine, bakatukile, bayile n’eshimba difita; mwanda e badi mpeta mukata.

²³ Biabia Yesu habashokolweshe h’aba bantu meso, balungwile bana be ba bukishi’shi: Ha kutwela kwa baba na bintu bi bungi mu bufumu bw’Efile Mukulu, nyi mwanda wi bukoho.

²⁴ Bana be ba bukishi abakanyine yino misambo y’e. Anka Yesu bebālulwile dimonyi’shi: A bana, ki bukoho kwiba abakuluhila mu buheta kutwela ’mbufumu bw’Efile Mukulu.

²⁵ Kutwela kwa ngamedia mw’īso dia shindani nkukile bofulo shampeta kutwela ’mbufumu bw’Efile-Mukulu.

²⁶ Babakambile kukanya, babamwihwishe’shi: A biabia euku mwa dia kuhashibwa nanyi?

²⁷ Yesu bebashokolweshe (meso,) bambile’shi: Bantu ta beuku kukita uno mwanda, anka n’Efile-Mukulu myanda yoso ayiuku kukitshibwa.

²⁸ Henyihaha Petelo babangile kumulungula’shi: Tala, atwe tubalekyele bioso, tatukulondo.

²⁹ Yesu bebālulwile’shi: Mbinyibinyi nenwamba’shi; Ta kwi sunga ngumune abampele nshibo ye, sunga mbakwabo bana babo balume, sunga bana babo bakashi, sunga shye na nyin’e, sunga mpian’e na bana, sunga madimi, ha mwanda wande na ha mukāndu wibuwa w’Efile-Mukulu.

³⁰ Yawa takakutwa kumona hanka binobino bintu bi bu misusa lukama lwa mashibo, na lwa bakwabo balume, na lwa bakwabo bakashi, na lwa banyina, na lwa bana, na lukama lwa madimi, na kubingibwa namu; ahakafiki namu kiakia kihindji ki ku meso muwa wa kwikala-ika.

³¹ Anka bebungi babadi kumpala, abakekala ba kumongo; na ba kumongo abakekala ba kumeso.

³² Henyihaha babadi mwishinda adiende ku Yelusalema; Yesu badi mwibakile ku mpala; babakanyine bikata na ha kulonda bebakwatwa na moo. Biabia E hakubeboshe dimo kwadi b’ekumi na babidi, babangile kwibalungula myanda tayidi hehi kufika kwadi.

³³ Eshi; Hushei, tukwete kukamina ku Yelusalema, mwan’a muntu akafishwa ’māsa a batshiite-bakwidi bakata, na kwi bafuedji-ba-mikanda; Boba abakamuhīsha ku lufu, na kumufisha ku Banjentaila.

³⁴ Abakamusabula, na ku kuhila abakamukuhila, na ku mufila māta, abakamwihā; Ank’ahakafiki efuku dia kasatu akasanguka.

³⁵ Binyibiabia Yakoba na Yoano, bana ba Sebede, abefubwile kwi Yesu eshi, A Mulambukishi, atukyeb’obe kwitukitshina myanda yoso yatukutekye.

³⁶ E bebehwishe’shi: Anukyebe nenukitshine kinyi?

³⁷ Abo abamulungwile’shi: Bibuwa obe ku kumin’atwe kushāla n’obe mu ntumbo yobe, mungi ku mboko yobe yibalume, na mungi ku mboko yobe yibakashi.

³⁸ Anka Yesu bebalungwile ’shi: A ta nushingula kianutekye; anwiuku kutoma ekoho diantomo’mi? na kubatshishibwa na lubatshisho lwanbatshishwa n’alo’nyi?

³⁹ Abambile’shi: Atwiuku. Na Yesu bebalungwile’shi: Mbinyi, ekoho diantomo anukeditomo; na kubatshishwa kwambatshishwa anukabatshishibwa.

⁴⁰ Anka kushāia kwa ku mboko yibalume, mungi kumboko yibakashi, wawa ta mwanda wande kuha muntu, anka (kushola) biabia nkwāba bekulumbulwidibwe.

⁴¹ Ankā’ba b’ekumi na babidi, habahushishe wawa mwanda, babakwaīshile Yakoba na Yoano nsungu ku mashimba’bo.

⁴² Yesu bebetamine kwadi, bebalungwile’shi: Anwiuku’ shi, boba abasangudibwe kulumbula myanda ya Badjentaila abebalumbudile myanda mu matalwa.

⁴³ Anka’nwe, ta nwikalanga hamunenka biabia ooo; anka yaw’akyebe kwikala bu mukata munkatshi mwenu, ekale bu mufubi akwinufubila mifubo.

⁴⁴ Awa’nyi akyebe kwikala hanundu, ekale bu mpika ya boso.

⁴⁵ Mwanda Mwan’a muntu tamufikile kufubilwa mifubo na bantu ooo, anka E kwibafubila, na kwibaha muwa w’e tanki kulwa kia be bungi.

⁴⁶ Henyihaha babafikile mu Yediko; hakutuka mwanka na bana be ba bukishi, na bangi bantu be bungi, mwan’a Temayo n’eshina die bu Batemisa, mpofu, badi mushāle ku bukunkula kweshinda kwete kuteka bintu.

⁴⁷ Biabia habahushishe’shi, Yesu a mu Nasaleta badi kwanka, e babangile kwela musase bi bukoho’shi: A Yesu, mwan’a Dafida, onfwile lusa.

⁴⁸ Bangi namu abamutosheshe’shi: Umina nyaa; ank’e banyishishe kwitamina’shi: Obe mwan’a Dafida nfwile’mi lusa.

⁴⁹ Yesu bēmene, bebakamikile’shi, kamwate; abo namu abakātshile winyi mpofu, abamulungwile’shi: Nyish’eshimba diobe, E nkwete kukwitanyina.

⁵⁰ Henyihaha e basumbwile mutwelo w’e, bebwele lubilo, bafikile kwi Yesu.

⁵¹ Yesu bamwihwishe’shi; Okyebe kinyi nkukitshine? Mpofu bamulungwile’shi: A mulambukishi nankyebe ’mone meso.

⁵² Yesu bamulungwile’shi: Eyile shobe, kukumina k’obe kubakuhasha. Kahindji n’āka bamwene meso, badi talondo Yesu mwishinda.