Luka 16 - KILOMBENO KIHYA KIA NFUMWETU YESU KIDISITU

¹ Henyihaha E balungwile bana-be-ba bukishi’shi: Kubadi muntu mpeta badi na mendaku; die winyi baimukilwe kwi nfumwe mwanda wa kukalakasha bintu bie.

² Biabia bamwitanyina bamulungwile’shi: Uno mwanda wi na minyi unahusha ha mwanda wobe, ndubwile mifubo ya bu mendaku bobe, mwanda tokwiuka kwikala bu mendaku dimo.

³ Henyihaha mendaku bakwile munda mwe’shi: Nkite na minyi? mwanda nfumwami tanata bumendaku bwande: tañuku kudima; kuteka namu nyi na būfu,

⁴ Nyi mufune biakukita’shi, hankakatushwa ku bumendaku, biabia abakansehela ’mashibo abo.

⁵ Biabia baitamine ese sha kishio kia nfumwe, behwishe a kwibedi’shi: We na kishio ki-naminyi kwi nfumwami?

⁶ N’e bālulwile’shi: Bihimo bia mwimu lukama lwa biāsa. E bamulungule’shi: Ata mukanda wobe wa kishio, shala bukidi, ofunde makumi atano.

⁷ Henyihaha bwehwishe mungi’shi: Kiobe kishio ki na minyi? Biabia ebālulwile’shi: Bihimo bia ngano lukama. E bamulungwile’shi: Ata mukanda wobe wa kishio, ofunde makumi mwanda.

⁸ Biabia nfumu’e bēleshe yawa mendaku mwiilu mwanda wa nangunangu ye; mwanda bana ba kino kihungilo, mu kihungilo kiabo mbakile bana b’etata na nangunangu.

⁹ N’ami nenulungula’shi: Nwiatshilei bukūku bwa buheta bwa bishībilulame’shi: hanukatudila, abakenutambula mu mashibo a ikala-ika.

¹⁰ Yawa enakishima mu kiakia kikambe buhela e na kishima namu mu bibungi: na yawa shīmululame mu kinyi kikile buhela, e tamululame namu mu bibungi.

¹¹ Binyibiabia su tanubadi na kishima ku mono ya bishībilulame, a nanyi akenuha kulama’ya ya binyibinyi?

¹² Su tanubadi na kishima ku kiakia kia mungi muntu, a nanyi akenuha bienu’ nwe bana bene.

¹³ Takwi mufubi euku kufubila banfumu babidi: mwanda akashikwa umune, su kukumina mungi, su akalamata kwi umune, akashikwa mungi. Tanwiuku kufubila Efile Mukulu na buheta hamune, ooo.

¹⁴ Biabia Bafadiseo namu abadi na mono kifulo, ha bahushishe yino myanda, abamufukula.

¹⁵ E bebalungwile’shi: Anwi nwi baba abebingisha bana bene ku mpala kwa bantu, anka Efile Mukulu euku mashimb’enu: mwanda kiakia akinemekwa munkatshi mwa bantu, ki butete ku meso kw’Efile Mukulu.

¹⁶ Mukanda-wa-bishila na wa batemuki ubadi kwanka mpaa na habafikile Yoano: kasha kiakia kihindji mpaa na binobino bufumu bw’Efile Mukulu mbulungulwe, na muntu ese atwele ha bukoho.

¹⁷ Nkukambe kubofula eilu na nsenga kukila, he kafunda kahelahela ka mu mukanda wa-bishila kukutshikwa.

¹⁸ Muntu ese akatusha mpian’e abamba mungi, basol’ebasa: na muntu ese abamba mukashi mutushwe kwi mulume basol’ebasa.

¹⁹ Kubadi muntu mpeta badi mufwadikwe bi-lunkwindjinkwindji na lenene bitokolokye, badi mwikale na bikalabale mafuku oso.

²⁰ Kubadi namu muntu mulanda, eshina dia bu Lasalasa, badi mutulwe ku kibelo kye, muule na malonda ku mbidi.

²¹ Badi akyebe kudishwa na bifingifingi abihono ku mesa a mpeta: na mbwa namu yibafikile mu kulamba malonda’e.

²² Bitabibakitshine winyi mulanda nkufwa, e nkutwalwa na bamwikeilu ku kiadi kia Abalahama: muntu mpeta bafwile namu, bashīkilwe.

²³ Biabia hakumona malwa mu kalunganyembo, babushishe meso’e amona Abalahama kula, na Lasalasa ha kiadi kie.

²⁴ Bēle musase bikata’shi: A Yaiya Abalahama onfwile lusa, otume Lasalasa asabikye nsongo ya munwe mu mema, atalash’edimi diande; mwanda nyi na malwa akata mu dino edimi dia kālo.

²⁵ Anka Abalahama bakwile’shi: A mwana, tentekyesha bibotambwile bintu biobe bibuwa mu kihindji kia muwa wobe, na Lasalasa namu batambwile bintu bi-bubi: anka binobino e basambibwa, n’obe bokala malwa.

²⁶ Ungi mwanda namu, hankatshi h’etu n’anwe mpatudibwe luhongo lukata: binyibiabia takwiuku muntu e kwa nudi kwabuka kwatudi, n’e kwatudi kwabuka kwanudi.

²⁷ Henyihaha bakwile’shi: binyibiabia nakwiyayila Yaiya omutume ku nshibo ya Nshyami:

²⁸ Mwanda nyi na bakwetu bana balume batano; ebalungule na kwi bakankamika, tala bakafika namu ku yino mbalo ya malwa.

²⁹ Biabia Abalahama bamulungwile’shi, Be na Mosesa na batemuki, bebahushe.

³⁰ E bakwile’shi: Ooo, Yaiya Abalahama, anka su umune afu ku bafwe biabia abakelanga.

³¹ E bamwalulwile’shi: Su tabahushā Mosesa na batemuki, tabakakumina sunga muntu asanguka kwi bafwe.